Konakona Eendjovo daKalunga
Mbela Ombibeli oya xunganeka kombinga yonakwiiwa?
Oshitukulwa eshi osha kundafana omapulo oo tashi dulika ho lipula nao, nosha ulika opo to dulu okuhanga omanyamukulo mOmbibeli yoye. Eendombwedi daJehova otadi ka kala da hafa okukundafana naave omanyamukulo oo.
1. Ombibeli oya xunganeka ngoo oinima kondadalunde?
Kalunga Omunaenghono adishe oye aeke ta dulu okushiiva shihapu kombinga yonakwiiwa. (Amos 3:7) Pashihopaenenwa, okwa li a xunganeka okudja nalenale kombinga yokuuya kwaumwe oo a li ta ka ifanwa Messias ile Kristus. Messias okwa li ta ka dja moludalo lomulumenhu umwe omudiinini wedina Abraham. Okwa li ta ka ninga omupangeli oo ta ka pefa ovanhu ovaduliki omanangeko noupuna, mwa kwatelwa omwenyo waalushe nokuxulifa po omikifi. (Genesis 22:18; Jesaja 53:4, 5) Okwa xunganekwa kutya Omuudanekwa oo okwa li ta ka dalelwa muBetlehem. — Lesha Mika 5:1.
Jesus oye a li a ninga Messias Omuudanekwa. Omido da konda po 700, Ombibeli oya hangwa nale ya xunganeka kutya Messias ota ka dalwa kokakadona nota ka tondwa. Okwa li ta ka yamba po omwenyo waye opo ovanhu vahapu va dule okudiminwa po omatimba avo nokwa li kwa xunganekwa kutya ota ka pakwa pamwe noipuna. (Jesaja 7:14; 53:3, 9, 12) Omido da konda po 500, Ombibeli oya hangwa yo ya xunganeka kutya okwa li ta ka ya muJerusalem a londa kokandongi nonokutya ota ka kengelelwa noisilveri 30. Omaxunganeko aeshe oo okwa wanifwa shili. — Lesha Sakaria 9:9; 11:12.
2. Mbela Kalunga oha kala e shii kutya oinima yonhumba otai ka ningwa naini?
Omido da konda po 500, Ombibeli oya hangwa nale ya xunganeka kutya Jesus okwa li ta ka ninga Messias naini. Efimbo olo a li ta ka vaekwa a ninge Messias ola li la yelekwa paivikemido, “oshivike” keshe oshi fike pomido heyali. Koivikemido 7 kwa wedwa oivikemido 62 otai ningi oivikemido 69, sha hala okutya, omido 483. Mbela omido odo oda li da hovela naini? Ombibeli oya ti kutya omido odo oda hovela okudja eshi omupiya waKalunga, Nehemia, a li a fika muJerusalem nokwa hovela okutungulula oshilando osho. Ondjokonona yOvapersia otai ulike kutya omido odo oda li da hovela mo 455 K.O.P. (Nehemia 2:1-5) Jesus okwa ka ninginifwa e li Messias momudo 29 O.P., pa hangwa pa pita naanaa omido 483. — Lesha Daniel 9:25.
3. Mbela omaxunganeko Ombibeli amwe otaa wanifwa kunena?
Jesus okwa li a xunganeka oiningwanima itunhula oyo tai ningwa pefimbo letu. Exunganeko laye limwe ola popya shi na sha nokuudifwa kwonghundana iwa yOuhamba mounyuni aushe, oyo ya li tai ka etela ovanhu ovo ve hole Kalunga epepelelo. Ouhamba waKalunga otau ka xulifa po ounyuni ou woukolokoshi. — Lesha Mateus 24:14, 21, 22.
Omaxunganeko Ombibeli otaa yandje ouyelele muhapu kombinga yomafiku axuuninwa ounyuni ou. Oya xunganeka nale kutya ovanhu otava ka nyonauna edu, mepingafano naasho va kala va teelela oule womido. Kunena eenghalo dinyikifa oluhodi odo hadi etifwa koita, kondjala, komakakamo edu nokomikifi dolutapo otadi naipala ashike. (Lukas 21:11; Ehololo 11:18) Omifikamhango dopaenghedi nado otadi ende tadi xutuka neenghono. Ndele Ombibeli oya xunganeka nale kutya nonande eenghalo otadi ka kala didjuu, ovashikuli vaJesus otava ka udifila ovanhu vomoiwana aishe onghundana iwa yOuhamba waKalunga. — Lesha Mateus 24:3, 7, 8; 2 Timoteus 3:1-5.
4. Ovanhu ova tuvikililwa onakwiiwa ya tya ngahelipi?
Kalunga omunaenghono adishe okwa tuvikilila ovanhu ovadiinini oinima iwa. Omuvaekwa Jesus Kristus ota ka pangela kombada yedu okudja meulu pamwe novahoololwa vaye. Jesus novahoololwa vaye ovo va fikameka po epangelo laKalunga olo tali ka pangela oule womido eyovi. Ovafi navo otava ka nyumunwa notava ka pewa omhito va ulike ngeenge ova wana tuu okupewa omwenyo waalushe. Kakele kaasho, aveshe ovo tava ka ninga ovapangelwa vOuhamba otava ka velulwa. Omikifi nosho yo efyo otali ka xulifwa po. — Lesha Ehololo 5:10; 20:6, 12; 21:4, 5.
Opo u mone ouyelele wa wedwa po, tala epandja 23-25 nosho yo 197-201 lembo olo la Ombibeli otai hongo lela shike?, ulikwa opo.