3 Ngai nĩ Aherithanagia—Hihi Ũcio nĩ Ũhoro wa Ma?

Ũrĩa ũngĩkorũo ũiguĩte: “Ngai athuthuragia mehia mothe ma andũ agacoka akamaherithia na mwaki wa tene na tene.”

“Ngai nĩ aherithagia ehia kũgerera icanjama cia ndũire.”

Ũrĩa Bibilia ĩrutanaga: Rĩandĩko rĩa 2 Petero 3:9 riugaga atĩ Jehova “ndendaga mũndũ o na ũmwe ore, no atĩ othe matuĩke a kwĩrira.” Handũ ha gũtindĩrĩra mahĩtia maitũ, aroraga ngumo ciitũ iria njega. Ngai “orũragia maitho kũndũ guothe thĩ yothe akĩonania atĩ e na hinya mũno wa gũteithia andũ arĩa mamũrũmagĩrĩra na ngoro yao yothe.”—2 Maũndũ ma Matukũ ma Tene 16:9.

Ũrutani wa mwaki wa tene na tene ndumĩte thĩinĩ wa Bibilia—gũcina andũ na mwaki tene na tene nĩ ũndũ wĩ magigi maitho-inĩ ma Ngai. Kũherithia kũrĩa kũnene Ngai aherithagia andũ oru nakuo nĩ kũmatunya kĩheo kĩa muoyo. (Jeremia 7:31; Aroma 6:7) Nacio icanjama cia ndũire, iria itathuranagia, itirehagwo nĩ Ngai, no nĩ maũndũ marĩa mokaga materĩgĩrĩirũo marĩa makoraga mũndũ o wothe.—Kohelethu 9:11, New World Translation of the Holy Scriptures.

Ũrĩa kũmenya ma kũngĩgũteithia: No tũhote gũkuhĩrĩria Ngai tũngĩmenya atĩ akoragwo ‘ehaarĩirie kuohanĩra’ na ndahiũhaga gũtuĩra andũ. (Thaburi 86:5) Tũtiagĩrĩirũo nĩ gũtungatĩra Ngai tũkĩiguaga ta tũrĩ na mahĩtia kana nĩ ũndũ wa gwĩtigĩra tũtikaherithio. Ithenya rĩa ũguo, twagĩrĩirũo nĩ gũkorũo na wĩtĩkio uumanĩte na wendo witũ harĩ Jehova. Wendo ũcio nĩguo ũtũmaga twĩke o ũrĩa wothe tũngĩhota tũmũkenie.—Mathayo 22:36-38; 1 Johana 5:3.

O na gũtuĩka Ngai endaga andũ othe magarũrũke meekage maũndũ mega-rĩ, nĩ oĩ atĩ andũ aingĩ gũtirĩ hingo makaagarũrũka. Korũo gũtirĩ hĩndĩ oyagĩra ehia ikinya, arekagĩrĩria wagi wa kĩhooto na mĩnyamaro tene na tene-rĩ, angĩkorũo atariĩ o ta atongoria arĩa mathondekaga mawatho na makaga kũmarũmĩrĩra. (Kohelethu 8:11) Kũmenya atĩ Ngai ndegũtũũra akirĩrĩirie waganu gũtũmaga tũgĩe na kĩĩrĩgĩrĩro kĩrũmu kĩa ihinda rĩũkĩte. Ngai nĩ eranĩire atĩ nĩ akaaniina arĩa makĩragĩrĩria gwĩka maũndũ moru, nĩguo “arĩa ahoreri” makenere muoyo wa tene na tene gũkũ thĩ o ta ũrĩa warĩ muoroto wake kĩambĩrĩria-inĩ.—Thaburi 37:10, 11, 29.a

Hihi Ngai no ende tũmũtungatĩre nĩ ũndũ wa gwĩtigĩra kũherithio?

Engravings by Doré

[Kohoro ka Magũrũ-inĩ]