Mbela otu na okwiilikana

5 Pefimbo noponhele yokondadalunde?

OTASHI dulika wa mona kutya omalongelokalunga mahapu oo a unganekwa ohaa divilike kutya ovanhu ove na okwiilikanena meenhele dokwiilikanena nohaa tula po efimbo lokondadalunde mefiku lonhumba omo ovanhu ve na okwiilikana. Mbela Ombibeli oya ti kutya ovanhu ove na ashike okwiilikanena meenhele donhumba nopefimbo lonhumba?

Ombibeli otai ti kutya ope na eemhito donhumba odo tadi wapalele okwiilikana. Pashihopaenenwa, Jesus okwa li a pandula Kalunga okupitila meilikano fimbo va li inava lya novashikuli vaye. (Lukas 22:17) Ovahongwa vaye ova li yo hava ilikana ngeenge va ongala pamwe omolwelongelokalunga. Kungaho, ova li va landula onghedindjikilile oyo ya kala hai longifwa moinagoga yOvajuda nosho yo motembeli yomuJerusalem. Kalunga okwa li a lalakanena otembeli i kale “ongulu yeilikano yovanhu aveshe.” — Markus 11:17.

Ngeenge ovapiya vaKalunga va ongala notava ilikana pamwe, omaindilo avo otaa dulu okweetifa oidjemo iwa. Jehova oha kala a hafa ngeenge ovapiya vaye va ongala ve li ongudu ve na ediladilo limwe, nongeenge tava ilikana metwokumwe nomifikamhango daye dopamishangwa. Eilikano la tya ngaho otashi dulika nokuli li mu linyengife a ninge oshinima osho tashi dulika ngeno ine shi ninga. (Ovaheberi 13:18, 19) Eendombwedi daJehova odi na onghedindjikilile yokwiilikana pokwoongala kwado. Onghee hano, oto shivwa nefimaneko u ye kOlupale lOuhamba olo li li popepi naave, ndele to i u ke liudile ko komailikano a tya ngaho ove mwene.

Ndele Ombibeli inai tya kutya ovanhu ove na ashike okwiilikanena ponhele yonhumba ile pefimbo lonhumba. MOmbibeli omu na omailikano ovapiya vaKalunga ovo va li va ilikana pefimbo nopeenhele da yoolokafana. Jesus okwa ti: “Ngenge to ilikana, inda monduda yoye, idila po oshivelo shoye, u ilikane Xo, ou ha [kala] meholeko; ndele Xo ha mono meholeko, ote ku futu moipafi.” — Mateus 6:6.

Olo kali fi tuu eshivo litunhula! Oto dulu okupopya nOmunamapangelo weshito alishe efimbo keshe, ito shi ningi moipafi, ndele ou na oushili kutya ota ka pwilikina komailikano oye. Onghee hano, itashi kumwifa eshi peemhito dihapu Jesus a li ha ka ilikana oye aeke. Pomhito imwe, Jesus okwa li a ilikana kuKalunga oufiku aushe, tashi ulike kutya okwa li ta kongo ewiliko omolwetokolo la fimanenena olo a li e na okuninga. — Lukas 6:12, 13.

MOmbibeli omu na yo omahokololo ovalumenhu novakainhu ovo va li va ilikana fimbo inava ninga omatokolo a kwata moiti ile eshi va li va taalela omashongo manene. Omafimbo amwe, ova li va ilikana pombada, nefimbo limwe, ova li va ilikana melimweneneno; nova li yo hava ilikana ngeenge ve li ongudu ile ngeenge ve li ovo aveke. Ndele osho sha fimana oshosho kutya ova li hava ilikana. Kalunga okwa shiva nokuli ovapiya vaye a ti: “Ilikaneni mu he nedimbuko.” (1 Ovatessaloniki 5:17) Kalunga okwa halelela alushe okupwilikina komailikano aavo hava longo ehalo laye. Mbela olo kali fi eshivo lopahole?

Oshoshili kutya mounyuni wokunena omo mu na ovanhu vehe na eitavelo, vahapu kave wete ngeenge eilikano oshinima sha fimana shili. Otashi dulika u pule kutya: ‘Okwiilikana oku na ngoo shili ekwafo lasha?’

[Eendjovo dididilikwedi pepandja 9]

Ohatu dulu okwiilikanena ponhele keshe nopefimbo keshe