Jehova oku ku shii ngoo?
“Omwene ava vaye oku va shii.” — 2 TIM. 2:19.
1, 2. (a) Oshike osho Jesus a li a lenga neenghono? (b) Omapulo elipi hatu ka kundafana moshitukulwa eshi?
EFIKU limwe, Omufarisai umwe okwa li e uya kuJesus nokwe mu pula a ti: “Oshipango shinene shomomhango oshilipi po?” Okwe mu nyamukula a ti: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mat. 22:35-37) Jesus oku hole Xe yomeulu neenghono, nonghedi yaye yokukalamwenyo oya li filufilu metwokumwe neendjovo odo. Okwa li yo a lenga neenghono ekwatafano laye naJehova, nonghedi yaye yokukalamwenyo oya li ya ulika kutya okwa li a kanyatela oudiinini mokukalamwenyo kwaye akushe. Onghee hano, okafimbo kanini fimbo Jesus ina fya, okwa li a dula okupopya kutya Kalunga oku shii kutya oha dulika filufilu koipango yaye. Kungaho, Jesus okwa li e likaleka mohole yaKalunga. — Joh. 15:10.
2 Kunena, ope na ovanhu vahapu ovo have liti kutya ove hole Kalunga, tashi dulika nafye twa kwatelwa mo. Ndele osha fimanenena okulipula kutya: ‘Mbela Jehova oku shii nge ngoo? Oha tale nge ko ngahelipi? Mbela onda shiivika ngoo kutya ame ondaye?’ (2 Tim. 2:19) Oshi li lela oufembanghenda okukala tu shii kutya ohatu dulu okukala tu na ekwatafano lopofingo nOmunamapangelo weshito alishe.
3. Omolwashike vamwe hava kala va limbililwa shi na sha nongeenge otava dulu ngoo okukala vaJehova, noshike tashi dulu oku va kwafela va kondjife okudiladila kwa tya ngaho?
3 Ohashi kala shidjuu kuvamwe ovo ve hole Jehova nohole yomoule okwiitavela kutya ota ka kala e va shii. Vamwe ohava kala ve udite kutya kave na ongushu, nomolwaasho ohava tomhafana kutya itava dulu okukala vaJehova. Ndele itashi hafifa tuu okushiiva kutya Jehova ohe tu tale ko monghedi ya yooloka ko kuyetu? (1 Sam. 16:7) Omuyapostoli Paulus okwa li a lombwela Ovakriste vakwao a ti: “Ou e hole Kalunga, oye a shiivika kuye.” (1 Kor. 8:3) Ohole yokuhola Kalunga oyo oshiteelelwa sha fimana shokukala twa shiivika kuye. Ndele lipula kutya: Mbela omolwashike handi lesha oshifo eshi? Omolwashike handi ningi eenghendabala dokulongela Kalunga nomutima wange aushe, nomwenyo wange aushe, neendunge dange adishe neenghono dange adishe? Ngeenge owe liyapulila Kalunga nowa ninginifwa, mbela oshike sha li she ku linyengifa u katuke eenghatu da tya ngaho? Ombibeli oya yelifa kutya Jehova oo ha konakona omitima, oye ha shilile ovanhu kuye ovo tava faafanifwa nomamona. (Lesha Haggai 2:7; Johannes 6:44.) Onghee hano, oto dulu okufika pexulifodiladilo kutya oho longele Jehova molwaashi oye e ku shilila kuye. Jehova ke na efiku a fiye po ovo a shilila kuye ngeenge ova kala ovadiinini. Ohe va tale ko kutya ove na ondilo noku va hole neenghono. — Eps. 94:14.
4. Omolwashike tu na okukala hatu dilonga alushe kombinga yekwatafano letu naKalunga?
4 Ngeenge Jehova okwe tu shilile kuye, otu na okukala twa fya oshisho opo tu likaleke mohole yaye. (Lesha Judas 20, 21.) Ndele ino dimbwa kutya Ombibeli oya ti kutya ohatu dulu okufiya po ile okuliteeka Kalunga. (Heb. 2:1; 3:12, 13) Pashihopaenenwa, didilika kutya fimbo omuyapostoli Paulus ina popya eendjovo odo tadi hangwa 2 Timoteus 2:19, okwa li a tumbula Himeneus naFiletus. Oumbangi otau ulike kutya ovalumenhu ovo vavali ope na efimbo limwe va li vaJehova, ndele ova ka fiya po oshili. (2 Tim. 2:16-18) Dimbuluka yo kutya momaongalo omuGalatia namo omwa li vamwe ovo va li va shiivika kuJehova, ashike inava twikila okweenda mouyelele woshili. (Gal. 4:9) Onghee hano, inatu kwateni nande okahetengi ekwatafano le likalekelwa olo tu na naKalunga ketu!
5. (a) Omaukwatya amwe elipi oo Kalunga a lenga neenghono? (b) Oihopaenenwa ilipi hatu ka kundafana moshitukulwa eshi?
5 Ope na omaukwatya amwe oo Jehova a lenga neenghono. (Eps. 15:1-5; 1 Pet. 3:4) Pashihopaenenwa, ovanhu vamwe ovo va shiivika kuKalunga ova li ve na eitavelo la tongomana nosho yo elininipiko. Natu ka taleni koihopaenenwa ivali yovalumenhu ovo va li ve holike kuJehova molwaashi va li ve na omaukwatya oo. Ohatu ka tala yo koshihopaenenwa shomulumenhu umwe oo a li ta diladila kutya okwa shiivika kuKalunga ndele ka li vali a hokiwa kuYe molwaashi okwa li e na ounhwa. Ohatu dulu okulihonga mo oilihongomwa ya fimanenena moihopaenenwa ya tya ngaho.
Abraham oxe yaavo ve na eitavelo
6. (a) Abraham okwa li a ulika ngahelipi kutya okwa itavela momaudaneko aJehova? (b) Jehova okwa li a shiiva Abraham meityo lilipi?
6 Abraham okwa li omulumenhu oo a ‘itavela mOmwene’ nokwa li yo a ifanwa “xe yaaveshe ava hava itavele.” (Gen. 15:6; Rom. 4:11) Molwaashi Abraham okwa li e na eitavelo, okwa li a fiya po eumbo laye, ookaume kaye nosho yo oiniwe yaye ndele ta i koshilongo shokokule. (Gen. 12:1-4; Heb. 11:8-10) Abraham okwa kala e na eitavelo la kola, naasho oshe ke limonikila mo nokuli nokonima yomido dihapu eshi a li a dulika kelombwelo laKalunga li na sha ‘nokuyandja Isak eyambo.’ (Heb. 11:17-19) Molwaashi Abraham okwa li a ulika kutya okwa itavela momaudaneko aKalunga, Kalunga okwa li e mu tala ko monghedi ye likalekelwa nokwa li e mu shii filufilu. (Lesha Genesis 18:19.) Jehova ka li ashike a shiiva Abraham, ndele okwa li yo e mu tala ko e li kaume kaye. — Jak. 2:22, 23.
7. Oshike shididilikwedi shi na sha nokuwanifwa kwomaudaneko oo Jehova a li a udanekela Abraham, naasho osha li sha kuma Abraham ngahelipi?
7 Shididilikwedi, Abraham ka li a pewa edu olo a li a udanekelwa noka li a mona nghee oludalo laye la ka hapupala ngaashi “eheke pomunghulo wefuta.” (Gen. 22:17, 18) Abraham okwa kala e na eitavelo la kola muJehova, nokuli nonande omaudaneko oo kaa li a wanifwa pefimbo lokukalamwenyo kwaye. Okwa li e shii kutya Kalunga oha wanifa po alushe omaudaneko aye, nonghedi yaye yokukalamwenyo oya li metwokumwe naasho a li a itavela. (Lesha Ovaheberi 11:13.) Mbela nafye Jehova okwe tu shiiva ngoo tu na eitavelo la fa laAbraham?
Ulika kutya owa itavela muJehova mokukala u na oikala yokuteelela
8. Oinima imwe ilipi oyo ovanhu hava kala va hala okuwanifilwa mokukalamwenyo kwavo?
8 Otashi dulika pe na oinima yonhumba oyo twa kala twa halelela i ningwe mokukalamwenyo kwetu. Oshi li paushitwe noinashi puka okukala wa hala okuhombola ile okuhombolwa, okudala ounona nokukala u na oukolele muwa. Ndele nande ongaho, vahapu otashi dulika inava wanifilwa natango oinima yonhumba oyo va kala va hala. Ngeenge nafye otu li monghalo ya tya ngaho, onghedi omo hatu ungaunga nayo oyo tai ka ufa kutya otu na eitavelo li fike peni.
9, 10. (a) Ovanhu vamwe ohava ningi eenghendabala dilipi opo va wanife po omahalo avo? (b) Oho kala u udite ngahelipi shi na sha nokuwanifwa kwomaudaneko aKalunga?
9 Itashi ka kala tuu sha nyika oulai okuninga eenghendabala tu wanife po omahalo a tya ngaho monghedi oyo ihe li metwokumwe nounongo wopakalunga! Ngeenge otwa ningi ngaho, ohatu ka nyona po ekwatafano letu naJehova. Pashihopaenenwa, vamwe ohava hoolola omilandu douhaku odo di li omhinge nomayele oo twa pewa kuJehova. Vamwe ohava hoolola oilonga yokulikongela omboloto oyo hai va tukaula nomaukwaneumbo avo ile hai va imbi okukala pokwoongala kweongalo. Ile ongahelipi ngeenge owa kala u na oihole nomunhu oo ehe fi omwiitaveli? Ngeenge Omukriste okwa ningi oinima ya tya ngaho, mbela okwa hala ngoo shili okukala e shiivike kuJehova? Mbela Jehova okwa li ta ka kala e udite ngahelipi, ngeno Abraham ka li a teelela nelidiiniko okuwanifwa kwomaudaneko aYe? Ongahelipi ngeno Abraham okwa li a ninga oinima monghedi omo a hala opo a kale vali nonghalamwenyo ya fa yonale nokuliningila edina la tumbala ponhele yokuteelela muJehova? (Yelekanifa Genesis 11:4.) Mbela Jehova ngeno okwa twikila ngoo okukala e mu hokwa?
10 Oinima ilipi wa halelela i ningwe mokukalamwenyo kwoye? Mbela ou na ngoo eitavelo la kola shili olo tali ke ku kwafela u teelele muJehova oo a udaneka kutya ota ka wanifa po omahalo oye oo e li metwokumwe nehalo laye? (Eps. 145:16, NW) Ngaashi twe shi mona moshiningwanima shi na sha naAbraham, nafye otashi dulika pe na omaudaneko amwe oo twa udanekelwa kuKalunga ndele itaa ka wanifwa diva ngaashi twa hala. Ndele nande ongaho, Jehova okwa hala tu kale tu na eitavelo la fa laAbraham notu katuke metwokumwe neitavelo letu. Ngeenge otwa ningi ngaho, ohatu ka mona lela omauwa mahapu. — Heb. 11:6.
Eyooloko pokati kelininipiko nounhwa
11. Korah otashi dulika a li e na omaufembanghenda elipi, naasho otashi ulike kutya okwa li e na ekwatafano la tya ngahelipi naKalunga?
11 Moses naKorah ova li ve na etaleko la yoolokafana filufilu li na sha nanghee va li hava tale ko omalongekido aJehova nosho yo omatokolo aye. Eenghatu odo va li va katuka odo da li tadi ka ufa kutya Jehova ote ke va tala ko ngahelipi. Korah okwa li Omulevi Omukehati nokwa li e na omaufembanghenda mahapu. Pashihopaenenwa, otashi dulika a li umwe womwaavo va li va mona nghee Jehova a xupifa Ovaisrael eshi va li va taulula Efuta Litilyana. Otashi dulika a li yo a yambidida onghatu oyo Jehova a li a katukila Ovaisrael ovanashibofa pOmhunda yaSinai nokwa li ha kwafele mokuhumbata oshikefa shehangano. (Ex. 32:26-29; Num. 3:30, 31) Nopehe na omalimbililo, Korah okwa kala omudiinini kuJehova oule womido dihapu nomolwaasho a li a fimanekwa kOvaisrael vahapu.
12. Ngaashi sha ulikwa pepandja eti-28, ongahelipi ounhwa waKorah wa li wa kuma ekwatafano laye naKalunga?
12 Fimbo oshiwana shaIsrael sha li molweendo sha finda kEdu lEudaneko, Korah okwa li a fika pexulifodiladilo kutya melongekido laKalunga omwa li mu na sha shapuka. Opo nee, ovakwatelikomesho voshiwana shaIsrael vakwao vamwe ve fike po 250 navo ova li va yambidida ounashibofa waKorah, va li tava kendabala okweetifa po omalunduluko onhumba melongekido olo. Korah novalumenhu ovo ova li ve udite ouumbo molwaashi va li ve shii kutya ove na ekwatafano liwa naJehova. Opo nee, ova li va lombwela Moses tava ti: “Sha wana nee paife! Osheshi eongalo alishe vo aveshe ovayapuki. NOmwene oha kala mokati kavo!” (Num. 16:1-3) Ovalumenhu ovo kava li tuu ve na ounhwa nosho yo elineekelo muvo vene la pitilila! Moses okwa li e va lombwela a ti: ‘Omwene ota ka holola olyelye waye.’ (Lesha Numeri 16:5.) Korah novanashibofa vakwao aveshe ova ka dipawa kuJehova mefiku la ka landula ko. — Num. 16:31-35.
13, 14. Omeenghedi dilipi Moses a li a ulika kutya okwe lininipika?
13 Mepingafano naKorah, Moses okwa li “omulumenhu omulininipiki unene e dule ovanhu aveshe kombada yedu.” (Num. 12:3) Moses okwa li a ulika kutya omunanheni nomulininipiki, molwaashi okwa li ha ningi alushe oinima ngaashi Jehova e mu lombwela. (Ex. 7:6; 40:16) Ombibeli kai na apa ya popya kutya opa li efimbo limwe Moses a li ta kembaula onghedi yaJehova yokuninga oinima ile a handukila Jehova molwaashi e mu pula a landule omilandu daye. Pashihopaenenwa, Jehova okwa li a yandja omalombwelo okondadalunde kuMoses e na sha nanghee etwalihangano li na okutungwa, nokuli nomoinima ya nafangwa, ngaashi oluvala leengodi odo da li di na okuhondjifwa ofaila yetwalihangano nosho yo kutya ova li ve na okutyuula mo eembululu ngapi. (Ex. 26:1-6) Omafimbo amwe otashi dulika u handuke ngeenge owa pulwa u ninge oshinima shonhumba komupashukili umwe womehangano laJehova, ndele ou wete a fa e ku pa unene omalombwelo okondadalunde. Ashike Jehova oo e li omupashukili a wanenena, oha pe ovapiya vaye oinakuwanifwa nehalo liwa noha kala e ve lineekela. Onghee hano, Jehova oha kala e na omatomheno mawa ngeenge te tu pe omalombwelo mahapu okondadalunde. Ndele didilika kutya Moses ka li a handukila Jehova eshi a li e mu pa omalombwelo mahapu ngaho noka li yo ta diladila kutya Jehova okwe mu dina ile kutya okwe mu tala ko ehe na owino washa ile ta ngabeke emanguluko laye. Ponhele yaasho, Moses okwa li a shilipaleka kutya ovanailonga ‘ova ninga naanaa’ ngaashi Kalunga a li e mu lombwela. (Ex. 39:32) Moses ka li tuu omulininipiki! Okwa li a dimina kutya oilonga oyo a li ta longo oyaJehova nonokutya ye okwa li ashike ta wanifa po oshinakuwanifwa osho a pewa.
14 Moses okwa li yo a ulika kutya omulininipiki nokuli nopefimbo opo a li meenghalo dinyemateka. Pomhito imwe, Moses okwa li a nyengwa okupangela ehandu laye eshi a li ta ungaunga novanhu ovo va li tava ngongota nokwa li a dopa okufimanekifa Kalunga. Oshidjemo, Jehova okwa li a lombwela Moses kutya ita ka twala vali Ovaisrael mEdu lEudaneko. (Num. 20:2-12) Moses nomumwaina, Aron, ova kala tave lididimikile okungongota kwOvaisrael oule womido dihapu. Ndele molwaashi Moses okwa li a nyona pomhito ashike oyo, ka li ta ka mona oufembanghenda wokuhafela oinima oyo a kala a teelela nodjuulufi oule wefimbo lile. Ndele mbela okwa li e linyenga ngahelipi? Nonande Moses okwa li a nyemata kwaasho, okwa li a tambula ko nelininipiko etokolo laJehova. Moses okwa li e shii kutya Kalunga omuyuki noke na nande owidi washa. (Deut. 3:25-27; 32:4) Ndele ngeenge hatu diladila kombinga yaMoses kunena, mbela ihatu mu diladila e li omunhu oo a li a shiivika kuJehova? — Lesha Exodus 33:12, 13.
Okudulika koiteelelwa yaJehova ohaku pula elininipiko
15. Oshike hatu dulu okulihonga meenghatu odo Korah a li a katuka omolwounhwa?
15 Onghedi omo hatu linyenge ngeenge pa ningwa omalunduluko onhumba meongalo lopaKriste lomounyuni aushe nosho yo komatokolo oo haa ningwa kwaavo tave li kwatele komesho, ohai kumu ekwatafano letu naJehova. Korah novashikuli vaye ova li ve litukula ko kuKalunga molwokukala ve lineekela unene muvo vene, molwounhwa nomolwokuheneitavelo kwavo. Nonande Jehova oye a li ta wilike oshiwana shaye, Korah okwa li ta diladila kutya Moses oo a li omukulupe oye ashike a li ta ningi omatokolo aye mwene. Korah okwa li a dimbwa oushili oo, naasho oshe mu ningifa aha ulike kutya omudiinini kwaavo Kalunga a li ta longifa. Ngeno Korah okwa li a teelela Jehova oye a yukife oinima ile a ninge po omalunduluko onhumba ngeenge oku wete sha pumbiwa shili, ngeno ngaho okwa katuka pandunge. Ndele mepingafano naasho, Korah okwa li a nyona po ondjokonona yoilonga yaye youdiinini omolwounhwa.
16. Ongahelipi okuhopaenena oshihopaenenwa shaMoses shelininipiko taku ka kuma ekwatafano letu naJehova?
16 Ehokololo olo li na sha naKorah otali yandje elondwelo la kwata moiti kovakulunhuongalo kunena nosho yo kwaaveshe meongalo. Ndele ohashi pula elininipiko okuteelela muJehova nokudulika kewiliko laavo va nangekwa va kwatele komesho. Ndele mbela ohatu ulike ngoo kutya fye ovanambili novalininipiki ngaashi Moses? Otwa lenga ngoo onghandangala oyo tai danwa kwaavo tava kwatele komesho meongalo nokudulika kewiliko lavo? Ohatu pangele ngoo omaliudo etu ngeenge twa nyematekwa kuvamwe? Ngeenge osho, nafye ohatu ka kala shili tu shiivike kuJehova. Jehova ota ka kala etu hokwa ngeenge otwa kala ovalininipiki nohatu dulika kewiliko laye.
Jehova ava vaye oku va shii
17, 18. Oshike tashi dulu oku tu kwafela tu twikile okukala tu shiivike kutya otwaJehova?
17 Ohatu ka mona ouwa ngeenge otwa dilonga kombinga yaavo Jehova a li a shilila kuye nova li va hokiwa kuye. Abraham naMoses ova li ovanhu inava wanenena nova li hava ningi omapuko ve tu fa. Ndele nande ongaho, Jehova okwa li e va tala ko kutya ovaye. Ashike oshihopaenenwa shaKorah otashi ulike kutya ohatu dulu okuliteeka po Jehova noitatu ka kala vali twa hokiwa kuye. Onghee hano oshiwa okulipula kutya: ‘Mbela Jehova okwa tala nge ko ngahelipi? Oshike handi dulu okulihonga moihopaenenwa oyo tai hangwa mOmbibeli?’
18 Otashi hekeleke neenghono okushiiva kutya Jehova okwa hokwa ovanhu ovadiinini ovo a shilila kuye. Onghee hano, twikila okukulika omaukwatya ngaashi eitavelo, elininipiko nosho yo omaukwatya makwao oo tae ku ningifa u kale wa hokiwa kuye. Okukala twa shiivika kuJehova oku li shili oufembanghenda we likalekelwa notaku tu etele embilipalelo monghalamwenyo yetu yopaife notashi ke tu pefa yo omanangeko noupuna makumwifi monakwiiwa. — Eps. 37:18.
Oto dimbuluka?
• Ekwatafano le likalekelwa lilipi tali dulu okukala pokati koye naJehova?
• Ongahelipi to dulu okuulika kutya ou na eitavelo la fa laAbraham?
• Oshike hatu dulu okulihonga moshihopaenenwa shaKorah nosho yo shaMoses?
[Efano pepandja 26]
Ngaashi Abraham, mbela nafye otwa itavela kutya Jehova ota ka wanifa po filufilu omaudaneko aye?
[Efano pepandja 28]
Korah ka li a hala okudulika nelininipiko komalombwelo aJehova
[Efano pepandja 29]
Mbela owa shiivika ngoo kuJehova kutya ove omunhu oo ha dulika nelininipiko kewiliko laye?