Natu yambeleni Jehova omayambo taa di komutima!
“Keshe eshi tamu shi ningi, shi ningeni komitima deni nokulongela Omwene.” — KOL. 3:23.
KONGA OMANYAMUKULO OMAPULO AA MOSHITUKULWA:
Ongahelipi hatu dulu okufimanekifa Jehova okupitila momalipyakidilo etu efiku keshe?
Omayambo elipi hatu yambe mokulongela kwetu Kalunga?
Ongahelipi hatu dulu okuyambela Jehova oiniwe yetu?
1-3. (a) Yelifa kutya omolwashike okuvalelwa kwaJesus komuti womahepeko inashi hala okutya Jehova ina teelela vali tu ninge omayambo asha kunena. (b) Epulo lilipi la holoka po li na sha nomayambo okunena?
JEHOVA okwa li a hololela ovapiya vaye vopefimbo lovayapostoli kutya ekuliloyambo laJesus ola xulifa po Omhango yaMoses. (Kol. 2:13, 14) Omayambo nomaxwikiloyambo aeshe oo Ovajuda va kala hava yambe oule womido omafele kaa li va li a pumbiwa nokwa kanifa ongushu yao. Omhango yaMoses oya li ya wanifa po oshilonga shayo i li ngaashi ‘omutekuli wavo, te va twala kuKristus.’ — Gal. 3:24.
2 Ndele osho inashi hala okutya Ovakriste kava li va pumbwa okuyandja omayambo asha nandenande. Pashihopaenenwa, omuyapostoli Petrus okwa ti kutya Ovakriste ova pumbwa ‘okuyamba omayambo opamhepo a wapalela Kalunga omolwaJesus Kristus.’ (1 Pet. 2:5) Kakele kaasho, omuyapostoli Paulus naye okwa popya sha yela a ti kutya onghalamwenyo aishe yOmukriste oo e liyapulila Kalunga otai dulu okutalwa ko i li “eyambo.” — Rom. 12:1.
3 Onghee hano, Omukriste ota dulu okuyambela Jehova omayambo onhumba, kutya nee omoku mu pa oinima yonhumba ile omokweefa po oinima imwe omolwaye. Metwokumwe neudeko olo tu na li na sha noiteelelwa yOmhango oyo ya li hai wanifwa po kOvaisrael, mbela ongahelipi hatu dulu okumona kutya omayambo etu aeshe okwa hokiwa kuJehova kunena?
NATU YANDJENI OMAYAMBO EFIKU KESHE
4. Otu na okudimbuluka shike shi na sha nomalipyakidilo etu akeshe efiku?
4 Efimbo limwe otashi dulika shi kale shidjuu okuuda ko kutya omalipyakidilo etu akeshe efiku okwa kwatelwa mo momayambo oo hatu yambela Jehova. Oinima ngaashi oilonga yomeumbo, yokofikola, yokulikongela omboloto, oku ka landa oinima nosho yo ikwao ya yukila oko, otashi dulika i kale tai monika ya fa itai dulu okukuma ekwatafano letu naKalunga. Ndele ngeenge owe liyapulila Jehova ile wa hala oku ke mu liyapulila monakwiiwa i li popepi, dimbuluka kutya onghedi omo ho ningi oinima yakeshe efiku otai kumu ekwatafano loye naJehova. Molwaashi fye otu li Ovakriste efimbo keshe, otwa pumbwa okukala hatu tula moilonga omafinamhango Ombibeli mokukalamwenyo kwetu kwakeshe efiku. Onghee hano, omuyapostoli Paulus okwe tu ladipika a ti: “Keshe eshi tamu shi ningi, shi ningeni komitima deni nokulongela Omwene, hamunhu.” — Lesha Ovakolossi 3:18-24.
5, 6. Oshike tu na okudimbuluka ngeenge tashi uya pokudjala nopelihumbato letu lakeshe efiku?
5 Oshoshili kutya omalipyakidilo Omukriste akeshe efiku kae li oshitukulwa shoilonga iyapuki. Ndele eladipiko lomuyapostoli Paulus olo kutya keshe osho tamu shi ningi “shi ningeni komitima deni nokulongela Omwene,” oli na oku tu linyengifa tu diladile shi na sha nonghedi yetu aishe yokukalamwenyo. Ndele mbela ongahelipi hatu dulu okuninga ngaho pauhandimwe? Mbela ohatu lihumbata ngoo nokudjala alushe monghedi yefimaneko? Ile elihumbato nonghedi yoye yokudjala otai ke ku fifa ohoni okuliholola kutya ove oumwe womEendombwedi daJehova ngeenge u li momalipyakidilo oye akeshe efiku? Fye katu na nande okulihumbata monghedi ya tya ngaho! Ovapiya vaJehova otava ka henuka okuninga keshe osho tashi ka shekifa edina laye. — Jes. 43:10; 2 Kor. 6:3, 4, 9.
6 Paife natu ka taleni nghee okuninga keshe shimwe ‘nomitima detu nokulongela Omwene’ taku dulu okukuma eembinga di lili naku lili dokukalamwenyo kwetu. Eshi hatu konakona oinima oyo, natu dimbuluke kutya Ovaisrael ova li va teelelwa va yambele Jehova osho shiwaelela. — Ex. 23:19.
NGHEE OMAYAMBO A KUMA ONGHALAMWENYO YETU
7. Eliyapulo lOmukriste ola kwatela mo shike?
7 Eshi wa li wa tokola okuliyapulila Jehova, owa li we shi ninga uhe na nande omalimbililo asha, hasho mbela? Osho lelalela! Pomhito oyo, owa li wa udanekela Jehova kutya oto ka pitifa komesho okulonga ehalo laye monghalamwenyo yoye aishe. (Lesha Ovaheberi 10:7.) Etokolo olo wa ninga, ola denga mbada filufilu. Nopehe na omalimbililo, owa didilika kutya ohashi eta alushe oidjemo iwa ngeenge owa pitifa komesho ehalo laJehova nokuninga eenghendabala u katuke metwokumwe nalo. (Jes. 48:17, 18) Oshiwana shaKalunga oshiyapuki nohashi kala alushe sha hafa, molwaashi ohashi ulike omaukwatya Omuhongi washo, Jehova. — Lev. 11:44; 1 Tim. 1:11.
8. Omolwashike sha fimana okudimbuluka kutya Jehova okwa li ha tale ko omayambo Ovaisrael mayapuki?
8 Omayambo oo a li haa yambelwa Jehova kOvaisrael okwa li a talwa ko kutya omayapuki. (Lev. 6:25; 7:1) Oshitya shOshiheberi osho sha tolokwa “ouyapuki” otashi yandje ediladilo loshinima sha yoololwa mo, she likalekelwa ile sha yapulilwa Kalunga. Onghee hano, opo omayambo etu a kale a hokiwa kuJehova, oku na okukala e likalekelwa noinaa nyatekwa kounyuni ou. Kakele kaasho, katu na nande okukala tu hole oinima oyo Jehova e tonde. (Lesha 1 Johannes 2:15-17.) Osho osha hala okutya otu na okuhenuka eendafano keshe lii ile okukufa ombinga mukeshe osho tashi tu ningifa tu kale inatu koshoka koshipala shaKalunga. (Jes. 2:4; Eh. 18:4) Osho otashi ti yo kutya katu na nande okupitika omesho etu a kale taa tale oinima inai koshoka ile okukala twa hokwa okudiladila oinima ya nyata. — Kol. 3:5, 6.
9. Omolwashike sha fimana okukonakona onghedi omo hatu ungaunga navamwe?
9 Omuyapostoli Paulus okwa li a ladipika ovaitaveli vakwao a ti: ‘Inamu dimbwa okulonga ouwa nokutukula muayo mu i kwete, osheshi omayambo a tya ngaha Kalunga okwe a hokwa.’ (Heb. 13:16) Hano ngeenge otwa kala hatu longele vamwe ouwa noku va kwafela, Jehova ota ka kala a hokwa eenghatu detu nosho yo omayambo a tya ngaho. Okunakonasha navamwe kwopahole kwa tya ngaho otaku ke tu didilikifa mo kutya fye Ovakriste vashili. — Joh. 13:34, 35; Kol. 1:10.
OMAYAMBO OMELONGELOKALUNGA
10, 11. Jehova oha tale ko ngahelipi oukalele nosho yo elongelokalunga letu, naasho oshi na oku tu kuma ngahelipi?
10 Onghedi imwe ya tongomana omo hatu longele vamwe ouwa oyo okudiinina “ehepaululo leteelelo letu.” Ndele mbela oho kendabala ngoo okulongifa omhito keshe wa mona opo u yandje oundombwedi? Omuyapostoli Paulus okwa ti kutya oilonga oyo hai longwa kOvakriste oi li “omahambeleloyambo nokutya, oshiimati shomilungu edi tadi pandula edina” laKalunga. (Heb. 10:23; 13:15; Hos. 14:3) Onghee hano, otashi ka kala shiwa okutala kutya ohatu longifa efimbo li fike peni moukalele nosho yo kutya ongahelipi hatu dulu okuxwepopaleka onghedi yetu yokuudifa. Oitukulwa ihapu yOkwoongala kwoPailonga oya nuninwa oku tu kwafela moshinima osho. Ndele molwaashi oilonga yomomapya nosho yo okuyandja oundombwedi wohangelela oi li “omahambeleloyambo,” oo e li oshitukulwa shelongelokalunga letu, otu na okukala hatu yambele Jehova omayambo aasho shiwaelela. Nonande eenghalo detu oda yoolokafana shili, efimbo olo hatu longifa moilonga yokuudifa onghundana iwa ohali holola kutya otwa lenga oinima yopamhepo shi fike peni.
11 Luhapu Ovakriste ohava longifa efimbo lavo mokulongela Kalunga, kutya nee ongeenge ve li momaumbo avo ile omeongalo. Jehova osho a hala tu kale hatu ningi ngaho. Oshoshili kutya fyeni katu na okukala vali hatu fuwa po mEshabata ile okukala hatu i alushe momalweendo tu ka dane oivilo yokuJerusalem. Ndele nande ongaho, oivilo oyo yopefimbo lonale otai ti sha kOvakriste kunena. Kalunga okwa teelela nafye tu efe po okulonga oilonga ya nyata opo tu kale hatu konakona Eendjovo daye, hatu ilikana nokukala pokwoongala kwopaKriste. Omitwe domaukwaneumbo opaKriste ohadi fi oshisho opo omaukwaneumbo ado a ninge Elongelokalunga lOukwaneumbo. (1 Tes. 5:17; Heb. 10:24, 25) Ndele molwaashi otu na omalipyakidilo opamhepo e lili noku lili, oshiwa okulipula kutya: ‘Mbela ongahelipi handi dulu okuxwepopaleka onghedi yange yokulongela Kalunga?’
12. (a) Omatwimino edimba liwa oo kwa li haa twiminwa Jehova melongelokalunga lopefimbo lonale otaa dulu okufaafanifwa nashike? (b) Efaafanifo olo oli na okukuma ngahelipi omailikano etu kunena?
12 Ohamba David oya li ya imbila Jehova tai ti: “Eindilo lange nali talwe kuove, olo etwimino.” (Eps. 141:2) Natu dilongeni pauxupi kombinga yomailikano etu; mbela ohatu ilikana ngoo pandjikilile nomailikano etu oku na tuu ongushu? Embo lEhololo ola faafanifa “omailikano ovayapuki” nomatwimino edimba liwa. Ola ti kutya omailikano a tya ngaho Jehova ohe a tale ko e li ngaashi omatwimino edimba liwa. (Eh. 5:8) Omatwimino oo a li haa yambelwa Jehova alushe koaltari muIsrael shonale okwa li haa longekidwa nawanawa. Kakele kaasho, omatwimino a tya ngaho Jehova okwa li ashike he a tambula ko ngeenge okwa longekidwa metwokumwe nomifindalandu odo a tula po. (Ex. 30:34-37; Lev. 10:1, 2) Sha faafana, ngeenge nafye otwa kala hatu ilikana kuJehova tashi di komutima, ohatu dulu okukala noushili kutya ota ka pwilikina komailikano etu.
OKUYANDJA NOKUPEWA
13, 14. (a) Eyakulo lilipi omuyapostoli Paulus a li a pewa kuEpafroditus nosho yo keongalo lokuFilippi, nokwa li e li uditile ngahelipi? (b) Ongahelipi hatu dulu okulandula oshihopaenenwa shaEpafroditus nosho yo shOvafilippi?
13 Kashi na nee mbudi kutya ohatu yandje omayambidido opashimaliwa mahapu ile omanini e na sha noilonga yomounyuni aushe, omayambidido oo oku li ngaashi omayambo. (Mark. 12:41-44) Pashihopaenenwa, eongalo lomuFilippi ola li la tuma Epafroditus kuRoma opo a twaalele omuyapostoli Paulus oipumbiwa yopalutu. Osha yela kutya eeshali odo Paulus a li a tuminwa kOvafilippi oda li yo da kwatela mo oimaliwa. Ashike osho hasho sha li oshikando shavo shotete tava pe Paulus oipumbiwa. Ova li ve uditile Paulus onghenda nokava li va hala a kale te lipula unene noshimaliwa opo a dule okulongifa efimbo lihapu moukalele. Mbela Paulus okwa li a tala ko ngahelipi eeshali odo a tuminwa? Okwa ti kutya oinima oyo ve mu tumina “oyo edimba liwa, neyambo liwa la wapalela Kalunga.” (Lesha Ovafilippi 4:15-19.) Paulus okwa li lela a pandula Ovafilippi omolwefilonghenda olo ve mu ulikila, na Jehova okwa li a hokwa osho va li va ninga.
14 Nokunena, Jehova ohe tu pandula neenghono ngeenge hatu yambidida oilonga yomounyuni aushe. Kakele kaasho, okwe tu udanekela kutya ota ka wanifa po eemhumbwe detu adishe dopalutu nosho yo dopamhepo, ngeenge otwa pitifa komesho oinima yOuhamba monghalamwenyo yetu. — Mat. 6:33; Luk. 6:38.
ULIKA OLUPANDU LOYE
15. Oinima imwe ilipi hai ku linyengifa u pandule Jehova?
15 Otu na omatomheno mahapu lela okupandula Jehova. Pashihopaenenwa, mbela katu na okukala hatu pandula Jehova efiku keshe omolwoshali yomwenyo? Ohe tu pe keshe osho twa pumbwa opo tu dule okukala nomwenyo, ngaashi oikulya, oidjalomwa, eenhele dokukala nosho yo omhepo oyo hatu fudile mo. Otu na yo okupandula Jehova eshi twa mona eshiivo lashili lOmbibeli olo le tu kwafela tu kale tu na eitavelo netimaumbwile li na sha nonakwiiwa. Onghee hano, oshi li pandunge okukala hatu longele Jehova noku mu pa alushe omahambeleloyambo, molwaaishe oyo e tu ningila nomolwaashi oye Kalunga ketu. — Lesha Ehololo 4:11.
16. Ekuliloyambo laKristus oli na oku tu linyengifa tu ninge shike?
16 Ngaashi twe shi mona moshitukulwa sha tetekela, oshali i na ondilo oyo Kalunga e tu pa oyo ekuliloyambo laKristus. Oshali oyo otai tu hololele ohole inene yaKalunga yoku tu hola. (1 Joh. 4:10) Ndele mbela ongahelipi tu na okuulika olupandu letu li na sha noshali oyo? Paulus okwa ti: “Ohole yaKristus tai tu fininike ofye ava twa tokola ngaha: umwe okwa fya omolwaaveshe, . . . ndele Oye okwa fya ponhele yaaveshe, opo ovo ve nomwenyo ve he likalele vali vo vene, ndelenee Oye tuu ou e va fila nokwe va nyumukila.” (2 Kor. 5:14, 15) Noitya imwe, Paulus okwa li a hala okutya ngeenge otwa pandula shili Kalunga omolwefilonghenda laye, ohatu ka longifa onghalamwenyo yetu moku mu fimanekifa nosho yo Omona waye. Natango, ohatu ka ulika kutya otu hole Kalunga naKristus notwa pandula ashishe osho ve tu ningila mokukala hatu dulika nohatu kufa ombinga moilonga yokuudifa nokuninga ovanhu ovahongwa. — 1 Tim. 2:3, 4; 1 Joh. 5:3.
17, 18. Omeenghedi dilipi vamwe ve linyengifwa kolupandu va tamunune mo oukalele wavo? Yandja oshihopaenenwa.
17 Mbela ito dulu okuxwepopaleka omahambeleloyambo oo ho yambele Kalunga? Konima eshi vahapu va dilonga kombinga youwa aushe oo Jehova e va ningila, ova li ve linyengifwa va unganeke nawa efimbo nomalipyakidilo avo opo va dule okutamununa mo oukalele wavo ile va dule okukufa ombinga momalipyakidilo makwao opamhepo. Kungaho, vamwe ova dula okukala hava kufa oukwafelikokolindjila lumwe ile oule weemwedi donhumba momudo, ofimbo vamwe she va kwafela va ye moukokolindjila wondjikilile. Vamwe ohava kufa ombinga moilonga yOuhamba i na sha nokutunga. Odo kadi fi tuu eenghedi da denga mbada omo omunhu ta dulu okuulika olupandu laye! Ngeenge otwa ulike olupandu letu mokukala hatu kufa ombinga moilonga oyo tu na omalinyengotomheno mawa, Kalunga ota ka tambula ko oilonga yetu iyapuki ya tya ngaho.
18 Ovakriste vahapu ove linyengifwa va ulike olupandu lavo lokupandula Jehova. Natu ka taleni koshihopaenenwa shaMorena. Morena okwa kulila mongeleka yaKatolika nokwa li a hongwa oufilosofi wOvaasia, ashike okwa li e na omapulo mahapu e na sha naKalunga nosho yo elalakano longhalamwenyo. Okwa li a konga omanyamukulo kongeleka nosho yo kovahongi voufilosofi ashike ka li a mona omanyamukulo. Okwa ka mona ashike omanyamukulo konima eshi a hovela okukonakona Ombibeli nEendombwedi daJehova. Molwaashi Morena okwa li a pewa omanyamukulo okudja mOmishangwa e na sha nomapulo aye aeshe, okwa li e linyengifwa a pandule Jehova nokulongifa eenghono daye adishe moilonga yaYe. Morena okwa li a kufa oukwafelikokolindjila tau twikile diva konima eshi a ninginifwa, nolwanima okwa ka ya moukokolindjila wondjikilile eshi eenghalo daye de ke mu pitika. Paife okwa kala moilonga yefimbo li yadi oule womido 30, nota twikile natango.
19. Ongahelipi to dulu okuulikila Jehova olupandu loye?
19 Osha yela kutya ope na ovapiya vaJehova vahapu ovadiinini ovo eenghalo davo itadi va pitike va ye moukokolindjila. Ndele nande ongaho, atusheni ohatu dulu okupa Jehova omayambo opamhepo oo ta hokwa, kashi na nee mbudi kutya ohatu dulu okulonga shi fike peni moilonga yaye. Elihumbato letu nali kale alushe metwokumwe nomifikamhango daJehova douyuki noku mu fimanekifa efimbo keshe. Eitavelo letu nali tu kwafele tu kale twe lineekela kutya Kalunga ota ka wanifa po omalalakano aye. Natu tandavelifeni onghundana iwa okupitila moilonga yetu iwa. Natu twikileni okuulikila Jehova olupandu letu, moku mu yambela omayambo hatu shi ningi tashi di komutima omolwolupandu laashishe osho e tu ningila.
[Eendjovo dididilikwedi pepandja 25]
Oho xwepopaleke ngoo omahambeleloyambo oye omolwouwa oo Jehova e ku ningila?
[Efano pepandja 23]
Oho longifa ngoo omhito keshe to mono opo u yandje oundombwedi?