Mũtambo wa Video wa Kũhũthĩrũo Mĩcemanio-inĩ ya Kĩũngano

Thirikari nyingĩ thĩinĩ wa thĩ nĩ iheanĩte watho wĩgiĩ andũ kũraihanĩrĩria na ikagiria andũ gũcemania marĩ ikundi. Aira a Jehova nĩ marerutanĩria kũrũmĩrĩra mawatho macio o magĩcemanagia hamwe na njĩra ĩtekũmaingĩria ũgwati-inĩ. Nĩguo mahote gwĩka ũguo, ciũngano ikoretwo ikĩhũthĩra mĩtambo ya video ta Zoom gwĩka mĩcemanio yao.

Nĩguo mĩcemanio itũ ĩkorũo na ũgitĩri na tũhotage kũmĩka tũtegũtĩrĩria, Kĩama Kĩrĩa Gĩtongoragia nĩ gĩetĩkĩririe mĩhothi ĩhũthĩrũo kũgũra akaunti cia Zoom cia kũhũthagĩrũo nĩ ciũngano. Ũndũ ũcio nĩ ũteithĩtie mũno ciũngano imwe iria itangĩahotire kũgũra akaunti icio, iria irĩhagĩrũo kuuma ciringi 1,500 nginya 2,000 kana makĩria. Kaingĩ ciũngano icio ciahũthagĩra mĩtambo ĩtarabatara kũrĩhĩrũo, ĩrĩa yetĩkagĩria mũigana mũnini wa andũ kũnyitithanio na ndĩarĩ na ũgitĩri wa kũigana. Ciũngano ciothe iria ihũthagĩra akaunti icio cia Zoom cia ithondeka nĩ igũnĩkĩte mũno tondũ nĩ ũndũ mũhũthũ gũciseta ũndũ igũkorũo na ũgitĩri wa kũigana na no ihote kũnyitithania andũ aingĩ mũno. Gũkinyĩria rĩu, ciũngano makĩria ma 65,000 thĩinĩ wa mabũrũri makĩria ma 170 nĩ irahũthĩra akaunti icio.

Kĩũngano gĩa Kairagi, kĩrĩa kĩrĩ taũni-inĩ ya Manado, gĩcigo-inĩ kĩa North Sulawesi, Indonesia, nĩ gĩatigire kũhũthĩra mũtambo ũrĩa kĩahũthagĩra ũtaarĩhagĩrũo na gĩkĩambĩrĩria kũhũthĩra akaunti ya Zoom ya ithondeka. Mũrũ wa Ithe witũ Hadi Santoso aaugire ũũ: “O na aarĩ na ariũ a Ithe witũ arĩa matoĩ kũhũthĩra thimũ cia kĩĩrĩu nĩ makenagĩra mĩcemanio rĩu, na gĩtũmi kĩnene nĩ tondũ matibataraga kũingĩra mũcemanio-inĩ ũmwe maita maigana ũna.”

Mũthuri ũmwe wa kĩũngano wĩtagwo Lester Jijón, Jr., wa kĩũngano kĩa Guayacanes Oeste taũni-inĩ ya Guayaquil, Ecuador, aaugire ũũ: “Tondũ aarĩ na ariũ a Ithe witũ aingĩ matikoragwo na mbeca nyingĩ, ciũngano imwe itingĩahotire kũrĩhĩra akaunti cia Zoom nĩguo kĩũngano gĩothe kĩnyitanĩre mĩcemanio-inĩ. No rĩu, tondũ akaunti cia Zoom cia ithondeka no ihote kũnyitithania andũ angĩ, nĩ tũnyitaga andũ angĩ ũgeni, tũtegwĩtigĩra atĩ twahota kũhĩtũkia mũigana wa andũ arĩa mangĩnyitithanio.”

Johnson Mwanza, mũthuri wa kĩũngano kĩa Ngwerere North, taũni-inĩ ya Lusaka, Zambia, aandĩkire akiuga: “Kaingĩ aarĩ na ariũ a Ithe witũ aingĩ maugaga, ‘akaunti ya Zoom ya ithondeka nĩ ĩtũmaga tũigue tũkuhĩrĩirie aarĩ na ariũ a Ithe witũ na ĩgatũma tuone atĩ Jehova nĩ atwendete na nĩ atũrũmbũyagia.’”

Akaunti icio cia ithondeka igũragwo na mbeca iria ciigĩtwo nĩ ũndũ wa kũheana ũteithio hĩndĩ ya icanjama. Mbeca icio irutagwo harĩ mĩhothi ya kwĩyendera ĩrĩa ĩrutagwo nĩ ũndũ wa wĩra wa thĩ yothe. Andũ aingĩ marutaga mĩhothi ĩyo kũgerera donate.jw.org. Nĩ tũragũcokeria ngatho nĩ ũndũ wa kũruta mĩhothi ũrĩ na ũtaana, ĩrĩa ĩhũthagĩrũo nginya mawĩra-inĩ mangĩ ma kũheana ũteithio thĩinĩ wa thĩ.—2 Akorintho 8:14.