Efa Jehova e ku kwafele u mone emanguluko lashili

“[Tala] nokukonakona momhango ei ya wana yemanguluko.” — JAK. 1:25.

OTO DULU OKUYELIFA?

Omhango ilipi tai twala memanguluko lashili, noolyelye hava mono ouwa muyo?

Otu na okuninga shike opo tu ka mone emanguluko lashili?

Ovo tava ende mondjila oyo tai twala komwenyo otava ka mona emanguluko lilipi?

1, 2. (a) Oshike sha ningwa po shi na sha nemanguluko lovanhu mounyuni, nomolwashike? (b) Ovapiya vaJehova ova longekidilwa emanguluko lilipi?

OTU li pefimbo opo ovanhu vahapu va ninga ovanalwisho, vehe nomhango nove hole elongifo leenghono. (2 Tim. 3:1-5) Osho osha ningifa omapangelo a tote po eemhango dihapu, a pameke omatanga opolifi noku tule omafano peenhele di lili noku lili oo taa tale osho ovanhu tava ningi. Moilongo imwe, ovanhu ohava tula eealalama momaumbo avo, have a pate nomakumba mahapu nova tula komaluumbo avo eedalate dolusheno opo ve liamene. Ovanhu vahapu kave hole okuya pondje oufiku nokave hole ovana vavo tava danauka pondje ve li ovo aveke, kutya nee omutenya ile oufiku. Osho otashi ulike kutya ovanhu inava manguluka vali, nonghalo ya tya ngaho otai twikile.

² Moshikunino shaEden, Satana okwa li a popya kutya ovanhu ove na okukala va manguluka ko kuJehova opo va kale va manguluka shili. Oyo kai fi tuu oipupulu inyanyalifa! Apa ngoo pe fike okuhadulika kwovanhu koiteelelwa yaKalunga, opo ngoo pe fike okumona oixuna kwovanhu aveshe. Ndele eenghalo da tya ngaho, odo tadi ende tadi naipala, oda kuma yo ovapiya vaJehova. Kakele kaasho, otwa teelela efimbo olo eshi ovanhu tava ka mangululwa moupika woulunde nowenyonauko nosho yo eshi tava ka hafela osho Ombibeli tai shi ifana ‘emanguluko loshinge shovana vaKalunga.’ (Rom. 8:21) Jehova okwa hovela nale okulongekidila ovapiya vaye emanguluko olo. Ngahelipi mbela?

3. Jehova okwa pa ovashikuli vaKristus omhango ilipi, nomapulo elipi hatu ka konakona?

³ Enyamukulo kepulo olo li li mokatendo ka tetekela otali hangwa mwaasho sha popiwa komushangi wOmbibeli Jakob shi li ‘omhango ya wana yemanguluko.’ (Lesha Jakob 1:25.) Omatoloko Eembibeli dimwe okwa toloka outumbulilo oo taa ti, “omhango oyo tai tu mangulula” (The New English Bible) nosho yo “omhango ya wanenena yemanguluko” (The New American Bible). Luhapu ovanhu ngeenge tava diladila omhango ohava diladila komangabeko ndele hakemanguluko. Ndele mbela ‘omhango ya wana [ile tu tye, ya wanenena] yemanguluko’ oshike? Ongahelipi omhango oyo tai tu mangulula?

OMHANGO OYO TAI TU MANGULULA

4. ‘Omhango ya wana yemanguluko’ oshike, noolyelye hava mono ouwa muyo?

⁴ ‘Omhango ya wana [ile tu tye, ya wanenena] yemanguluko’ kai fi Omhango yaMoses, molwaashi omhango oyo oya li ya holola omanyono ovanhu noya li ya wanifwa po kuKristus. (Mat. 5:17; Gal. 3:19) Hano mboli omhango oyo Jakob a popya oshike? Jakob okwa li ta popi shi na sha ‘nomhango yaKristus’ oyo hai ifanwa yo ‘omhango yeitavelo’ nosho yo ‘omhango yoshiwana sha manguluka.’ (Gal. 6:2; Rom. 3:27; Jak. 2:12, NW) Onghee hano, ‘omhango ya wana’ oya kwatela mo keshe osho Jehova a teelela tu ninge. Ovakriste ovavaekwa nosho yo “eedi dimwe” ohava mono ouwa momhango oyo. — Joh. 10:16, NW.

5. Omolwashike taku tiwa kutya omhango yemanguluko kai fi omutengi?

⁵ Mepingafano neemhango domoilongo ihapu, ‘omhango ya wana’ inai kitakana nokai fi omutengi, ndele ponhele yaasho, oya kwatela mo oipango i li paunafangwa nomafinamhango mapu okuudiwa ko. (1 Joh. 5:3) Jesus okwa ti: “Ondjoko yange [oiwa] nomutengi wange omupu.” (Mat. 11:29, 30) Shimwe vali, ‘omhango ya wana’ kai fi omusholondodo mulemule weendjidikila ile womahandukilo, molwaashi oya kanghamena kohole noya shangelwa momadiladilo nomomitima dovanhu ndele hakoipelende yomamanya. — Lesha Ovaheberi 8:6, 10.

NGHEE ‘OMHANGO YA WANA’ TAI TU MANGULULA

6, 7. Oshike hatu dulu okutya shi na sha noiteelelwa yaJehova, nomhango yemanguluko ohai tu kwafele tu ninge shike?

⁶ Jehova okwa tulila po oishitwa yaye inaendunge omangabeko omolwouwa neameno layo. Pashihopaenenwa, diladila keemhango odo hadi wilike oinima meshito. Ovanhu ihava kala ve udite tava fininikwa keemhango odo. Ndele ponhele yaasho, ohave di pandula nova dimina kutya oda pumbiwa omolwonghalonawa yavo. Sha faafana, oiteelelwa yaJehova oyo i li “momhango ya wana” yaKristus oya nuninwa oku tu etela ouwa.

⁷ Omhango yemanguluko ihai tu amene ashike ndele ohai tu pitike yo tu wanife po omahalo etu aeshe oo a yuka nopehe na okuliyahameka ile okunyona po oufemba wavamwe nokuya moshipala emanguluko lavo. Onghee hano, opo tu kale twa manguluka shili ile tu wanife po omahalo etu, otu na okukulika omahalo a yuka, oo e li metwokumwe naasho Jehova e hole nosho yo osho a hala tu ninge. Noitya imwe, otu na okukala tu hole osho Jehova e hole nokutonda osho e tonde, nomhango yemanguluko otai ke tu kwafela tu ninge ngaho. — Amos 5:15.

8, 9. Ovanhu ovo va kanyatela komhango yemanguluko ohava mono omauwa elipi? Yandja oshihopaenenwa.

⁸ Molwaashi inatu wanenena, otu na okukendabala tu finde omahalo etu a puka. Ndele nande ongaho, ngeenge otwa kala twa kanyatela filufilu komhango yemanguluko, ohatu ka kala tu udite twa manguluka nokuli nopaife. Pashihopaenenwa, omukonakonimbibeli umwe wedina Jay okwa li a pikwa komakaya. Ndele eshi e lihonga kutya Kalunga ina hokwa ovo hava shili omakaya, okwa li e na okuninga etokolo lonhumba. Mbela okwa li ta ka efa ashike a dulike kombelela yaye ile okwa li ta ka dulika kuJehova? Jay okwa li a ninga etokolo li li pandunge, a li a hoolola okulongela Jehova nonande osha li shidjuu kuye okweefa po okushila omakaya. Ndele mbela okwa kala e udite ngahelipi konima eshi a efa po onghedindjikilile yaye oyo? Okwa popya ta ti: “Onda li ndi udite nawa nonda hafa neenghono.”

⁹ Jay okwa li e lihonga okupitila moshimoniwa shaye kutya emanguluko lomounyuni, olo hali ningifa ovanhu va ‘diladile eshi shopambelela’ ole va tula ashike moupika, ofimbo emanguluko olo Jehova he tu pe olo tali ulike ‘kokudiladila eshi shopamhepo,’ hali tu mangulula notali tu etele “omwenyo nombili.” (Rom. 8:5, 6) Oshike sha li sha kwafela Jay a dje mo moupika wokushila omakaya? Ka li e shi ninga keenghono daye mwene ndele okekwafo laKalunga. Okwa ti: “Onda li handi konakona Ombibeli pandjikilile, handi ilikana ndi pewe omhepo iyapuki nokutambula ko nehalo liwa ekwafo lopahole olo handi pewa keongalo lopaKriste.” Omafiloshisho a tya ngaho nafye otaa dulu oku tu kwafela tu mone emanguluko lashili. Natu ka taleni kutya ongahelipi taa dulu oku tu kwafela.

KONAKONA NAWA EENDJOVO DAKALUNGA

10. ‘Okutala nokukonakona’ momhango yaKalunga otashi ti shike?

¹⁰ Jakob 1:25 ota ti: ‘Ou ta tale nokukonakona momhango ei ya wana yemanguluko ndee ta kala mo, oye ta kala omunelao mokulonga kwaye.’ Oshitya shOshigreka osho sha tolokwa “ou ta tale nokukonakona” otashi ti “okupetama u tale oshinima shonhumba,” naasho otashi pula eenghendabala da mana mo. Ngeenge otwa hala omhango yemanguluko i nwefe mo omadiladilo nomitima detu, otu na okuninga eenghendabala da mana mo tu konakone Ombibeli nokudilonga pamwe neilikano kwaasho twa lesha. — 1 Tim. 4:15.

11, 12. (a) Jesus okwa divilika ngahelipi omhumbwe yokukala metwokumwe noshili? (b) Onghalo ya nyika oshiponga ilipi tu na okuhenuka, naunene tuu ngeenge otu li ovanyasha?

¹¹ Otu na yo ‘okukala,’ ile tu tye, okutwikila okutula moilonga Eendjovo daKalunga, nokungaho, onghalamwenyo yetu otai ka kala i li metwokumwe noshili. Jesus okwa li a popya ediladilo la faafana eshi a li a lombwela vamwe ovo va li va itavela muye a ti: ‘Ngeenge tamu kala meendjovo dange, onye ovalongwa vange shili, ndele tamu ka shiiva oshili, noshili otai mu mangulula.’ (Joh. 8:31, 32) Embo limwe lomauyelele ola ti oshitya osho sha tolokwa “shiiva” otashi ti yo okukala u na olupandu molwaashi “oshinima osho u ‘shii’ oshi na ongushu ile sha fimana kwoove.” Onghee hano, ohatu ka “shiiva” ashike nawanawa oshili ngeenge otwa kala metwokumwe nayo. Ohatu ka dula yo okupopya hatu ti “ondjovo yaKalunga” otai “longo” mufye, tai tu kwafele tu kale tu na omaukwatya a fa filufilu aTate yetu womeulu. — 1 Tes. 2:13.

¹² Lipula kutya, ‘Oshili ondi i shii ngoo shili? Ohandi kala ngoo metwokumwe nayo? Ile ohandi kala natango nda hala “emanguluko” lonhumba lomounyuni ou?’ Omumwameme umwe oo a dalwa kovadali Ovakriste okwa popya shi na sha nefimbo eshi a li omunyasha a ti: “Ngeenge owa kulile moshili, oho kala ngoo u shii kutya Jehova oko e li, ndele ame kanda li ndi mu shii lela. Kanda li nde lihonga okutonda osho Jehova e tonde. Kanda li yo ndi shii ngeenge osho handi ningi otashi dulu oku mu kuma. Ngeenge ndi li moupyakadi kanda li handi kongo ekwafo kuye. Onda li ashike handi liameke keendunge dange mwene, nonda ka mona kutya osho osha nyika oulai molwaashi kanda li ndi shii sha.” Shihafifa, lwanima omumwameme oo okwa ka mona kutya omadiladilo aye okwa puka filufilu nokwa li a ninga omalunduluko manene. Omumwameme oo okwa ninga nokuli omukokolindjila wondjikilile.

OMHEPO IYAPUKI OHAI TU KWAFELE TU KALE TWA MANGULUKA

13. Omhepo iyapuki yaKalunga ohai tu kwafele ngahelipi tu kale twa manguluka?

¹³ Ombibeli oya popya mo 2 Ovakorinto 3:17 tai ti: ‘Apa omhepo yOmwene tai kala po, ope nemanguluko.’ Omhepo iyapuki ohai tu kwafele ngahelipi tu kale twa manguluka? Kakele koinima imwe vali, omhepo iyapuki ohai imike mufye omaukwatya oo hae tu kwafele tu kale twa manguluka ngaashi, “ohole, ehafo, ombili, onheni, oukaume, ouwa, oudiinini, engungumano, elididimiko.” (Gal. 5:22, 23) Ngeenge ovanhu kave na omaukwatya oo, unene tuu ohole, ihava kala ve na emanguluko lashili, naasho otu shi liwetele mounyuni kunena. Shihokwifa, konima eshi omuyapostoli Paulus a tumbula oiimati yomhepo, okwa weda ko ta ti: “Kape nomhango i nondubo noilonga ya tya ngaha.” Mbela Paulus okwa li a hala okutya shike? Okwa li a hala okutya, kape na omhango tai dulu okungabeka oiimati yomhepo yaKalunga noku i imba i kule. (Gal. 5:18) Nokuli nomhango ya tya ngaho inai pumbiwa molwaashi Jehova okwa hala tu kulike omaukwatya a fa aKristus fiyo alushe noku a ulika nopehe na omangabeko asha.

14. Omeenghedi dilipi ovanhu ovo va nwefwa mo komhepo younyuni va ninga ovapika vayo?

¹⁴ Ovanhu ovo va nwefwa mo komhepo younyuni nohava wanifa po omahalo avo opambelela otashi dulika va diladile kutya ova manguluka. (Lesha 2 Petrus 2:18, 19.) Ndele paushili wo vene inava manguluka. Ova tulilwa po eemhango nomaufomhango mahapumahapu opo va dule okupangela omahalo neenghedi davo dii. Paulus okwa ti: “Omhango inai yandjelwa omuyuki, ndelenee ava ve he nomhango ndele ihava dulika.” (1 Tim. 1:9, 10) Ove li yo ovapika voulunde oo hau ve linyengifa va ‘shikule ouhalu wombelela,’ noulunde ou li omupangeli omukwanyanya. (Ef. 2:1-3) Otava dulu okufaafanifwa noupuka ovo tave likokele moshiyaxa shomaadi eenyiki. Molwaashi ohava wanifa po omahalo avo mai, ohave ke lihanga va ninga ovapika voulunde. — Jak. 1:14, 15.

OILYO YEONGALO LOPAKRISTE OYA MANGULUKA

15, 16. Okweendafana neongalo okwa fimana shi fike peni, nemanguluko lilipi hatu hafele?

¹⁵ Eshi wa hovela okweendafana neongalo lopaKriste, kwa li ashike wa fa omunhu a ya mongudu yonhumba yomalihafifo. Ndele ponhele yaasho, owe ya meongalo lopaKriste molwaashi Jehova oye e ku nana. (Joh. 6:44) Oshike she linyengifa Jehova e ku nane? Mbela okwa li a mona kutya ove omuyuki nomutilikalunga? Otashi dulika u tye: “Hasho nandenande!” Ndele mbela Kalunga oshike naanaa a li a mona mwoove? Okwa li a mona kutya oto ka dulika komhango yaye nehalo liwa nokutambula ko ewiliko laye lopahole. Eshi we uya meongalo, Jehova okwa kala te ku file oshisho pamhepo, nokwe ku kwafela u manguluke ko koipupulu nokoidila yomalongelokalunga eshi e ku honga nghee u na okukulika omaukwatya a fa aKristus. (Lesha Ovaefeso 4:22-24.) Oshidjemo, owa mona oufembanghenda wokukala umwe womwaavo ovo aveke ve li ‘oshiwana sha manguluka’ mounyuni aushe. — Jak. 2:12, NW.

¹⁶ Diladila shi na sha naashi: Mbela oho kala wa tila ngeenge u li novanhu ovo ve hole Jehova nomutima wavo aushe? Ngeenge tamu kundafana navamwe pOlupale lOuhamba, mbela oho kala to kevauka u tale ngeenge ope na ou ta vake po oinima yoye? Hasho nandenande! Oho kala wa manguluka noiho kala wa tila. Ndele mbela osho ngoo ho kala u udite ngaho ngeenge u li poiningwanima yomounyuni? Hasho naanaa! Ashike emanguluko olo to hafele paife mokati koshiwana shaKalunga oli li ashike euliko lemanguluko olo hatu ka hafela monakwiiwa.

‘EMANGULUKO LOSHINGE SHOVANA VAKALUNGA’

17. “Eholoko lovana vaKalunga” otali ka kwafela ngahelipi ovanhu va kale va manguluka?

¹⁷ Eshi omuyapostoli Paulus a li ta kundafana shi na sha nemanguluko olo Jehova a longekidila ovapiya vaye vokombada yedu, okwa popya a ti: “Nokudjuulukwa shili oishitwa aishe tai teelele eholoko lovana vaKalunga.” Okwa weda ko vali a ti: “Oishitwa yovene otai ka mangululwa moupika wenyonauko i ye memanguluko loshinge shovana vaKalunga.” (Rom. 8:19-21) “Oishitwa” otai ulike kovanhu ovo ve na eteelelo loku ka kala kombada yedu, ovo tava ka mona ouwa ‘meholoko’ lovana vaKalunga ovavaekwa. Eholoko ‘lovana’ vaKalunga otali ka hovela shimha aveshe va i meulu, notava ka xulifa po oukolokoshi kombada yedu pamwe naKristus nokutwala “ongudu inene” mounyuni mupe. — Eh. 7:9, 14.

18. Emanguluko lovanhu ovaduliki otali ka hapupala ngahelipi, nohauxuuninwa otava ka hafela emanguluko lilipi?

¹⁸ Ovanhu otava ka kala va manguluka filufilu molwaashi itapa ka kala vali enwefemo laSatana neendemoni daye. (Eh. 20:1-3) Olo itali ka kala tuu emanguluko lashili! Konima yaasho, ovavaekwa 144 000 ovo tava ka kala eehamba novapristeri pamwe naKristus, otava ka kwafela ovanhu va mone ouwa mekuliloyambo fiyo osheshi va mangululwa filufilu moulunde nomokuhawanenena. (Eh. 5:9, 10) Shimha ovanhu va kanyatele oudiinini wavo nokuli nopefimbo leyeleko, otava ka kala ve na emanguluko la wanenena olo Jehova a li a lalakanena pehovelo, ‘emanguluko loshinge shovana vaKalunga.’ Diladila ashike kwaashi: Ito ka kala vali to kondjo opo u longe osho sha yuka momesho aKalunga molwaashi oto ka kala wa wanenena filufilu nomaukwatya oye otaa ka kala a fa aye.

19. Otu na okutwikila okuninga shike opo tu kale mondjila oyo tai twala kemanguluko lashili?

¹⁹ Mbela ino halelela okuya “memanguluko loshinge shovana vaKalunga”? Ngeenge osho, kala ho efa omadiladilo nomutima woye u nwefwe mo ‘komhango ya wana yemanguluko.’ Kala ho konakona Omishangwa noukeka. Ninga oshili yoye mwene. Ilikana u pewe omhepo iyapuki. Kala ho kala alushe pokwoongala kwopaKriste nokumona ouwa meendja dopamhepo odo Jehova he tu pe. Ino efa Satana e ku pukife ngaashi a li a pukifa Eva, moku ku diladilifa kutya oiteelelwa yaKalunga oye ku ngabeka unene. Ashike kala u shi shii kutya Ondiaboli oi na omakoto. Ndele ngaashi hatu ke shi mona moshitukulwa tashi landula, katu na okweefa tu “findwe kuSatana, osheshi omakoto aye otu a shii.” — 2 Kor. 2:11.

[Omafano pepandja 9]

Mbela ohandi kala natango nda hala “emanguluko” lonhumba lomounyuni ou?

[Omafano pepandja 9]

Ohandi kala ngoo metwokumwe noshili?