Itanya rĩa Mwanya Biũ!
“Mũndũ o wothe wĩ muoyo na akeĩ’hoka niĩ, ndarĩ hingo agakua.”—JOHANA 11:26.
1. Mamilioni ma arĩa akuũ rĩu makariũkĩrio kũndũ kũhaana atĩa?
RĨRĨA mamilioni ma andũ makariũkio, matigacoka muoyo thĩinĩ wa thĩ theri. (Atũmwo 24:15) Magokĩra makore kũndũ gũthondeketwo gũgathakara mũno na magaakora atĩ nĩmathaga-thagĩirũo gĩikaro, nguo, na irio nyingĩ. Nĩa makahaarĩria macio mothe? Nĩgũkuoneka o wega atĩ, no mũhaka gũgakorũo na andũ arĩa magakorũo magĩtũũra thĩinĩ wa thĩ njerũ mbere ya kũriũka gwa gũkũ thĩ kwambĩrĩria. No acio magakorũo marĩ a?
2-4. Nĩ itanya rĩrĩkũ rĩa mwanya rĩrĩ mbere ya arĩa me muoyo thĩinĩ wa “matukũ marĩa ma kũrigĩrĩria”?
2 Kũhingio kwa ũnabii wa Bibilia kuonanagia atĩ tũratũũra thĩinĩ wa “matukũ marĩa ma kũrigĩrĩria” ma mũtabarĩre ũyũ wa maũndũ.a (2 Timotheo 3:1) O ica-ikuhĩ rĩu, Jehova Ngai nĩarĩingĩrĩra maũndũ ma andũ na ahaate waganu wothe ũthire thĩ. (Thaburi 37:10, 11; Thimo 2:21, 22) Hingo ĩo-rĩ, nĩ atĩa gũgatuĩka kũrĩ andũ arĩa matungatagĩra Ngai na wĩhokeku?
3 Jehova ndakananga arĩa athingu hamwe na arĩa aaganu. (Thaburi 145:20) Ndarĩ hingo arĩ eka ũguo, na ndageka ũguo rĩrĩa agathambia waganu wothe ũthire thĩ. (Gerekania Kĩambĩrĩria 18:22, 23, 26.) Ma nĩ atĩ, ibuku rĩa mũico rĩa Bibilia rĩaragia ũhoro wa “kĩrĩndĩ kĩingĩ mũno, gĩtangĩgereka nĩ mũndũ, kĩa andũ moimĩte ndũrĩrĩ-inĩ ciothe, na marĩ a mĩhĩrĩga yothe na nduka ciothe o na mĩario yothe,” gĩkiuma thĩinĩ wa “mĩnyamaro-inĩ ĩrĩa mĩnene.” (Kũguũrĩrio 7:9-14) Ĩĩ-ni, kĩrĩndĩ kĩingĩ kĩa andũ nĩgĩkahonoka mĩnyamaro mĩnene ĩrĩa thĩinĩ wayo thĩ njũru ya rĩu ĩgathira, nao makaingĩra thĩinĩ wa thĩ njerũ ya Ngai. Kũu, andũ aathĩki nĩmakahota kũgunĩka biũ nĩ mĩbango ya magegania ĩrĩa Ngai athagathagĩire andũ ya kwehereria andũ mehia na gĩkuũ. (Kũguũrĩrio 22:1, 2) Kwoguo, “kĩrĩndĩ kĩingĩ,” gĩtirĩ hingo o na rĩ gĩkabatara gũkua. Nĩ itanya rĩa mwanya ta kĩ!
4 Hihi no tũgĩe na ma thĩinĩ wa kĩĩrĩgĩrĩro kĩu kĩa mwanya? Hatirĩ nganja! Jesu Kristo we mwene nĩonanirie atĩ nĩ kũngĩgakorũo na hingo andũ mangĩgatũũra mategũkua o na hanini. Mbere tu ya kũriũkia mũratawe Lazaro, Jesu erire Maritha ũũ: “Mũndũ o wothe wĩ muoyo na akeĩ’hoka niĩ, ndarĩ hingo agakua.”—Johana 11:26.
Wee O na We No Ũhote Gũtũũra Tene na Tene
5, 6. Angĩkorũo no wende gũtũũra tene na tene thĩinĩ wa Paradiso gũkũ thĩ-rĩ, wagĩrĩirũo nĩ gwĩka atĩa?
5 Hihi wee nĩũkwenda gũtũũra tene na tene thĩinĩ wa Paradiso gũkũ thĩ? Hihi nĩũrerirĩria mũno kuona rĩngĩ endwa aku? Aakorũo nĩguo-rĩ, no mũhaka ũgĩe na ũmenyo wa wendi na muoroto wa Ngai. Thĩinĩ wa mahoya harĩ Ngai, Jesu oigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.”—Johana 17:3.
6 Nĩ wendi wa Ngai atĩ “andũ othe mahonokio na matuĩke a kũmenya ũhoro-wa-ma.” (1 Timotheo 2:3, 4) Rĩrĩ nĩrĩo ihinda rĩa kwĩruta ũrĩa wee, o hamwe na mamilioni ma andũ angĩ arĩa o na rĩu mareka wendi wa Ngai, mũngĩhota gũtũũra tene na tene thĩinĩ wa Paradiso gũkũ thĩ. Aira a Jehova no makenere gũgũteithia wĩrute makĩria ũhoro wa Ngai na wendi wake. Nĩkĩ gĩkũgiria wonane nao thĩinĩ wa Nyũmba ya Ũthamaki ĩrĩa ĩrĩ hakuhĩ nawe kana wandĩke marũa ũkĩhũthĩra andĩrĩthi iria irĩ hakuhĩ nawe makĩria cionanĩtio thĩinĩ wa pĩji ĩo ĩrũmĩrĩire?
[Ũhoro wa magũrũ-inĩ]
a Ona ibuku Biblia Inafundisha Nini Hasa? mũrango 9, rĩcabĩtwo nĩ Aira a Jehova.
[Mbica karatathi ka 31]
“Kĩrĩndĩ kĩingĩ” kĩa andũ matirĩ hingo o na rĩ makabatario nĩ gũcama gĩkuũ