Opa ningwa omalunduluko onhumba e na sha noshifo shokukonakonwa!
Paife oshifo shOshungonangelo yokukonakonwa osha unganekwa monghedi ihokwifa notashi ke tu kwafela tu ude ko nawa oshili yomEendjovo daJehova i na ondilo. — Eps. 1:2; 119:97.
Opa kala tapa nyanyangidwa oifo ivali yOshungonangelo oule womido nhee da pita, shimwe oshomoukalele, nashikwao osha nuninwa Eendombwedi daJehova nosho yo ovakonakonimbibeli ovo tava ningi exumokomesho.
Umwe oo a kala ta longele Jehova oule womido dihapu okwa popya shi na sha noshifo shokukonakonwa, a ti: “Efiku nda mona Oshungonangelo yotete yokukonakonwa, onda li nde i hokwa neenghono. Oshili yomoule oyo ya yelifwa moshifo osho nomautumbulilo oo a longifwa mo okwa kuma nge komutima. Onda pandula neenghono efiloshisho olo lipe la denga mbada.” Omumwatate umwe okwa ti: “Ohandi kala nda teelela nodjuulufi okukonakona Oshungonangelo oule weevili donhumba pamwe nOmbibeli yange yo-Reference.” Otwe lineekela kutya naave osho ho kala u udite ngaho.
Ngaashi tu shi shii nawa, Oshungonangelo oya kala tai nyanyangidwa okudja mo 1879, notwa dula ashike okukala hatu i nyanyangida omolwekwafo lomhepo yaJehova nomolwenangekonoupuna laye. (Sak. 4:6) Otwa kala yo hatu ningi po omalunduluko mahapu e na sha noshipeko shoshifo osho momukokomoko womido odo 133. Momudo 2012, koshipeko keshe shoshifo shokukonakonwa otaku ka kala haku kala efano liwa lovanhu tava udifa, olo tali tu dimbulukifa oilonga oyo twa pewa kuJehova yokuyandja oundombwedi nawanawa kombinga yOuhamba waye. (Oil. 28:23, yelekanifa no-NW.) Pepandja etivali loshifo osho otapa ka kala hapa kala efano la faafana naalo li li koshipeko notapa ka yelifwa pauxupi kutya ovo ve li mefano olo otava ningi shike nosho yo opo va fanekelwa. Omafano oo otae ke tu dimbulukifa momukokomoko womudo 2012 kutya oshiwana shaJehova otashi udifa onghundana iwa ‘mounyuni aushe.’ — Mat. 24:14.
Mbela opa ningwa vali omalunduluko amwe moshifo shokukonakonwa? Heeno! Pashihopaenenwa, okamhungu komapulo eendululo paife oka lundululilwa kehovelo loitukulwa yokukonakonwa. Osho otashi ke ku kwafela u mone kutya oitwa ya fimanenena ilipi u na okukonga eshi to lesha nokukonakona oshitukulwa keshe. Ndele nande ongaho, ovakwatelikomesho vekonakono lOshungonangelo natango otava dulu okukala hava longifa omapulo oo opo ku endululwe osho she lihongwa moshitukulwa keshe. Otamu ka didilika yo kutya omwaka oo hau kala kominghulo domapandja paife owa nenepekwa, neenomola doutendo nodomapandja oda ningwa da kula.
Ngaashi twe shi yelifa metetekelo, moshifo eshi omwa wedwa oshitukulwa shipe shedina, “Ouyelele wa fimanenena wondjokonona yEendombwedi daJehova,” osho tashi ka kundafana omalunduluko madidilikwedi oo a ningwa mondjokonona yEendombwedi daJehova dokunena. Oimoniwa yoohandimwe otai ka kala hai nyanyangidwa efimbo nefimbo mOshungonangelo koshi yoshipalanyole, “Ove liyandja nehalo liwa.” Ovamwatate novamwameme ovo hava longele koitukulwa oko ku na omhumbwe inene yovaudifi vOuhamba otava ka hokolola moitukulwa oyo kombinga yehafo newanenwo olo ve udite.
Natu lineekele kutya otamu ka hafela okukonakona Eendjovo daKalunga tamu longifa oshifo eshi.
Omunyanyangidi
[Efano pepandja 3]
1879
[Efano pepandja 3]
1895
[Efano pepandja 3]
1931
[Efano pepandja 3]
1950
[Efano pepandja 3]
1974
[Efano pepandja 3]
2008