Kũheana Ũteithio o na Kũrĩ na “Mbaara na Riboti Ciĩgiĩ Mbaara”

Matukũ-inĩ maya ma kũrigĩrĩria, nĩ twĩrĩgagĩrĩra kũigua “ũhoro wa mbaara na riboti ciĩgiĩ mbaara.” (Mathayo 24:6) No rĩrĩa aarĩ na ariũ a Ithe witũ magĩa na mathĩna nĩ ũndũ wa mbaara icio, nĩ mamũkagĩra ũteithio ũrĩa marabatara. Riboti ya 3 ya Kĩama Kĩrĩa Gĩtongoragia ya 2022 nĩ yaheanire ũhoro wa gwĩkĩra ngoro wĩgiĩ wĩra ũrĩa ũrathiĩ na mbere Eastern Europe wa kũheana ũteithio kũrĩ arĩa mahutĩtio nĩ mbaara bũrũri-inĩ wa Ukraine. Ũteithio ũcio ũraheanwo atĩa o na kũrĩ na mbaara? Wĩra wa kũheana ũteithio ũgunĩte aarĩ na ariũ a Ithe witũ a Ukraine atĩa?

Nĩ Indo Irĩkũ Irabatarania na Iraheanwo Atĩa?

Kũrĩ Februarĩ 24, 2022, mũthenya ũrĩa mbaara yaambĩrĩirie Ukraine, Kamĩtĩ ya Atabarĩri nĩ yetĩkĩririe kũheanwo mbeca cia gũteithia aarĩ na ariũ a Ithe witũ a Ukraine. Wabici ya rũhonge ya Ukraine yaambĩrĩirie kũgũra indo o rĩo kũu bũrũri-inĩ, na gũcineana kũgerera Kamĩtĩ 27 cia Gũteithĩrĩria Hĩndĩ ya Icanjama iria yaamũrĩte.

Makĩria ma ũguo, Wabici Nene ya Aira a Jehova nĩ yaambĩrĩirie kũrora nĩ ũteithio ũrĩkũ ĩngĩheana. Kamĩtĩ ya Atabarĩri na Kamĩtĩ ya Ũcabi ya Kĩama Kĩrĩa Gĩtongoragia nĩ cioririe Rũhonge rwa Ũgũri rwa Thĩ Yothe rũrutithanie wĩra na ariũ a Ithe witũ kuuma wabici cia Ukraine na Poland nĩguo mamenye ũrĩa mekũhiũrania na ũndũ ũcio. Ariũ a Ithe witũ kuuma rũhonge rwa Ũgũri, rwa Ũkuui, na rwa Watho thĩinĩ wa o wabici, mũthuri ũmwe wa Kamĩtĩ ya Wabici ya Rũhonge ya Ukraine, na ariũ a Ithe witũ a Rũhonge rwa Ũgũri rwa Thĩ Yothe, nĩ maacemanagia o mũthenya nĩguo mabange maũndũ.

Jay Swinney wa Rũhonge rwa Ũgũri rwa Thĩ Yothe aaugire ũũ: “Twaambire kũrora nĩ kĩĩ kĩabataranagia. Tweendaga kũheana irio na indo cia ũtheru iria ariũ a Ithe witũ a kũu mamenyerete. O na kũrĩ ũguo, kũmenya kĩrĩa kĩabataranagia to kuo tu kwarĩ thĩna. Ningĩ nĩ twabataraga kũmenya ũrĩa indo icio igũkinya Ukraine na njĩra ĩrĩa njega biũ ĩtarĩ na ũgwati o na kũrĩ na mbaara.”

Gũkinyĩria Machi 9, 2022, nĩ kwamenyekete indo iria ciabataranagia. Ariũ a Ithe witũ nĩ mangĩaheirũo irio ta nyama na thamaki cia mĩkebe, mũcere, na mboco, hamwe na indo ingĩ cia ũtheru ta thabuni na tissue. Hĩndĩ ĩyo, kuonekire atĩ indo icio cia kũhũthĩrũo ciumia inya nĩ mũndũ ũmwe ciarĩ cia kĩndũ dola 65 cia Amerika. Tondũ aarĩ na ariũ a Ithe witũ ngiri nyingĩ nĩ mangĩabatarire indo icio, Kamĩtĩ ya Atabarĩri nĩ yetĩkĩririe mbeca nyingĩ ihũthĩrũo nĩgetha cigũrũo. No hihi indo icio ingĩatwarirũo atĩa aarĩ na ariũ a Ithe witũ matekwĩingĩria ũgwati-inĩ mũnene?

Kũrĩ Machi 13, ariũ a Ithe witũ erĩ kuuma Poland nĩ maatwarire indo kuuma wabici ya rũhonge ya Poland nginya nyũmba-inĩ ya kũiga indo hakuhĩ na Lviv, Ukraine. Thikũ cigana ũna matanathiĩ, ariũ a Ithe witũ kuuma wabici ya Poland na Ukraine nĩ maamateithirie kwĩhaarĩria nĩ ũndũ wa rũgendo rũu. Wabici nĩ yarĩkirie mĩtaratara ya kĩĩwatho ĩrĩa yabataranagia nĩgetha ariũ a Ithe witũ acio makĩre mũhaka magatware ũteithio, ĩgĩtigĩrĩra atĩ ngaari ciao ciarĩ na marũũri ma kuonania atĩ ciatwaraga ũteithio, na ĩkĩaranĩria na ariũ a Ithe witũ a Ukraine nĩguo kũmenyeke njĩra ĩrĩa nguhĩ makĩria mangĩagerire thutha wa kũhĩtũka mũhaka. Nĩ ũndũ wa kwĩhaarĩria wega ũguo na kũrathimwo nĩ Jehova, indo nĩ ciaheanirũo kũrĩ Kamĩtĩ 24 cia Gũteithĩrĩria Hĩndĩ ya Icanjama ihinda-inĩ rĩa mathaa 24 kuuma rĩrĩa ciakinyire Lviv, na ariũ a Ithe witũ acio magĩcoka Poland o wega.

O na gũtuĩka mũbango ũcio nĩ wagaacĩrire, indo iria ariũ a Ithe witũ acio maatwarire ciarĩ kilo 1,000 tu. Kwabataranagia kilo ingĩ ta 200,000! Hihi indo icio ciothe ingĩatwarirũo atĩa na ineanwo na ihenya o ũrĩa kwahoteka?

“Andũ Aku Makeerutagĩra Meyendeire”

Thutha wa gũthoma thĩinĩ wa jw.org riboti ciĩgiĩ ũrĩa ariũ a Ithe witũ maahutĩtio nĩ mbaara bũrũri-inĩ wa Ukraine, andũ kuuma kũndũ gũtiganĩte thĩinĩ wa thĩ nĩ meendaga gũteithia. Aingĩ arĩa maarĩ kũraihu nĩ maarutire mĩhothi ya gũteithia wĩra wa thĩ yothe wa Aira a Jehova, marĩ na ma atĩ mbeca icio nĩ ingĩahũthĩrirũo wega. Nao angĩ arĩa marĩ mabũrũri-inĩ marĩa marigicĩirie nĩ maahũthĩrire mahinda mao, hinya, na makĩheana indo ciao nĩgetha mateithĩrĩrie. Reke tuone ngerekano cigana ũna.

Bũrũri-inĩ wa Poland, erutĩri nĩ maabangire indo iria ciabataranagia, na ciana igĩcora kandi. Bartosz Kościelniak ũrĩa ũrutaga wĩra na Rũhonge rwa Ũgũri wabici-inĩ ya Poland aaugire ũũ: “Ndanathoma Thaburi 110:3 maita maingĩ, ĩrĩa yonanagia atĩ andũ a Jehova nĩ ‘mangĩkerutĩra meyendeire.’ No rĩrĩa ndonire erutĩri magana maingĩ moka o na ihenya mehaarĩirie kũruta wĩra, nĩ ndeyoneire ũũma wa ciugo icio.”

Mũira wa Jehova ũmwe ũkoragwo na kambuni ya gũtwara na kũiga indo nĩ aaheanire rori ciake ihũthĩrũo, hamwe na maguta marĩa cingĩabatarire. Aaugire ũũ: “Ũyũ nĩ mweke ndĩ naguo wa kuonania wendo wakwa harĩ ariũ a Ithe witũ na Jehova. Ndĩraigua ngenete mũno nĩ ũndũ wa gũteithĩrĩria.” Kwaheanirũo makĩria ma lita 7,700 cia maguta ma ngaari, na ariũ a Ithe witũ makĩhũthĩra mahinda na hinya wao gũthiĩ rũgendo rwa hakuhĩ kilomita 48,000 nĩgetha indo icio ikinyĩre andũ.

Nĩ ũndũ wa wĩrutĩri na wendo wa aarĩ na ariũ a Ithe witũ, gũkinyĩria Machi 28—thikũ 15 tu thutha wa indo cia mbere gũtwarũo—kilo 100,000 cia irio, indo cia ũtheru, na cia ũrigitani nĩ ciatwarĩtwo Ukraine! Na nĩ ũndũ wa indo iria ciaheanirũo nĩ ariũ a Ithe witũ na andũ angĩ, mbeca cia mĩhothi iria ingĩahũthĩkire kũgũra indo icio nĩ cianyihire na gĩkĩro kĩnene. Gũkinyĩria rĩu, Aira a Jehova nĩ matwarĩte makĩria ma kilo 190,000 cia indo cia kũheana ũteithio bũrũri-inĩ wa Ukraine. Aarĩ na ariũ a Ithe witũ maahutirio atĩa thutha wa kwamũkĩra indo icio?

“Ciarĩ Nginya na Wendo Wanyu!”

Thutha wa indo icio gũkinya Lviv, Kamĩtĩ cia Gũteithĩrĩria Hĩndĩ ya Icanjama cia Ukraine nĩ cianeanire indo icio kũrĩ arĩa maarĩ na ũbataro. Indo cia kũheana ũteithio nĩ itwarĩtwo taũni-inĩ itiganĩte, nginya imwe irĩ makĩria ma kilomita 1,300 kuuma Lviv. O na gũtuĩka wĩra ũcio warutirũo na njĩra ĩrĩa njega biũ, nĩ woire ihinda.a

Markus Reinhardt, wa Kamĩtĩ ya Wabici ya Rũhonge ya Ukraine, aaugire ũũ: “Ihinda-inĩ rĩrĩ rĩa mbaara, aarĩ na ariũ a Ithe witũ aingĩ nĩ meyoneire wendo wa Jehova na ũguni wa kũrũmĩrĩra ũtongoria wa ithondeka rĩake o na mbere ya kuumĩrĩte thĩna. Kwa ngerekano, andũ othe nĩ meragwo makorũo na irio na maĩ mangĩhũthĩra ciumia cigana ũna mĩciĩ-inĩ yao. Ũhoro-inĩ wĩgiĩ ũtongoria ũcio, mũthuri ũmwe wa kĩũngano wĩtagwo Anton ũtungataga Kyiv aaugire ũũ: ‘Ithondeka rĩa Jehova nĩ rĩtũteithĩtie kwĩhaarĩria nĩ ũndũ wa moritũ, na nĩ tũracokia ngatho nĩ ũndũ wa ũndũ ũcio. Gũkorũo na irio na maĩ hamwe na redio nĩ kũhonoketie mĩoyo itũ.’ Nĩ tũkenete nĩ ũndũ wa ariũ a Ithe witũ kũrũmĩrĩra ũtongoria ũcio, tondũ mararĩ na indo cia kũhũthĩra ihinda-inĩ rĩrĩa wabici ĩrabangaga ũrĩa ĩkũneana ũteithio.”

Aarĩ na ariũ a Ithe witũ maaiguire atĩa thutha wa kwamũkĩra ũteithio? Mykola na Zinaida, arĩa maikaraga Kharkiv, maaugire ũũ: “Nĩ tũhutĩtio ngoro nĩ ũrĩa mũtũrũmbũĩtie. Nĩ ngatho mũno nĩ ũndũ wa irio na ndawa. Nĩ tuonete wega biũ atĩ guoko kwa Jehova nĩkuo gũtũmĩte ũndũ ũcio ũhoteke.” Valentyna, ũrĩa ũikaraga o gĩcigo-inĩ kĩu aaugire ũũ: “Kuuma rĩrĩa mbaara yambĩrĩirie, andũ maaraga raini ndaihu makĩgũra irio. Ti hĩndĩ ciothe mũndũ aahotaga kũgũra kĩrĩa arabatara. No Jehova nĩ oonire thĩna ũcio. Aathuurire ariũ a Ithe witũ matware ũteithio mĩciĩ-inĩ ya andũ, na indo iria maarehire nĩ iria ciabataranagia! Mahinda-inĩ ta macio maritũ, rĩrĩa kũroneka ta gũtarĩ na mwĩhoko, mũndũ eyonagĩra wendo wa Jehova na ithondeka rĩake na njĩra ya mwanya. . . . Nĩ ũndũ ũrĩ gĩkeno mũno kwamũkĩra ũteithio ũrĩa ũrabatarania ihinda-inĩ rĩrĩa rĩagĩrĩire.”

Yevhen, Iryna, na Mykyta, arĩa moorire makiuma Mariupol maaugire ũũ: “Nĩ tũramũcokeria ngatho mũno nĩ ũndũ wa kũrũmbũiya na gũteithia famĩlĩ itũ. Ũteithio ũrĩa twaamũkĩrire wokire ihinda rĩrĩa rĩagĩrĩire. Kĩambĩrĩria-inĩ tweciragia atĩ katoni icio ciarĩ na indo tu, no rĩrĩa twacihingũrire, nĩ tuonire atĩ ciarĩ nginya na wendo wanyu!”

Hatarĩ nganja Jehova nĩ aahũthĩrire roho wake kũheana ũtongoria nĩgetha ũteithio ũkinyĩre andũ o na kũrĩ na “mbaara na riboti ciĩgiĩ mbaara.” Ningĩ mĩhothi ĩrĩa ũrutĩte nĩ ũndũ wa wĩra wa thĩ yothe, ĩrĩa kaingĩ ĩrutagwo kũgerera donate.jw.org, nĩ ĩteithĩtie na njĩra nene. Nĩ ngatho mũno nĩ ũndũ wa ũtaana waku!

Kũheana Ũteithio na Ihenya Tũkĩĩrutanagĩria Gwĩthema Ũgwati

1. 

   Februarĩ 24, 2022: Kamĩtĩ ya Atabarĩri nĩ yetĩkĩririe kũrutwo mbeca nĩ ũndũ wa Ukraine, kwoguo wabici ĩkĩhota kwambĩrĩria kũheana ũteithio

2. 

   Februarĩ 24–Machi 8, 2022: Wabici ya Ukraine ĩkĩgũra indo imwe na ĩkĩambĩrĩria gũciheana kũgerera Kamĩtĩ cia Gũteithĩrĩria Hĩndĩ ya Icanjama. Ningĩ nĩ yehaarĩirie kwamũkĩra na gũtwarĩra andũ indo kuuma Poland

3. 

   Machi 9, 2022: Kamĩtĩ ya Atabarĩri nĩ yetĩkĩririe indo cia kũheana ũteithio itwarũo Ukraine

4. 

   Machi 10–12, 2022: Mĩbango nĩ yekirũo nĩgetha mũrigo wa mbere wa irio na indo ingĩ ũtwarũo Lviv, Ukraine, kuuma Poland

5. 

   Machi 13, 2022: Mũrigo wa mbere wa irio na indo ingĩ ũgĩtwarũo Lviv, Ukraine, kuuma Poland

6. 

   Machi 14–16, 2022: Erutĩri a Rũhonge rwa Gũcora/Mĩako nĩ maacemanirie Nyũmba-inĩ ya Kĩgomano hakuhĩ na Poznan, Poland, nĩgetha mabange irio na indo cia ũtheru cia gũtwarĩra ariũ a Ithe witũ

7. 

   Machi 17, 2022: Thikũ inya thutha wa mũrigo wa mbere gũtwarũo, ariũ a Ithe witũ nĩ maambĩrĩirie gũtwara kilo 13,000 cia indo mũhaka-inĩ wa Ukraine

8. 

   Machi 21–27, 2022: Indo iria ciatigarĩte nĩ ciacokanĩrĩirio bũrũri-inĩ wa Poland na igĩtũmwo Ukraine igĩcoka igĩtwarũo icigo-inĩ iria ciarĩ na ũbataro ihinda-inĩ rĩa mathaa 24

9. 

   Machi 28, 2022: Ihinda-inĩ rĩa thikũ 20 thutha wa rũtha kũheanwo, kilo 100,000 cia irio, indo cia ũtheru, na cia ũrigitani nĩ ciatwarĩtwo Ukraine

Gũkinyĩria rĩu, Aira a Jehova nĩ matwarĩte makĩria ma kilo 190,000 cia indo cia kũheana ũteithio bũrũri-inĩ wa Ukraine.