Mbela osha fimana ngoo okushiiva kombinga yaJesus?
“Tamu ka shiiva oshili, noshili otai mu mangulula.” — JOHANNES 8:32.
MOMBIBELI omu na oshili oyo tai dulu oku tu mangulula mengwangwano ile nokuli komaitavelo oipupulu e na sha naJesus. Ndele mbela osha fimana ngoo kutya otwa itavela shike kombinga yaye? Heeno osha fimana. Osha fimana kuJehova nokuJesus noshi na yo okukala sha fimana kufye.
● Omolwashike sha fimana kuJehova? Oku shi popya paunafangwa, omolwaashi “Kalunga Oye ohole.” (1 Johannes 4:8) Jehova okwa hala tu kale twa hafa fiyo alushe. Jesus okwa ti: ‘Osho Kalunga a kala e hole ounyuni [ovanhu], Oye a yandja Omona waye Ewifa, opo keshe ou te mu itavele a kale e nomwenyo waalushe.’ (Johannes 3:16) Kalunga okwa li a tuma Omona waye e uye e tu kulile noku tu yeululile omhito yoku ka kala fiyo alushe mOparadisa kombada yedu, metwokumwe nelalakano laYe lopehovelo. (Genesis 1:28) Kalunga okwa halelela oku ka yandja oshali yomwenyo waalushe kwaavo tave lihongo oshili kombinga yOmona waye nokukatuka metwokumwe nayo. — Ovaroma 6:23.
● Omolwashike sha fimana kuJesus? Jesus naye oku hole ovanhu. Okwa ulika ohole yokuheliholamwene eshi e tu yandjela omwenyo waye nehalo liwa. (Johannes 15:13) Okwa li e shii kutya ovanhu otava ka xupifwa ashike okupitila muye. (Johannes 14:6) Onghee hano, itashi kumwifa eshi Jesus a hala ovanhu vahapu va mone ouwa mekuliloyambo laye. Osho osho she mu linyengifa a pe ovashikuli vaye vashili oshilonga shokuhonga ovanhu mounyuni aushe kombinga yehalo laKalunga nelalakano laYe. — Mateus 24:14; 28:19, 20.
● Omolwashike shi na okukala sha fimana kufye? Diladila oule wokafimbo kombinga yoinima oyo ya fimana kwoove, ngaashi oukolele noukwaneumbo woye. Mbela owa halelela okukala u na oukolele nonghalamwenyo iwa nosho yo ovaholike voye? Okupitila muJesus, Jehova okwe shi ninga tashi shiva opo ove novaholike voye mu kale mu na eteelelo loku ka kala noukolele wa wanenena nosho yo omwenyo waalushe mounyuni mupe omo itamu ka kala ouyahame nokumona oixuna. (Epsalme 37:11, 29; Ehololo 21:3, 4) Mbela ino hala oku ka kala mounyuni wa tya ngaho? Ngeenge osho, ope na oshinima shonhumba osho u na okuninga.
Tala vali komushangwa oo wa tofwa mo pehovelo loshitukulwa oo tau ti: “Tamu ka shiiva oshili, noshili otai mu mangulula.” Oshili kombinga yaJesus nosho yo onghandangala oyo ta dana mokuwanifwa kwelalakano laKalunga otai dulu oku tu mangulula moupika u nyanyalifa, sha hala okutya, oulunde nefyo. Ndele opo u mone emanguluko la tya ngaho, ou na ‘okushiiva oshili.’ Omolwashike ito lihongo shihapu kombinga yoshili ya tya ngaho nosho yo nghee ove novaholike voye tamu dulu okumona ouwa muyo? Eendombwedi daJehova otadi ka kala da hafa oku ku kwafela.