Hesekiel

36 “Ashike ove, omona womunhu, xunganeka shi na sha neemhunda daIsrael, ndele to ti, ‘Nye eemhunda daIsrael, udeni ondjovo yaJehova. 2 Eshi osho Omwene Omunamapangelo aeshe, Jehova, ta ti: “Omutondi okwa popya e li omhinge nanye ta ti, ‘Aha! Nokuli neenhele donale dile oda ninga emona letu!’”’

3 “Onghee xunganeka, ndele to ti, ‘Eshi osho Omwene Omunamapangelo aeshe, Jehova, ta ti: “Molwaashi ova mbuwaleka nove mu ponokela okudja keembinga adishe, opo mu ninge emona loonakuxupa po* okudja mokati koiwana, novanhu ova twikila okupopya kombinga yeni noku mu sheka, 4 onghee hano, nye eemhunda daIsrael, udeni ondjovo yOmwene Omunamapangelo aeshe, Jehova. Eshi osho Omwene Omunamapangelo aeshe, Jehova, ta ti keemhunda nokoikulundudu, komakungulukilo nokomafilu, koikulukuma, oyo ya mbuwapalekwa, nosho yo koilando, oyo ya haulukwa, oyo ya li ya kwatwa ko noya shekwa kooluxupe vomoiwana oyo ye va dingilila; 5 Omwene Omunamapangelo aeshe, Jehova, ota ti kwaava: ‘Moupyuhandu wange wa xwama, ohandi ka popya ndi li omhinge noonakuxupa po vomoiwana nondi li omhinge naEdom ashishe, ovo ve na ehafo linene nohava popi nodino* ova kufa ko edu lange la fa emona lavo vene, va kufe ko omaulifilo alo noku li kwata ko.’”’

6 “Onghee xunganeka shi na sha nedu laIsrael, ndele to lombwele eemhunda noikulundudu, omakungulukilo nomafilu, ‘Eshi osho Omwene Omunamapangelo aeshe, Jehova, ta ti: “Tala! Ohandi popi nouladi wange nonda fula onya, molwaashi omwa efa mu fifwe ohoni koiwana.”’

7 “Onghee hano, eshi osho Omwene Omunamapangelo aeshe, Jehova, ta ti: ‘Ame mwene ohandi ka ana nda yelula eke lange kutya oiwana oyo i li popepi, otai ka humbata ohoni yayo vene. 8 Ashike nye eemhunda daIsrael, otamu ka mena oitai nokwiimina ovanhu vange, Israel, oiimati yeni, osheshi mafiku otava ka aluka. 9 Osheshi ondi li pamwe nanye, nohandi ka taalela kunye, notamu ka limwa nokukunwa eembuto. 10 Ohandi ka hapupalifa ovanhu veni . . . eumbo alishe laIsrael, alishe koonono . . . noilando otai ka kalwa, noikulukuma otai ka tungululwa. 11 Heeno, ohandi ka hapupalifa ovanhu veni, noimuna yeni otai ka hapupala nokudala. Nohandi ke mu ningifa mu kalwe ngaashi mwa li nale, nohandi ke mu ningifa mu kale mu li nawa mu dule monakudiwa; nomu na oku ka shiiva kutya aame Jehova. 12 Ohandi ka ningifa ovanhu . . . ovanhu vange, Israel . . . va ende kombada yeni, notave ke mu kufa mu li emona lavo. Otamu ka ninga efyuululo lavo, noitave ke mu ningifa vali mu kale muhe na ounona.’”

13 “Eshi osho Omwene Omunamapangelo aeshe, Jehova, ta ti: ‘Molwaashi otava ti kunye, “Ou li edu, olo tali xwake po ovanhu, nokuningifa oiwana yeni i kale ihe na ounona,”’ 14 ‘onghee hano, ito ka xwaka po vali ovanhu, ile u ningife oiwana i kale ihe na ounona,’ Omwene Omunamapangelo aeshe, Jehova, osho ta ti. 15 ‘Itandi ke ku efa vali u shekwe koiwana, ile u humbate omasheko ovanhu, noito ka ningifa vali oiwana yoye i punduke,’ Omwene Omunamapangelo aeshe, Jehova, osho ta ti.”

16 Nondjovo yaJehova oye uya vali kwaame tai ti: 17 “Omona womunhu, eshi eumbo laIsrael la li hali kala medu lavo, ova li ve li nyateka omolweendjila davo nosho yo oilonga yavo. Eendjila davo oda li da fa okuhakoshoka kwomafimbo ovakainhu kwaame. 18 Onghee onda tila onya yange kuvo omolwohonde oyo va tila kombada yedu, nomolwokuningifa edu li kale inali koshoka noikalunga yavo itondifa.* 19 Onghee onde ve lihanifila mokati koiwana noku va halakanifila mokati komadu oo. Onde va tokola she likolelela kondjila yavo noshe likolelela koilonga yavo. 20 Ashike eshi ve uya koiwana oyo, ovanhu ova nyateka edina lange liyapuki, eshi va popya kombinga yavo tava ti, ‘Ava ovo ovanhu vaJehova, ashike ova li ve na okufiya po edu laye.’ 21 Onghee ohandi ka ulika kutya ondi na ko nasha nedina lange liyapuki, olo eumbo laIsrael la nyateka mokati koiwana oko la ya.”

22 “Onghee hano, tya keumbo laIsrael, ‘Eshi osho Omwene Omunamapangelo aeshe, Jehova, ta ti: “Itandi katuka omolweni, nye eumbo laIsrael, ndele omolwedina lange liyapuki, olo mwa nyateka mokati koiwana oko mwa ya.”’ 23 ‘Ohandi ka yapulifa filufilu edina lange linene, olo la li la nyatekwa mokati koiwana, olo mwa nyateka mokati kavo; noiwana oi na oku ka shiiva kutya aame Jehova,’ Omwene Omunamapangelo aeshe, Jehova, osho ta ti, ‘eshi handi ka yapulwa mokati keni moipafi yavo. 24 Ohandi ke mu kufa okudja moiwana noku mu ongela vali okudja moilongo aishe, ndele handi mu twala kedu leni. 25 Ohandi ke mu shamina omeva mayela, notamu ka kala mwa koshoka; ohandi ke mu koshola kokuhenoukoshoki kweni akushe nosho yo koikalunga yeni itondifa aishe. 26 Ohandi ke mu pa omutima mupe, nokutula meni leni omhepo ipe. Ohandi ka kufa momalutu eni omutima wemanya, noku mu pa omutima wombelela.* 27 Ohandi ka tula omhepo yange meni leni, nohandi ke mu ningifa mu ende pamaufomhango ange, notamu ka diinina nokuwanifa po omatokolo ange. 28 Opo nee otamu ka kala medu olo nda li nda pa ooxokulululwa, notamu ka ninga ovanhu vange, nohandi ka kala Kalunga keni.’

29 “‘Ohandi ke mu xupifa kokuhenoukoshoki kweni akushe, nohandi ka lombwela oilya i hapupale, noitandi ke mu etela ondjala. 30 Ohandi ka hapupalifa oiimati yomiti nosho yo oilikolomwa yomepya, opo muha mone vali oixuna omolwohoni yondjala mokati koiwana. 31 Opo nee otamu ka dimbuluka eendjila deni dii nosho yo oilonga yeni kutya kaya li iwa, notamu ke litonda nye vene omolwomatimba eni nomolwoilonga yeni itondifa. 32 Ashike shiiveni oshinima eshi: Itandi ningi oshinima eshi omolweni,’ Omwene Omunamapangelo aeshe, Jehova, osho ta ti. ‘Ponhele yaasho, kaleni mwa fya ohoni, nokukala mwa lengwa omolweendjila deni, nye eumbo laIsrael.’

33 “Eshi osho Omwene Omunamapangelo aeshe, Jehova, ta ti: ‘Mefiku olo handi ke mu koshola komatimba eni aeshe, ohandi ka ningifa oilando yeni i kalwe, noikulukuma yeni i tungululwe. 34 Edu olo la li la ninga eputu, omo keshe umwe oo a li ta ende mo te li tale, otali ka longwa. 35 Novanhu otava ka tya: “Edu olo la li la ninga eputu, ola ninga la fa oshikunino shaEden, noilando oyo ya li oikulukuma noya ninga ombuwa noya ngumaunwa po, paife oya pamekwa nohai kalwa.” 36 Noiwana, oyo ya xupa po ye mu dingilila, otai ka shiiva kutya ame mwene, Jehova, onda tunga osho sha li sha ngumaunwa po, nonda twika osho sha li sha ninga eputu. Ame mwene, Jehova, onde shi popya, nonde shi ninga.’

37 “Eshi osho Omwene Omunamapangelo aeshe, Jehova, ta ti: ‘Ohandi ka efa yo eumbo laIsrael li pule nge ndi li ningile oshinima eshi: Ohandi ka hapupalifa ovanhu valo ngaashi oufita. 38 Ngaashi oufita wovayapuki, ngaashi oufita waJerusalem* pefimbo loivilo yaye, oilando, oyo ya li ya ngumaunwa po, otai ka kala i yadi oufita wovanhu; nove na oku ka shiiva nokutya aame Jehova.’”