Rui Almeida Fotografia/Moment via Getty Images
IKARAGAI MWĨHŨGĨTE!
Bibilia Yugaga Atĩa Igũrũ Rĩgiĩ Ngũĩ cia Gĩũteti?
Kũrĩ na ngũĩ nyingĩ cia gĩũteti kũndũ kũingĩ thĩinĩ wa thĩ, na ũndũ ũcio nĩ ũratũma andũ matangĩke.
Bũrũri-inĩ wa Mexico, andũ 39 arĩa marahũũranagĩra iturũa nĩ moragĩtwo, na gũtirĩ gwakorũo na mũigana ũngĩ ta ũcio wa njũragano cia gĩũteti bũrũri-inĩ ũcio. Ningĩ kũrĩ na mĩthemba ĩngĩ ya ngũĩ cia gĩũteti. Maũndũ macio nĩ matũmĩte andũ metigĩre ithurano cia bũrũri ũcio cia 2023-2024.
Ica ikuhĩ thĩinĩ wa Europe nĩ gũkoretwo na ngũĩ nyingĩ cia gĩũteti, o hamwe na tharĩkĩro ĩrĩa yekĩkire Mĩĩ 15, 2024, ya kũgeria kũũraga mũtongoria ũmwe mũnene wa Slovakia.
Andũ thĩinĩ wa Amerika (US) nĩ mamakĩtio nĩ tharĩkĩro ĩrĩa yekĩkire Julaĩ 13, 2024, ya kũgeria kũũraga Donald Trump, ũrĩa warĩ mũtongoria wa tene wa bũrũri ũcio.
Nĩ kĩĩ gĩtũmĩte gũkorũo na ngũĩ nyingĩ ũguo cia gĩũteti? Hihi nĩ igaathira? Bibilia yugĩte atĩa ũndũ-inĩ ũcio?
Ngayũkano cia gĩũteti nĩ ciarathĩtwo
Bibilia nĩ yarathĩte atĩ mahinda maya maitũ, marĩa metagwo “matukũ ma kũrigĩrĩria,” andũ aingĩ nĩ mangĩgakorũo na mĩerekera ingĩrehe ngũĩ na kwaga kũiguithania.
“Matukũ-inĩ ma kũrigĩrĩria nĩ gũkaagĩa mahinda ma ũgwati maritũ kũhiũrania namo. Nĩ gũkorũo andũ nĩ magaatuĩka [andũ] matarĩ ngatho, matarĩ ehokeku, . . . matendaga ũiguano, . . . matarĩ tha, . . . akunyanĩri, momĩtie ciongo, etĩi.”—2 Timotheo 3:1-4.
Ningĩ Bibilia nĩ yarathĩte atĩ mahinda-inĩ maya nĩ kũngĩgakorũo na njũkanĩrĩro, ta ngucanio cia gĩũteti na andũ kũremera thirikari. (Luka 21:9, kohoro ka magũrũ-inĩ) O na kũrĩ ũguo, ngũĩ cia gĩũteti na ngayũkano itigũtũũra tene na tene.
Mũthia wa ngũĩ cia gĩũteti
Bibilia yugaga atĩ Ngai nĩ akaaniina thirikari ciothe cia andũ na ithenya rĩacio arehe thirikari yake ĩrĩa ahandĩte kũrĩa igũrũ.
“Ngai wa igũrũ nĩ akaahanda ũthamaki ũrĩa . . . ũkaamemenda na ũniine mothamaki macio [mangĩ] mothe, na noguo wiki ũgaatũũra wĩhandĩte tene na tene.”—Danieli 2:44.
Ũthamaki wa Ngai nĩ ũkaarehe thayũ na ũrũmwe thĩinĩ wa thĩ yothe.
Jesu Kristo, ũrĩa nĩwe Mũthamaki wa Ũthamaki ũcio, etĩtwo “Mũnene wa Thayũ,” na nĩ agaatigĩrĩra atĩ ‘thayũ ndũgaakorũo na mũthia.’—Isaia 9:6, 7.
O na mahinda-inĩ maya, raiya a Ũthamaki ũcio nĩ mareruta gũikarania na thayũ. Nĩkĩo Bibilia yugaga ũũ: “Nao nĩ magaatura hiũ ciao cia njora ituĩke hiũ cia mĩraũ na matimũ mao matuĩke hiũ cia gũceha. Rũrĩrĩ rũtikoera rũrĩrĩ rũrĩa rũngĩ rũhiũ rwa njora, o na matikeruta mbaara rĩngĩ.”—Isaia 2:3, 4.
Nĩguo wĩrute makĩria, thoma gĩcunjĩ kĩrĩ na kĩongo “Nĩ Maũndũ Marĩkũ Ũthamaki wa Ngai Ũkahingia?” na wĩrorere video ya Ũthamaki wa Ngai nĩ Kĩĩ?