Eenghundafana nomuneumbo Mbela Jesus oKalunga?

EENDOMBWEDI DAJEHOVA ohadi hafele okukundafana Ombibeli novanhu vakwao. Mbela ou na epulo lonhumba lopaMbibeli olo ho kala to lipula nalo? Mbela oho kala wa limbililwa shi na sha neitavelo ile elongelokalunga lEendombwedi daJehova? Ngeenge osho, ino tila oku di pula shi na sha naasho, ngeenge we di shakeneke. Otadi ka kala da hafa okukundafana naave kombinga yomapulo oye.

Eenghundafana tadi landula otadi ulike kunghee Eendombwedi daJehova hadi kundafana navamwe. Natu tye nee ngeno Ondombwedi yedina Karen otai kundafana nomuneumbo wedina Samantha.

Oshoshili ngoo kutya inamu itavela muJesus?

Samantha: Omufita wetu okwa ti kutya Eendombwedi daJehova inadi itavela muJesus. Oshoshili ngoo mbela?

Karen: Fye otwa itavela muJesus. Otwa itavela yo kutya omunhu okwa pumbwa okukala e na eitavelo tali longo muJesus opo a ka xupifwe.

Samantha: Naame osho nda itavela ngaho.

Karen: Ondi wete kutya ohatu tu kumwe moshinima osho. Ombili ngoo inandi popya edina lange; aame Karen. Ove oove lyelye?

Samantha: Aame Samantha.

Karen: Samantha, otashi dulika u lipule kutya: ‘Ngeenge Eendombwedi daJehova oda itavela shili muJesus, omolwashike ovanhu hava ti kutya inadi itavela muye?’

Samantha: Onda limbililwa lela shi na sha naasho.

Karen: Ngaashi nde shi popya metetekelo, fye otwa itavela filufilu muJesus, ashike inatu itavela oinima aishe oyo ovanhu hava popi shi na sha naye.

Samantha: Ngaashi nee shike?

Karen: Pashihopaenenwa, ovanhu vamwe ohava ti kutya Jesus okwa li ashike omunhu e na onghedi iwa. Ndele fye itatu tu kumwe nepopyo olo.

Samantha: Ame naame itandi tu kumwe nalo.

Karen: Natango moshinima osho ohatu tu kumwe. Oshihopaenenwa shimwe vali oshosho kutya Eendombwedi daJehova itadi tu kumwe nomahongo oo taa kondjifafana naasho Jesus a popya kombinga yaye naXe.

Samantha: Owa hala okutya ngahelipi?

Karen: Omalongelokalunga mahapu ohaa hongo kutya Jesus oKalunga. Otashi dulika naave osho wa hongwa ngaho.

Samantha: Osho naanaa; omufita wetu okwa ti kutya Kalunga naJesus omunhu umwe.

Karen: Ndele mbela ito dimine kutya onghedi ya denga mbada omo hatu dulu okulihonga oshili kombinga yaJesus omokukonakona osho a li a popya shi na sha naye mwene?

Samantha: Aaye osho.

Jesus okwa popya shike shi na sha naye mwene?

Karen: Natu ka tale omushangwa umwe oo tau dulu oku tu kwafela moshinima osho. Didilika nawa osho Jesus a popya muJohannes 6:38. Okwa ti: “Osheshi Ame nda dja keulu hakuwanifa ehalo lange mwene, ndelenee ehalo laau a tuma nge.” Ngeenge Jesus oKalunga, eendjovo odo otadi limbililike kanini.

Samantha: Omolwashike to tile ngaho?

Karen: Didilika kutya Jesus okwa ti kutya ina dja keulu e uye a wanife ehalo laye mwene.

Samantha: Osho naanaa, molwaashi okwa ti kutya okwe uya okulonga ehalo laau e mu tuma.

Karen: Ndele ngeenge Jesus oKalunga, olyelye e mu tuma okudja meulu, nomolwashike ta ti okwe uya okulonga ehalo laao e mu tuma?

Samantha: Paife ondi udite eshi wa hala okutya. Ndele nghi shii ngeenge ovelishe ei imwe oyo tai yandje oumbangi wa wana kutya Jesus ke fi Kalunga.

Karen: Natu ka tale osho Jesus a li a popya pomhito imwe vali. Okwa popya eendjovo hanga da faafana naado muJohannes 7:16. Kwafele nge u leshe omushangwa oo.

Samantha: Eewa. “Jesus okwe va nyamukula ta ti: Elongo lange kali fi lange, ndele [olaau] a tuma nge.”

Karen: Tangi Samantha kokulesha. Pavelishe oyo, mbela Jesus okwa li ha hongo omadiladilo aye mwene?

Samantha: Aaye, molwaashi okwa ti kutya ehongo laye kali fi laye, ndele olaau e mu tuma.

Karen: Osho naanaa. Ndelenee osho otashi pendula omapulo amwe vali ngaashi: ‘Olyelye a li a tuma Jesus? Olyelye a li e mu honga oshili oyo a li ta udifa?’ Mbela oo a li a tuma Jesus ke dule Jesus? Osha yela kutya nakutuma ke fike punakutumwa.

Samantha: Osho oshihokwifa lela. Osho oshikando shotete handi lesha omushangwa oo.

Karen: Natu ka tale vali eendjovo daJesus odo di li muJohannes 14:28, tadi ti: “Onye mwa uda eshi nde mu lombwela: Ame ohandi i ko, ndele handi uya vali kunye. Ngeno mu hole nge, otamu hafe, shaashi ohandi i kuTate, osheshi Tate oku dule nge.” Pamushangwa oo, Jesus okwa li a tala ko Xe ngahelipi?

Samantha: Okwa ti kutya Xe oku mu dule. Osha fa shi li ngaha kutya mboli Jesus ke fike puKalunga.

Karen: Osho naanaa. Omushangwa umwe vali oo tau dulu oku tu kwafela tu ude ko oshinima osho oMateus 28:18. Jesus okwa li a lombwela ovahongwa vaye movelishe oyo a ti: “Ame onda pewa eenghono adishe meulu nokombada yedu.” Mbela Jesus okwa kala alushe e na eenghono adishe meulu nokombada yedu?

Samantha: Aaye, osha yela kutya okwe ke di pewa ashike lwanima.

Karen: Ndele ngeenge Jesus oKalunga, omolwashike a pumbwa okupewa eenghonopangelo da wedwa po? Navali, olyelye e di mu pa?

Samantha: Ohoo, otu na shihapu mboli okulihonga.

Jesus okwa li ta ilikana kulye?

Karen: Ngeenge ohatu ti kutya Jesus oKalunga, ope na vali oshinima shimwe osho tashi ke tu kwata.

Samantha: Oshike osho?

Karen: Oshi na sha naasho sha popiwa muLukas 3:21, 22 (yelekanifa no-NW). Eevelishe odo otadi popi kombinga yaasho sha ningwa po pefimbo leninginifo laJesus. Kwafele nge u leshe eevelishe odo, ove to didilike osho tashi popiwa.

Samantha: “Ndele opa ningwa, ovanhu aveshe eshi va [ninginifwa] naJesus eshi a [ninginifwa] ndee ta ilikana, eulu ola yeuluka nOmhepo Iyapuki ya fa onghuti Oye mu kulukila nondaka ya dja meulu tai ti: Oove Omona wange omuholike, onde ku hokwa.”

Karen: Mbela owa didilika kutya Jesus okwa li a ninga shike pefimbo lokuninginifwa?

Samantha: Okwa li a ilikana.

Karen: Ou li mondjila. Epulo nali kale apa kutya: ‘Ngeenge Jesus oKalunga, okwa li ta ilikana kulyelye?’

Samantha: Epulo olo oliwa. Onda hala ndi ke li pule omufita wetu.

Karen: Momushangwa oo omu na vali oshinima shimwe shihokwifa. Didilika kutya konima eshi Jesus a dja koshi yomeva, opa li pa udika ondaka ya dja meulu. Mbela ondaka oyo oya ti shike?

Samantha: Oya ti kutya Jesus Omona waye nonokutya oku mu hole nokwe mu hokwa.

Karen: Ou li mondjila. Ndele ngeenge Jesus oKalunga, olyelye a popya eendjovo odo okudja meulu?

Samantha: Kanda li nda diladila nale moule shi na sha naasho.

Xe nOmona

Karen: Diladila vali kwaashi: Otwa lesha kutya Jesus okwa popya shi na sha naKalunga kutya oXe womeulu. Naashi a li ta ninginifwa, ondaka oyo ya dja meulu oya popya shi na sha naJesus ya ti ou Omona wange. Jesus okwa popya kondadalunde kutya ye Omona waKalunga. Paife natu tye nee ngeno owa hala okuhonga nge kutya ovanhu vavali ove fike pamwe. Mbela efaneko lilipi to dulu okulongifa le likolelela kepambafano loilyo youkwaneumbo opo u dule okuyelifila nge nawa oshitwa osho?

Samantha: Otashi dulika ndi longife efaneko li na sha novamwainafana vavali.

Karen: Ou li mondjila; otashi dulika nokuli u shi faneke novanhu ovo va dalwa eehamba, nove lifa filufilu. Ndele Jesus okwa popya kutya Kalunga oXe nonokutya ye Omona waKalunga. Oto diladila kutya Jesus okwa hala okutya shike eshi a ti ngaho?

Samantha: Oo, paife ondi udite ko eshi wa hala kutya. Jesus okwa hala okutya Kalunga omunenenene noku na eenghonopangelo dihapu e mu dule.

Karen: Osho naanaa. Tala nee kunghee fye naave twa dula oku eta po efaneko la tya ngaho tali wapalele shi na sha novanhu ovo ve fike pamwe, ngaashi ovamwainafana vavali ile ovo va dalwa eehamba. Ngeno Jesus okwa li Kalunga shili, mbela ito diladila kutya e li Omuhongi Munene ngeno okwa longifa efaneko la faafana ile ngeno a longifa nokuli oshihopaenenwa sha yela nawa okuulika kutya ye naKalunga omunhu umwe?

Samantha: Osho naanaa.

Karen: Ndele otwa mona kutya Jesus okwa longifa outumbulilo Xe nOmona eshi a popya ekwatafano laye naKalunga.

Samantha: Oshitwa osho oshihokwifa shili.

Mbela ovashikuli vaJesus vonale ova li ve mu tala ko e li Kalunga?

Karen: Onda hala tu kundafane oshitwa shimwe vali sha pamba oshikundafanwa eshi fimbo inandi ya, ngeenge ou na okafimbo.

Samantha: Ondi na ngoo okafimbo natango; ohatu dulu oku shi kundafana.

Karen: Jesus ngeno okwa li Kalunga, mbela ngeno ovahongwa vaye inave shi popya sha yela?

Samantha: Ngeno osho ngaho shili.

Karen: Ashike kape na nande opapa hatu lesha mOmishangwa ovahongwa vaye va popya kutya Jesus oKalunga. Mepingafano naasho, didilika osho omuyapostoli Paulus, umwe womovashikuli vaJesus vonale, a li a shanga. Okwa hokolola osho Kalunga a li a ninga po konima yefyo nenyumuko laJesus mOvafilippi 2:9, a ti: “Kalunga okwe mu lenga, [ile tu tye, “e mu pa ondodo yopombada,” NW] nokwe mu luka edina li li kombada yomadina aeshe.” Pavelishe oyo, Kalunga okwa ningila Jesus shike?

Samantha: Oya ti kutya Kalunga okwe mu lenga nokwe mu pa ondodo yopombada.

Karen: Ou li mondjila. Ngeno Jesus okwa li e fike puKalunga fimbo ina fya ndele eshi Kalunga e mu nyumuna okwe mu lenga noku mu pa ondodo yopombada, mbela ngeno osho inashi ningifa Jesus a kale e dule Kalunga? Eshi wa tala, ope na ngoo umwe ta dulu okukala e dule Kalunga?

Samantha: Aaye, kape na oo ta dulu okukala e dule Kalunga.

Karen: Osho naanaa. She likolelela koumbangi aushe oo twa kundafana, mbela Ombibeli otai hongo kutya Jesus oKalunga?

Samantha: Aaye, hasho mboli. Ombibeli otai ti kutya Jesus Omona waKalunga.

Karen: Ou li mondjila Samantha. Fye tu li Eendombwedi daJehova otwa fimaneka Jesus neenghono. Otwa itavela kutya Jesus okwa fya e li Messias omuudanekwa, nokwe shi ninga tashi shiiva opo ovanhu aveshe ovadiinini va ka xupifwe.

Samantha: Naame ohandi tu kumwe naasho.

Karen: Otashi dulika nee u lipule kutya: ‘Ongahelipi hatu dulu okuulika olupandu letu li na sha naashi Jesus a yandja omwenyo waye omolwetu?’a

Samantha: Kandi shii lela kutya ongahelipi hatu dulu oku shi ninga.

Karen: Ongahelipi ngeenge onda aluka tu uye tu tale enyamukulo lepulo olo mOmbibeli? Mbela oshi li nawa ngeenge onda aluka moshivike tashi uya pefimbo ngaashi eli?

Samantha: Eewa, ohandi ka kala nde ku teelela.

Karen: Eewa, otu liwete moshivike tashi uya.

[Eshangelo lopedu]