ITHOMO RĨA 15

Kwaria ũrĩ na Ũũma

1 Athesalonike 1:5

NA NJĨRA NGUHĨ: Onania nĩ wĩtĩkĩtie biũ atĩ maũndũ marĩa ũroiga nĩ ma ma, na ma bata.

Haarĩria wega. Thoma ũhoro ũrĩa ũheetwo nginya ũtaũkĩrũo nĩ ũrĩa ihooto icio cia Kĩĩmandĩko ingĩtũma mũndũ akinyĩrĩre gũtua itua rĩrĩa rĩagĩrĩire. Geria gũtaarĩria maũndũ marĩa manene ma ũhoro waku ũkĩhũthĩra ciugo nini na hũthũ. Wĩcirie ũrĩa ũhoro ũcio ũngĩteithia athikĩrĩria aku. Hoya ũheo roho mũtheru.

Wĩmenyerie mĩario yaku na kayũ nĩguo ũhoro ũcio ũingĩre meciria-inĩ maku biũ na wagagĩrie mũrutanĩre waku.
Hũthĩra ciugo ironania atĩ ũrĩ na ũũma. Handũ ha gũcokera ciugo o ta ũrĩa ciandĩkĩtwo, hũthĩra ciugo ciaku mwene. Thuura ciugo ironania atĩ ũrĩ na ũũma na ũrĩa ũroiga.
Onania ũritũ wa ũrĩa ũroiga na warie kuuma ngoro. Aria na mũgambo wa kũigana. Ikara ũkĩroraga athikĩrĩria aku angĩkorũo ũndũ ũcio ndũngĩrakaria andũ kwanyu.

Kwaria ũrĩ na ũũma ti kuuga warie na njĩra ĩtarĩ ya gĩtĩo, ũnyitĩrĩre mawoni maku, kana ũtindĩkĩrĩrie athikĩrĩria matue itua rĩna. O na rĩrĩa ũronania ũritũ wa ũrĩa ũroiga, kinyĩra athikĩrĩria aku ngoro na njĩra ya wendo.