Ovanhu ohave lipula kombinga yaJesus
OMUSHANGI WOISHANGOMWA STAN GUTHRIE okwa ti: “Konyala keshe omunhu oha popi kutya [Jesus] omunhu a tya ngahelipi. Kashi na nee mbudi kutya otu na eitavelo la tya ngahelipi ile omalimbililo, atushe ohatu lipula kutya: ‘Omulumenhu oo oye lyelye?’”
OVANHU ova hala okushiiva kombinga yaJesus. Omambo neefilima di na sha naye odi holike kovanhu vahapu. Ndele nande ongaho, ovanhu vahapu natango ove na omapulo shi na sha naJesus. Ovanhu ove na omataleko a yoolokafana e na sha nokutya Jesus okwa li naanaa a tya ngahelipi lela.
Omido opo da piti, ovatoolinghundana vavali ova li va pula ovanhu va nyamukule okupitila kointaneta epulo kutya: “Jesus okwa li a tya ngahelipi?” Omanyamukulo okwa li a kwatela mo aa taa landula apa:
● “Vati okwa li rabbi (omuhongi) oo a li omunalukeno.”
● “Okwa li omunhu wongaho oo a li nonghalamwenyo ya denga mbada.”
● “Kape na oumbangi kutya Jesus oko a li.”
● “Jesus okwa li Omona waKalunga oo a li a dalwa, a fya nokwa nyumuka koufi opo e tu xupife moulunde. Oku na omwenyo nena, note ke uya vali kombada yedu.”
● “Onda itavela kutya Jesus Kristus oye aeke omona waKalunga, oo pefimbo opo tuu e li omunhu ye okalunga.”
● “Jesus omunhu ashike womomahepu, naavo ve mu itavela ova nyika oshinanona.”
Omanyamukulo oo a yoolokafana itaa dulu okukala mondjila aeshe. Mbela ope na odjo yomauyelele i shii okulineekelwa oyo tai dulu oku tu pa omanyamukulo e shii kulineekelwa shi na sha naJesus? Ovanyanyangidi voshifo eshi ova itavela kutya Ombibeli oi li Eendjovo daKalunga nonokutya oyo aike tai dulu oku tu lombwela oshili ye lixwa po kombinga yaJesus.a — 2 Timoteus 3:16.
Moshitukulwa tashi landula, ohatu ka kundafana omanyamukulo Ombibeli e na sha nomapulo amwe oo haa pulwa luhapu kombinga yaJesus. Jesus okwa popya kutya “keshe ou te mu itavele” ota ka xupifwa. (Johannes 3:16) Ohatu ku ladipike u konakone omanyamukulo nokuninga etokolo kwoove mwene ngeenge owa hala okulihonga shihapu kombinga yaJesus nosho yo nghee to dulu okukala u na eitavelo tali longo muye.
[Eshangelo lopedu]
a Opo u mone ouyelele muhapu, tala etukulwa 2 li na oshipalanyole “Ombibeli — embo la dja kuKalunga,” membo Ombibeli otai hongo lela shike? la nyanyangidwa kEendombwedi daJehova.