Nghee ounona ve na okuhongwa kombinga yaKalunga — Eenghedi dilipi hadi pondola?

‘Eendjovo edi ame handi ku lombwele nena nadi kale momutima woye, ndele ove u noku di findila movana voye noku di tonga fimbo u li omutumba meumbo loye ile fimbo u li mondjila nongeenge to ka nangala nongeenge to penduka.’ — DEUTERONOMION 6:6, 7.

OVADALI efimbo limwe otashi dulika va kale ve udite va wililwa po koshinakuwanifwa shokutekula ovana vavo. Ndele ngeenge tava kongo omayele, otashi dulika va lyalyakanifwe komaetepo mahapu a yoolokafana oo tava udu ile tava lesha. Ovapambele nosho yo ookaume luhapu ohava ningi diva omaetepo avo. Omambo, oifo nosho yo eenhele dokointaneta ohadi yandje omayele taa twikile oo omafimbo amwe haa kala taa kondjifafana.

Mepingafano naasho, Ombibeli itai yandje ashike omayele e shii okulineekelwa kovadali e na sha naasho ve na okuhonga ovana vavo ndele otai yandje yo ewiliko tali longo li na sha nanghee ve na oku va honga. Ngaashi sha ulikwa mOmbibeli movelishe oyo ya tumbulwa pombada, ovadali ova pumbwa okukonga efimbo efiku keshe opo va popye novana vavo kombinga yaKalunga. Apa otapa landula omaetepo ane a kanghamena kOmbibeli oo a kwafela ovadali omayovi va honge ovana vavo kombinga yaKalunga.

1. Honga ovana voye kombinga yaasho tava dulu okulihonga meshito. Omuyapostoli Paulus okwa popya shi na sha naKalunga a ti: “Oinima i he wetike kokutya, eenghono daye daalushe noukalunga waye, otai monika nawa moilonga yaye okudja keshito lounyuni, ngenge tai konakonwa, opo va kale ve he na elipopilo.” (Ovaroma 1:20) Ovadali otava dulu okuninga shihapu va kwafele ovana vavo va ude ko kutya Kalunga Omunhu wolela mokuyandja elitulemo koilonga yaKalunga yeshito nokukwafela ovana vavo va mone kutya eshito otali holola omaukwatya aKalunga elipi.

Jesus okwa li a longifa onghedi oyo yokuhonga eshi a li ta hongo ovahongwa vaye. Pashihopaenenwa, okwa ti: “Taleni eedila dokeulu: ihadi kunu, do ihadi teya, ndele ihadi tuvikile momaanda, ndelenee Xo yeni meulu ohe di palula. Hanye ovo mu di dule unene?” (Mateus 6:26) Pomhito opo Jesus okwa li a divilika omaukwatya aJehova ngaashi ohole nolukeno. Ndele okwa li a ninga shihapu shi dulife pwaasho. Okwa li a kwafela ovahongwa vaye va konakone nghee Kalunga ha ulikile ovana vaye omaukwatya oo.

Ohamba inaendunge Salomo oya li ya popya kombinga younongo wopaushitwe oo Kalunga a pa oufelepuka noya li ya longifa oishitwa oyo inininini opo i divilike oshilihongomwa sha fimanenena. Oya ti: “Omundede ove, inda kokafelepuka, u tale eendjila dako u mone eendunge! Ko ke he nomupiti wokomesho, nomupashukili ile omupangeli, ndelenee ko take lilongele omungome wako mokulombo, eendya dako ke di tuvikile mefimbo lokufu.” (Omayeletumbulo 6:6-8) Kai fi tuu onghedi tai pondola yokuhonga shi na sha nanghee hatu dulu okulitulila po omalalakano a fimana nokulongifa eenghono odo twa pewa kuKalunga opo tu a hange!

Ovadali otava dulu okulandula oshihopaenenwa shaJesus naSalomo shokuhonga nomupondo mokuninga oinima tai landula: (1) Okupula ovana vavo kutya oimeno noinamwenyo ilipi ve hole. (2) Okulihonga nokushiiva shihapu kombinga yoimeno nosho yo oinamwenyo oyo. (3) Okukwafela ounona va mone osho tava dulu okulihonga kombinga yaKalunga mokutala koinima oyo a shita.

2. Hopaenena etaleko laJesus li na sha naavo a honga. Movanhu aveshe va li ko nale, Jesus oye a li e na sha sha fimanenena okupopya. Ndele nande ongaho, okwa li a longifa efimbo laye lihapu mokupula omapulo. Okwa li e na ohokwe inene mwaasho ovo a li a honga tava diladila nosho yo omaliudo avo. (Mateus 17:24, 25; Markus 8:27-29) Sha faafana, ovadali ove na oilihongomwa ihapu ya fimana okuhonga ovana vavo. Ndele opo va pondole, ove na okuhopaenena Jesus nokuladipika ovana vavo va popye omaliudo avo va manguluka.

Ongahelipi ngeenge ounona otava ulike oikala ii ile otava ende kanini okulihonga oilihongomwa imwe ya fimanenena? Tala kunghee Jesus a li a ungaunga novayapostoli. Pomhito imwe, opa li pa holoka eemhata da kwata moiti mokati kovayapostoli nova li tava ende kanini mokulihonga ouwa oo hau di mokukala ovalininipiki. Ndele nande ongaho, Jesus okwa li e ve lididimikila nokweendulula lwoikando kutya ova pumbwa okukala ovalininipiki. (Markus 9:33, 34; Lukas 9:46-48; 22:24, 25) Ovadali ovo tava hopaenene Jesus otava ka pukulula ovana vavo nelididimiko nokweendulula oshilihongomwa sha faafana ngeenge osha pumbiwa fiyo osheshi ounona va uda ko filufilu efimano lasho.a

3. Honga okupitila moshihopaenenwa. Ovadali otava ningi nawa ngeenge ova pwilikine komayele omuyapostoli Paulus oo a li a pa Ovakriste vokuRoma, a ti: “Ongahelipi hano, ove ou ho longo ovanhu, iho lilongo oove mwene; ho udifa va ha vake, ndele ove ho vake.” — Ovaroma 2:21.

Omayele oo okwa fimana molwaashi ounona luhapu ohava kumwa kwaasho ovadali tava ningi shi dulife osho tava popi. Oshoshili kutya ovadali ovo hava tula moilonga osho hava hongo luhapu ovana vavo ohava pwilikine kwaasho tave va hongo.

4. Hovela okuhonga ounona voye fimbo vanini. Timoteus, omulongi pamwe nomuyapostoli Paulus moilonga youtumwa, okwa li e na edina liwa momudingonoko wavo. (Oilonga 16:1, 2) Etomheno limwe olo le mu ningifa a kale e na edina liwa ololo kutya okwa li a hongwa ‘omishangwa diyapuki okudja kounona.’ Ina yaTimoteus nainakulu kava li ashike have mu leshele Omishangwa ndele ova li yo ve mu kwafela a konakone eeshili odo di li mo. — 2 Timoteus 1:5; 3:14, 15.

Openi to dulu okumona ekwafo?

Eendombwedi daJehova oda nyanyangida oileshomwa ihapu oyo ya nuninwa kondadalunde okukwafela ovadali va honge ovana vavo oshili kombinga yaKalunga. Imwe oya nyanyangidwa nelalakano lokukwafela ounona vanini. Imwe vali otai dulu okukwafela ovadali va dule okukala hava kundafana va manguluka novana vavo vomido omulongo nasha.b

Oshoshili kutya fimbo ovadali inava honga ovana kombinga yaKalunga ova pumbwa okushiiva omanyamukulo komapulo amwe madjuu oo tashi dulika ounona va pule. Pashihopaenenwa, oto ka nyamukula ngahelipi omapulo ngaashi aa taa landula apa: Omolwashike Kalunga a efa okumona oixuna ku kale po? Elalakano laKalunga olashike li na sha nedu? Oonakufya ove li peni? Eendombwedi daJehova otadi ka kala da hafa oku ku kwafela u lihonge omanyamukulo komapulo oo nosho yo amwe opo ove noukwaneumbo woye mu dule okweehena popepi naKalunga. — Jakob 4:8.

[Omashangelo opedu]