Yan Zabolotnyi/stock.adobe.com
IKARAGAI MWĨHŨGĨTE!
Uuni-watho Ũrathiĩ Wongererekete Thĩinĩ wa Thĩ—Mawoni ma Bibilia nĩ Marĩkũ?
Kũrĩ na ngũĩ irĩ na mwanangĩko mũnene bũrũri-inĩ wa Haiti, iria irehetwo nĩ mbatũni cia eki-naĩ. Ningĩ thĩinĩ wa Afrika ya Mũhuro, Mexico, na mabũrũri mangĩ thĩinĩ wa Amerika ya Mũhuro, ngũĩ cia wĩki-naĩ nĩ itũmĩte andũ manyamarĩke mũno. O na kũrĩa ngũĩ inyihĩte, kũrĩ na wĩki-naĩ wa kũiya na gũthũkangia indo ũrĩa ũtũmĩte andũ metigĩre na maigue matarĩ na ũgitĩri.
Hihi Bibilia yugĩte atĩa igũrũ rĩgiĩ uuni-watho ũrĩa ũrĩ kũndũ kũingĩ thĩinĩ wa thĩ?
Ũrĩa Bibilia yarathĩte igũrũ rĩgiĩ uuni-watho
Bibilia yarathĩte atĩ uuni-watho ũngĩgakorũo ũrĩ kĩmenyithia kĩmwe kĩa “ithirĩro rĩa mũtabarĩre wa maũndũ.” (Mathayo 24:3) Jesu Kristo agĩtaarĩria ũhoro wa maũndũ marĩa mangĩgakorũo marĩ kĩmenyithia, aaugire ũũ:
“Tondũ wa uuni-watho kũingĩha-rĩ, wendo wa andũ aingĩ nĩ ũkaanyiha.”—Mathayo 24:12.
Ningĩ Bibilia nĩ yarathĩte atĩ “matukũ-inĩ ma kũrigĩrĩria” nĩ kũngĩgakorũo na andũ “mategiragĩrĩria, matarĩ tha, matendete maũndũ mega.” (2 Timotheo 3:1-5) Maũndũ ta macio ma mwĩyendo nĩmo matũmĩte gũkorũo na mĩtugo mĩingĩ ya uuni-watho ĩrĩa tũrona ũmũthĩ.
No tũrĩ na itũmi njega cia gũkorũo na mwĩhoko. Bibilia yugaga atĩ ica ikuhĩ uuni-watho nĩ ũrĩniinwo.
“No kahinda kanini gatigaru, na andũ arĩa aganu matigaakorũo kuo rĩngĩ; ũkaarora kũrĩa maakoragwo, na matigaakorũo kuo. No andũ arĩa ahooreri nĩ makaagaya thĩ, na nĩ magaakena mũno nĩ ũndũ wa kũingĩhĩrũo nĩ thayũ.”—Thaburi 37:10, 11.
Wĩrute makĩria igũrũ rĩgiĩ ũrĩa Bibilia ĩheanĩte mwĩhoko, na kĩrĩa kĩngĩtũma ũkorũo na ma atĩ maũndũ marĩa tũrona magĩkĩka ũmũthĩ nĩ marahingia ũrathi wa Bibilia. Thoma icunjĩ ici irũmĩrĩire.
“Kĩmenyithia kĩa ‘Matukũ ma Kũrigĩrĩria,’ Kana ‘Ihinda rĩa Mũthia’ nĩ Kĩrĩkũ?”