Eehamba eenhivali
2 Eshi Jehova a li pokukufa po Elia e mu twale keulu* e li moshikungulu shomhepo, Elia naElisa ova dja mo muGilgal. 2 Elia okwa tya kuElisa: “Alikana, kala apa, osheshi Jehova okwa tuma nge ndi ye kuBetel.” Ashike Elisa okwa ti: “Ohandi ane kuJehova, Kalunga omunamwenyo, kutya, ofimbo u na omwenyo, itandi ku efa nandenande.” Onghee ova ya kuBetel. 3 Opo nee ovanamati vovaprofeti* vomuBetel ove uya kuElisa, ndele tava ti kuye: “Ou shi shii ngoo kutya nena Jehova ota kufa po omwene woye? Omuwiliki woye ota kufwa po.” Onghee okwe va nyamukula, a ti: “Ondi shi shii nale. Mweneni.”
4 Elia okwa tya kuye: “Elisa, alikana, kala apa, osheshi Jehova okwa tuma nge ndi ye kuJeriko.” Ashike Elisa okwa ti: “Ohandi ane kuJehova, Kalunga omunamwenyo, kutya, ofimbo u na omwenyo, itandi ku efa nandenande.” Onghee ova ya kuJeriko. 5 Opo nee ovanamati vovaprofeti, ovo va li muJeriko, ova ya kuElisa, ndele tava ti kuye: “Ou shi shii ngoo kutya nena Jehova ota kufa po omwene woye? Omuwiliki woye ota kufwa po.” Onghee okwe va nyamukula, a ti: “Ondi shi shii nale. Mweneni.”
6 Elia okwa tya kuye: “Alikana, kala apa, osheshi Jehova okwa tuma nge ndi ye komulonga waJordan.” Ashike okwa ti: “Ohandi ane kuJehova, Kalunga omunamwenyo, kutya, ofimbo u na omwenyo, itandi ku efa nandenande.” Onghee aveshe ova ya. 7 Ovanamati vovaprofeti 50 navo ova ya nova li va fikama kokule kanini, tava tale, ofimbo Elia naElisa va fikama pomulonga waJordan. 8 Opo nee Elia okwa kufa oshikutu shaye shiwa nokwe shi tonya, ndele ta denge omeva, nomeva okwa li a tukauka pokati, amwe okwa ama kolumosho naamwe okolulyo. Onghee aveshe ova taulukila kombinga ikwao, va enda poukukutu.
9 Diva eshi va tauluka, Elia okwa tya kuElisa: “Pule nge osho wa hala ndi ku ningile, ofimbo inandi kufwa po pwoove.” Onghee Elisa okwa ti: “Alikana, nandi pewe oshitukulwa* shomhepo, oyo Kalunga e ku pa, lwomapa avali.” 10 Elia okwa nyamukula, a ti: “Owa pula nge oshinima shidjuu. Ngeenge owa mono nge, eshi handi kufwa po pwoove, oto ke shi ningilwa; ashike ngeenge ino mona nge, ito ke shi ningilwa.”
11 Ofimbo va li tava ende tava kundafana, ombadilila etemba, li na eholokepo la fa lomundilo, nosho yo eenghambe, di na eholokepo la fa lomundilo, oye va tukula pokati, na Elia okwa ya keulu* moshikungulu shomhepo. 12 Eshi Elisa a li ta tale, okwa ingida mokule ta ti: “Tate, tate! Etemba laIsrael novalondinghambe vaye.” Eshi a li ehe mu wete vali, okwa kwata oikutu yaye, ndele te i pombaula moitukulwa ivali. 13 Konima yaasho, okwa toola po oshikutu shiwa shaElia, osho sha wa mo, nokwa shuna, ndele ta fikama pomunghulo womulonga waJordan. 14 Opo nee okwa kufa oshikutu shiwa shaElia, osho sha wa mo, nokwa denga omeva, ndele ta ti: “Jehova, Kalunga kaElia, oku li peni?” Eshi a denga omeva, okwa tukauka pokati, amwe okwa ama kolumosho naamwe okolulyo, opo nee Elisa okwa tauluka.
15 Eshi ovanamati vovaprofeti vomuJeriko ve mu monena kokule, ova ti: “Omhepo yaElia oya ya muElisa.” Onghee ova ya ve ke mu shakeneke nove linyongamena pedu moipafi yaye. 16 Ova tya kuye: “Mokati kovapiya voye omu na ovalumenhu 50 ovanaenghono. Alikana, va pitika va ye va ka konge omwene woye. Otashi dulika omhepo yaJehova ye mu yelula po noye mu umbila kuimwe yomeemhunda, ile mulimwe lomomalufilu.” Onghee okwa tya kuvo: “Inamu va tuma.” 17 Ashike ova kala tave mu kondjifa, fiyo osheshi a fya ohoni, ndele ta ti kuvo: “Va tumeni.” Opo nee ova tuma ovalumenhu 50, ovo va kala tave mu kongo oule womafiku atatu, ndele inave mu mona. 18 Eshi va alukila kuElisa, ove mu hanga muJeriko. Opo nee okwa tya kuvo: “Inandi mu lombwela kutya inamu ya ko?”
19 Mokweendela ko kwefimbo, ovalumenhu vomoshilando ova tya kuElisa: “Omwene wetu oku wete kutya oshilando oshi li ponhele iwa; ashike omeva omai, nedu kali na omumeno.” 20 Okwa ti: “Etelei nge okayaxa kape, ndele tamu tula mo omongwa.” Onghee ove ke mu etela. 21 Opo nee okwa ya oko haku di omeva nokwa umbila mo omongwa, ndele ta ti: “Jehova okwa ti, ‘Onda koshola omeva aa. Itaa ka etifa vali efyo, ile a ningife ovakainhu vaha dale.’”* 22 Omeva oo okwa kosholwa fiyo okunena, ngaashi Elisa a popya.
23 Elisa okwa dja po opo, ndele ta i kuBetel. Ofimbo a li mondjila, moshilando omwa dja oumatyona vamwe nova hovela oku mu shinda, tava ti: “Dja po apa mongwala omo. Dja po apa mongwala omo.” 24 Xuuninwa, okwa piluka nokwe va tala, ndele te va fingi medina laJehova. Opo nee omamwangha avali omakadi, a dja mofuka, okwa nyanyaula po ounona ovo 42 moinhimbu. 25 Okudja opo okwa twikila nondjila yaye a finda komhunda yaKarmel, nokudja oko okwa shuna kuSamaria.