Hũũraga Mbica Ũgĩthoma Bibilia

Bibilia nĩ ĩkoragwo na ngʼano cia ma cia maũndũ maahanĩkire iria itũrutaga maũndũ ma bata. Rĩrĩa twahũũra mbica ya maũndũ marĩa tũrathoma, no tũtaũkĩrũo wega nĩ kĩrĩa tũrathoma na tũgunĩke makĩria. Reke tuone maũndũ ũngĩka marĩa mangĩgũteithia kũhũũra mbica kĩrĩa ũrathoma Bibilia-inĩ.

• Thoma na mũgambo. Gũthoma Bibilia na mũgambo no gũgũteithie kũhũũra mbica wega ya ũndũ ũrĩa ũrathoma. Angĩkorũo mũrathoma Bibilia mwĩ ta famĩlĩ, na harĩa mũrathoma harĩ na ciugo cia andũ ngũrani, no mũhote kũhũũra wega mbica ya ũndũ ũrĩa warĩrĩirio mũngĩgayana o mũndũ athome ciugo cia mũndũ ngũrani na ũrĩa ũngĩ.

• Wĩĩkĩre iratũ-inĩ cia arĩa mararĩrĩrio. Geria gũtaũkĩrũo nĩ ũrĩa mũndũ ũrĩa warĩrĩirio eeciragia na aaiguaga. Kwa ngerekano no wĩyũrie ũũ: ‘Nĩ kĩĩ gĩatũmire mũndũ ũyũ auge kana eke maũndũ na njĩra ta ĩyo? Korũo nĩ niĩ ndaarĩ ũndũ-inĩ ta ũcio-rĩ, ingĩeciririe atĩa kana ingĩaiguaga atĩa?’

• Geria gũcora. O na angĩkorũo ndũrĩ mũcori mwega, geragia gũcora kĩrĩa kĩarĩrĩirio thĩinĩ wa Bibilia na ũndũ ũcio no ũgũteithie kũhũũra mbica na kũririkana ũndũ ũcio wega.