Ovanyasha — Otamu ka longifa ngahelipi onghalamwenyo yeni?

“O NDA hala okumona omauwa a shiya ko monghalamwenyo.” Osho okakadona kamwe keedula omulongo nasha ka ti. Kape na omalimbililo naave owa hala sha faafana. Ndelenee ongahelipi to mono “omauwa a shiya ko” monghalamwenyo? Oikundaneki nosho yo oomakula voye, tashi dulika nokuli novahongi voye, pamwe otava ti kutya omauwa oo otaa di mokulilongela oimaliwa ihapu nosho yo okuhafela omaifano onhumba a fimana—sha hala okutya, okukala we shi pondola!

Ndelenee Ombibeli otai londwele ovanyasha kutya okulalakanena okupondola kwopamaliko osha fa ashike ‘okushikula omhepo.’ (Omuudifi 4:4) Etomheno limwe olo kutya ovanyasha ashike vanini have shi pondola okumona oupuna netumbalo. Ovo have shi pondola luhapu ohava nyematekwa unene. Omunyasha umwe wokoBritania oo a lalakanena omaifano ehongo a fimana okwa ti: “Osha fa ashike oshipakete shi he na sha. Ngeenge owa tale meni, kamu na eshi shi li mo.” Doshili, peemhito dimwe oilonga otai dulu okweeta oupuna nokushiivika. Ndelenee itai dulu okuwanifa po ‘omhumbwe yoye yopamhepo.’ (Mateus 5:3, New World Translation) Kakele kaasho, 1 Johannes 2:17 ote tu londwele kutya “ounyuni otau xulu po.” Nokuli nongeenge owa li wa pondola mounyuni ou, otashi ka kala ashike okafimbo kaxupi.

Onghee hano, Omuudifi 12:1 ota ladipike ovanyasha ta ti: “Dimbulukwa Omushiti woye momafiku ounyasha woye.” Heeno, onghedi dingi okulongifa onghalamwenyo yoye oyo oku i longifa moilonga yaJehova Kalunga. Ndelenee tete, ou na okukala wa wana okukala moilonga yaKalunga. Ongahelipi to dulu oku shi ninga? Nonghalamwenyo yokulongela Kalunga oya kwatela mo shike?

Kala wa wana okuninga Ondombwedi yaJehova

Shotete, ou na okukulika ehalo lokulongela Kalunga—ndele ehalo la tya ngaho ihali uya kulo vene nokuli nonande ovadali voye ove li Ovakriste. Ou na okukala u na ekwatafano lopaumwene naJehova. Okakadona keedula omulongo nasha oka ti: “Okwiilikana otaku ku kwafele u kale u na ekwatafano lopaumwene naJehova.”—Epsalme 62:9; Jakob 4:8.

Ovaroma 12:2 otava divilike onghatu imwe oyo u na okukatuka. Otava ti: ‘Konakoneni ehalo laKalunga lilipi, naashi shiwa, sha wapalela nosha wana.’ Mbela owa li ngoo nale wa limbililwa koinima oyo wa li wa hongwa? Hano shikula ekumaido lOmbibeli ‘nokukonakona’ ngeenge oinima oyo oyoshili. Konga ouyelele kwoove mwene. Lesha Ombibeli nosho yo oileshomwa ye likolelela kOmbibeli. Nande ongaho, okulihonga kombinga yaKalunga kashi fi ashike oshinima shi na ko nasha neendunge. Mona efimbo lokudilonga osho wa lesha opo shi ningine momutima woye wopafaneko. Eshi otashi ka kulika ohole yoye yokuhola Kalunga.—Epsalme 1:2, 3.

Mokutwikila ko, kendabala okutukula navamwe osho to lihongo peemhito inadi lilongekidwa, tashi dulika novanafikola vakweni. Okuudifa eumbo neumbo oyo onghatu ya shikula ko. Otashi dulika omafimbo nomafimbo to shakeneke ovanafikola vakweni eshi to udifa notashi dulika potete shi ku tilife. Ndelenee Ombibeli otai tu ladipike tu ha ‘fye ohoni evangeli.’ (Ovaroma 1:16) Oto twala etumwalaka lomwenyo nosho yo leteelelo! Omolwashike u na oku li fya ohoni?

Ngeenge ovadali voye ove li Ovakriste, otashi dulika ho i nale navo moilonga yokuudifa. Ndele mbela oto dulu okuninga shihapu shi dulife ashike okufikama pomuvelo wa mwena ile tashi dulika to yandje oifo noufo vanini? Mbela oto dulu okupopya peumbo ove mwene, to longifa Ombibeli okuhonga omuneumbo? Ngeenge hasho, hano mona ekwafo lonhumba kovadali voye ile koshilyo sheongalo sha pyokoka. Shi ninga elalakano loye okukala wa wana u li omuudifi wonghundana iwa ina ninginifwa.

Konima yefimbo, oto ke linyengifwa u liyapulile Kalunga—to mu udanekele kutya oto ke mu longela okudja paife nokuyuka komesho. (Ovaroma 12:1) Ndelenee, eliyapulo kali fi ashike oshinima shopaumwene. Kalunga ota pula aveshe va ‘hepaulule nokanya omolwokuxupifwa.’ (Ovaroma 10:10) Pefimbo leninginifo, tete oho ningi ehepaululo leitavelo loye nokanya. Eninginifo momeva tali shikula ko. (Mateus 28:19, 20) Doshili, eninginifo olo onghatu ya kwata moiti. Ndele ino li kaleka molwaashi wa tila kutya oto ka ponya. Ngeenge owe lineekela muKalunga omolwokupamekwa, ote ke ku pa “eenghono di dule odo dopaushitwe” oku ku kwafela u fikame wa pama.—2 Ovakorinto 4:7, NW; 1 Petrus 5:10.

Pefimbo leninginifo, oto ningi umwe womEendombwedi daJehova. (Jesaja 43:10) Eshi oshi na okukala shi na enwefemo linene langhee to ka longifa onghalamwenyo yoye. Eliyapulo ola kwatela mo ‘okulixupula ove mwene.’ (Mateus 16:24) Otashi dulika to ka efa omalalakano nomahalo amwe opaumwene ‘nokukonga tete ouhamba waKalunga.’ (Mateus 6:33) Kungaha, eliyapulo neninginifo otali yeulula eemhito dihapu oku shi ninga. Natu tale kudimwe domudo.

Eemhito dokulongela Kalunga efimbo liyadi

● Oukokolindjila oo umwe womeemhito da tya ngaha. Omukokolindjila oye Omukriste a ninginifwa e shii okuhopaenenwa oo e lilongekida okulonga eevili 70 omwedi keshe ta udifa onghundana iwa. Okukala efimbo lile moilonga yomomapya otashi ke ku kwafela u kulike ounghulungu woye wokuudifa nowokuhonga vamwe. Ovakokolindjila vahapu ova mona ehafo mokukwafela ovakonakonimbibeli vavo va ninge Eendombwedi da ninginifwa. Mbela oilonga ilipi yokulikongela omboloto tai dulu okukala itunhula notai mbilipaleke ngaashi oukokolindjila?

Okufuta eefuto davo donghalamwenyo, ovakokolindjila vahapu ove na oilonga yokulikongela omboloto yetatafiku. Vahapu otava ningi omalongekido omolwoshilonga eshi mokulihonga oilonga yokulonga nomake kofikola ile kovadali vavo. Ngeenge ove nosho yo ovadali voye omu udite kutya otashi ka kala shi li nawa kwoove u mone edeulo limwe la wedwa po konima yosekundofikola, shilipaleka opo elinyengotomheno loye li ha kale okumona oimaliwa ihapu, ndele okuyambidida oukalele woye tashi dulika u longe u li omukalele wefimbo liyadi.

Ndelenee, osho sha fimana monghalamwenyo yomukokolindjila, kashi fi oilonga yaye yokulikongela omboloto ndelenee oukalele waye—okukwafela vamwe va mone omwenyo waalushe. Omolwashike ito ningi oukokolindjila elalakano loye lopaumwene? Oukokolindjila luhapu ohau twala komaufembanghenda amwe. Pashihopaenenwa, ovakokolindjila vamwe ova tembukila koitukulwa oko ku na omhumbwe ya kula yovaudifi vOuhamba. Vamwe ove lihonga elaka loshinailongo nokulonga nokuli meongalo lopuvo omo hamu popiwa elaka loshinailongo ile nokuli moshilongo shi he fi shavo. Heeno, oukokolindjila oo onghalamwenyo i na ondjabi!

● Ofikola yOkudeula Ovaudifi vOuhamba oi li natango omhito imwe oyo ye ku yeulukila. Ofikola oyo yemweedi mbali oya nuninwa okudeula ovakokolindjila va pyokoka ovo ve na ehalo lokutembuka mo oitukulwa yavo noku ka longa keshe oko ku na omhumbwe. Paulelalela otava ti “Aame ou, tume nge!” tava hopaenene Omuudifi munene oo a li kombada yedu, Jesus Kristus. (Jesaja 6:8; Johannes 7:29) Oku kala kokule neumbo otashi dulika ku kwatele mo okukala nonghalamwenyo i li lela paunafangwa. Otahi dulika eputuko, onghalo yomhepo noikulya yaako to ka longela ya yooloka ko filufilu kwaayo wa ikilila. Otashi dulika yo wa pumbwa okulihonga elaka lipe. Ofikola oyo otai ka kwafela ovamwatate novamwameme inava hombolwa nosho yo ovalihomboli, vomido okudja po 23 fiyo 65, va kulike omaukwatya opaKriste oo tava ka pumbwa opo va wanife po oshilonga shavo nova kale ve na owino oo tau ke va kwafela va dule okulongifwa pauyadi kuJehova nokehangano laye.

● Oilonga yaBetel oya kwatela mo okulonga u li omuliyambi kuimwe yomoitaimbelewa yEendombwedi daJehova. Oilyo imwe youkwaneumbo waBetel ohai longo sha yukilila mokunyanyangida oishangomwa yOmbibeli. Vamwe ova pewa oinakuwanifwa yokukwafela, ngaashi okukaleka po omatungo noilongifo ile okufiloshisho eemhumbwe dopalutu doukwaneumbo waBetel. Oinakuwanifwa aishe oi li omaufembanghenda mayapuki okulongela Jehova. Kakele kaasho, ovo ve li moilonga yaBetel ove na ehafo lokushiiva kutya, kutya nee otava longo shike, otashi kwafele ovamwatate vahapu mounyuni aushe.

Omafimbo amwe ovamwatate ovo ve na omaunghulungu e likalekelwa ova shivwa va ka longe koBetel. Ndelenee vahapu ohava mono edeulo lavo ngeenge va ya ko. Ovo ve li koBetel ihava longo molwokulikola omaliko ndele ova wanenwa komafiloshisho oo tava filwa oshisho nao shi nasha noikulya, eenhele dokukala nosho yo oimaliwa inini omolwokufuta oipumbiwa yopaumwene. Omunyasha umwe e li oshilyo shoukwaneumbo waBetel okwa hokolola oilonga yaye monghedi ei ta ti: “Oiwa unene! Elandulafano kali fi lipu, ndelenee onda mona omanangeko noupuna mahapu okulonga omu.”

● Oilonga yokutunga otai pe omunhu omhito okukufa ombinga mokutunga oitaimbelewa nOmalupale Ouhamba. Ovaliyambi ovo hava ifanwa ovapiya vokutunga ovo hava kwavele moilonga yokutunga. Ei oi li oilonga iyapuki, ya faafana noilonga yaavo va tunga otembeli yaSalomo. (1 Eehamba 8:13-18) Omalongekido okufiloshisho ovapiya vokutunga okwa faafana naao oukwaneumbo waBetel. Ovamwatate novamwameme ava kave na tuu oufembanghenda okulonga moilonga ei yokutanga Jehova!

Longela Jehova nomutima aushe

Okulongela Jehova osho onghedi dingi okulongifa onghalamwenyo yetu. Omolwashike ito diladila okutula po elalakano lopaumwene okulongela Kalunga efimbo liyadi? Kundafana oilonga yefimbo liyadi novadali voye, ovakulunhuongalo vomeongalo leni nosho yo omupashukilishikandjo weni. Ngeenge owa halelela okuya koBetel, kOfikola Okudeula Ovaudifi vOuhamba, kala pokwoongala kwaavo va hala okuya ko, oko haku ningwa poyoongalele yoshitukulwa.

Doshili, haaveshe tava dulu okukala va wana ile tava dulu okulonga efimbo liyadi. Omafimbo amwe omaupyakadi oukolele, eenghalo dopaimaliwa nosho yo oinakuwanifwa youkwaneumbo ohai ngabeke osho omunhu ta dulu okuninga. Nande ongaho, Ovakriste aveshe ve liyandja ove na okupwilikina kelombwelo lOmbibeli olo tali ti: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mateus 22:37) Jehova ota pula u longe osho shiwa osho eenghalo doye tadi shi pitike u shi longe. Hano kutya nee onghalo yoye oi li ngahelipi, ninga okulongela Jehova oshinima sha fimana monghalamwenyo yoye. Tula po omalalakano opauteokratika oo taa dulu okuhangika. Heeno, “dimbulukwa Omushiti woye momafiku ounyasha woye”—noto ka nangekwa noupuna fiyo alushe molwoku shi ninga kwoye!