ITHOMO RĨA 26
Nĩ Kĩĩ Gĩtũmaga Gũkorũo na Mathĩna na Maũndũ Moru?
Rĩrĩa ũndũ mũũru wekĩka mũndũ nĩ eyũragia: “Ũndũ ũyũ wekĩka nĩkĩ?” Nĩ tũkenaga tondũ Bibilia nĩ ĩheanĩte macokio mega ma kĩũria kĩu.
1. Shaitani aarehire maũndũ moru thĩinĩ wa thĩ na njĩra ĩrĩkũ?
Shaitani ũrĩa Mũcukani nĩ aaremeire Ngai. Eendaga gwathaga arĩa angĩ kwoguo akĩheenereria aciari aitũ a mbere, Adamu na Hawa, manyitanĩre nake ũremi-inĩ ũcio. Eekire ũguo na njĩra ya kũheenia Hawa. (Kĩambĩrĩria 3:1-5) Aatũmire Hawa ecirie atĩ kũrĩ kĩndũ kĩega Jehova aamũimaga. Eendaga kuonania atĩ andũ nĩ mangĩagĩire na gĩkeno mategwathĩkĩra Ngai. Shaitani aaririe maheeni ma mbere rĩrĩa eerire Hawa atĩ ndangĩakuire. Nĩkĩo Bibilia yugaga atĩ Shaitani “nĩ wa maheeni na nĩwe ithe wa maheeni.”—Johana 8:44.
2. Adamu na Hawa maathuurire gwĩka atĩa?
Jehova nĩ oonetie Adamu na Hawa ũtaana mũnene. Aametĩkĩrĩtie kũrĩa matunda ma mũtĩ o wothe mũgũnda-inĩ wa Edeni tiga ma mũtĩ o ũmwe tu. (Kĩambĩrĩria 2:15-17) No nĩ maathuurire kũrĩa matunda ma mũtĩ ũcio maagirĩtio. Hawa “[aatuire] itunda rĩaguo na akĩrĩa.” Thutha ũcio Adamu nake “akĩrĩa.” (Kĩambĩrĩria 3:6) Eerĩ nĩ maaremeire Ngai. Tondũ Adamu na Hawa maarĩ akinyanĩru, matingĩaremirũo nĩ gwĩka ũrĩa kwagĩrĩire. No rĩrĩa maathuurire kũremera Ngai, nĩ meehirie na makĩregana na wathani wake. Itua rĩu nĩ rĩamareheire mathĩna maingĩ.—Kĩambĩrĩria 3:16-19.
3. Itua rĩa Adamu na Hawa rĩtũhutĩtie atĩa?
Adamu na Hawa mehia nĩ maatigire gũtuĩka akinyanĩru, na magĩtũma o na njiarũa ciao ikorũo itarĩ nginyanĩru. Bibilia yugaga ũũ igũrũ rĩgiĩ Adamu: “Kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe.”—Aroma 5:12.
Tũthĩnĩkaga nĩ ũndũ wa itũmi itiganĩte. Rĩmwe tũthĩnĩkaga nĩ ũndũ wa gũtua matua moru. Rĩngĩ tũgathĩnĩka nĩ ũndũ wa matua moru ma andũ angĩ. Na rĩngĩ tũgathĩnĩka nĩ ũndũ wa gũkorũo handũ harĩa hatagĩrĩire ihinda rĩrĩa rĩtagĩrĩire.—Thoma Kohelethu 9:11.
THUTHURIA MAKĨRIA
Reke tũthuthurie tuone kĩrĩa kĩngĩtũma tuuge atĩ ti Ngai ũrehaga maũndũ moru na mathĩna thĩinĩ wa thĩ ũmũthĩ, na tuone ũrĩa aiguaga rĩrĩa tũrathĩnĩka.
4. Nũũ ũtũrehagĩra mathĩna?
Andũ aingĩ meciragia atĩ Ngai nĩwe ũtongoragia thĩ yothe. Hihi ũcio nĩ ũhoro wa ma? Mwĩrorerei VIDEO ĩno.
Thomai Jakubu 1:13 na 1 Johana 5:19, mũcoke mwarĩrĩrie kĩũria gĩkĩ:
Hihi Ngai nĩwe ũrehaga maũndũ moru na mathĩna?
5. Moimĩrĩro ma wathani wa Shaitani makoretwo marĩ marĩkũ?
Thomai Kĩambĩrĩria 3:1-6, mũcoke mwarĩrĩrie ciũria ici:
Shaitani aaheenirie Hawa atĩa?—Rora mũhari wa 4 na 5.
Shaitani ooigire atĩa kuonania ta harĩ kĩndũ kĩega Jehova aaimaga andũ?
Kũringana na Shaitani-rĩ, hihi andũ nĩ mabataraga gũtongorio nĩ Jehova nĩguo makorũo na gĩkeno?
Thomai Kohelethu 8:9, mũcoke mwarĩrĩrie kĩũria gĩkĩ:
Nĩ ũndũ wa thĩ gũkorũo ĩtegũtongorio nĩ Jehova-rĩ, moimĩrĩro makoretwo marĩ marĩkũ?
Adamu na Hawa maarĩ akinyanĩru na maatũũraga thĩinĩ wa Paradiso. No nĩ maathikĩrĩirie Shaitani na makĩremera Jehova
Thutha wa ũremi wao, thĩ yothe ĩkĩiyũrũo nĩ mehia, mathĩna, na gĩkuũ
Jehova nĩ arĩniina mehia, mathĩna, na gĩkuũ. Andũ nĩ magaatuĩka akinyanĩru rĩngĩ, na matũũrage thĩinĩ wa Paradiso
6. Jehova nĩ aiguaga ũũru rĩrĩa tũrathĩnĩka
Hihi Ngai nĩ onaga rĩrĩa tũrathĩnĩka? Ta wĩcirie ũhoro wa ũrĩa Mũthamaki Daudi na mũtũmwo Petero maandĩkire. Thomai Thaburi 31:7 na 1 Petero 5:7, mũcoke mwarĩrĩrie kĩũria gĩkĩ:
Kũmenya atĩ Jehova nĩ onaga rĩrĩa tũrathĩnĩka na nĩ atũrũmbũyagia kũratũma ũigue atĩa?
7. Ngai nĩ akaaniinĩra andũ mathĩna mothe
Thomai Isaia 65:17 na Kũguũrĩrio 21:3, 4, mũcoke mwarĩrĩrie kĩũria gĩkĩ:
Nĩkĩ nĩ ũndũ wa gwĩkĩra ngoro kũmenya atĩ Jehova nĩ akaaniina maũndũ mothe moru marĩa andũ makoretwo magĩcemania namo?
Hihi nĩ ũĩ?
Rĩrĩa Shaitani aaririe maheeni ma mbere, nĩ aacambithirie Jehova. Kwoguo agĩthũkĩria Jehova rĩĩtwa na njĩra ya kuonania ta arĩ Mwathani ũtarĩ wendo na ũtarũmagĩrĩra kĩhooto. Ica ikuhĩ, Jehova nĩ arĩtetera rĩĩtwa rĩake na njĩra ya kwehereria andũ mathĩna mothe. Nĩ akoonania atĩ wathani wake nĩguo mwega biũ. Gũteterũo kwa rĩĩtwa rĩa Jehova nĩ ũmwe wa maũndũ marĩa ma bata mũno kũrĩa igũrũ na gũkũ thĩ.—Mathayo 6:9, 10.
ANDŨ AMWE MOIGAGA: “Warĩ muoroto wa Ngai tũthĩnĩkage.”
Wee ũngiuga atĩa?
ŨRĨA TWERUTA
Shaitani ũrĩa Mũcukani na aciari aitũ a mbere nĩo maarehire maũndũ moru thĩinĩ wa thĩ. Jehova nĩ aiguaga ũũru mũno rĩrĩa tũrathĩnĩka, na ica ikuhĩ nĩ arĩeheria mathĩna mothe.
Ciũria cia gũcokera
Shaitani ũrĩa Mũcukani aaheenirie Hawa atĩa?
Ũremi wa Adamu na Hawa ũtũhutĩtie atĩa ithuothe?
Tũmenyaga atĩa atĩ Jehova nĩ aiguaga ũũru rĩrĩa tũrathĩnĩka?
RIKĨRA
Thoma wone Bibilia yugaga mehia nĩ kĩĩ.
Wĩrute makĩria ũhoro wĩgiĩ ũndũ ũrĩa mũnene Shaitani ũrĩa Mũcukani ooimĩririe mũgũnda-inĩ wa Edeni.
“Nĩ Kĩĩ Gĩtũmaga Ngai Etĩkĩrie Mĩnyamaro?” (Mũrangĩri, Janũarĩ 1, 2014)
Wĩrorere wone ũndũ ũrĩa mũthuri ũmwe eerutire igũrũ rĩgiĩ maũndũ moru marĩa eeyonagĩra.