Ombibeli ohai lundulula onghalamwenyo yovanhu

OSHIKE she linyengifa omulumenhu umwe a kale ha dulika vali komafinamhango Ombibeli oo a li a hongwa okudja kounona ndele te a efa po? Ongahelipi omulumenhu umwe omunyasha a li a mona xe oo a kala ta kongo monghalamwenyo yaye aishe? Natu ka tale osho va ti.

“Onda li nda pumbwa okwaalukila kuJehova.” — ELIE KHALIL

ODULA OMO A DALWA: 1976

OSHILONGO OMO A DALELWA: KIPRO

ONAKUDIWA: OMUMATI A KANENE

ONGHALAMWENYO YANGE YONALE: Onda dalelwa moKipro ndele onda putukila moAustralia. Ovadali vange Eendombwedi daJehova nova li va ninga keshe osho tava dulu opo va findile mwaame ohole yokuhola Jehova nosho yo Eendjovo daye, Ombibeli. Eshi nda li ndi na eedula omulongo nasha onda li nda ninga omunashibofa. Onda li handi livake mo meumbo konguloshi ndi ka shakene novanyasha vakwetu veedula omulongo nasha. Otwa li hatu vake eetuwa notwa li yo twa ya momaupyakadi mahapu.

Pehovelo, onda li handi ningi oinima oyo meholeko nda tila okunyemateka ovadali vange. Ndele mokweendela ko kwefimbo ngha li vali ndi na oumbada oo. Onda li nda panga oukaume novanhu ve dule nge kokule, ovo vehe hole Jehova nova li va nwefa nge mo nai. Onda li nda lombwela ovadali vange kutya inandi hala vali okukala oshitukulwa shelongelokalunga lavo. Ova li va kendabala okukwafela nge nelididimiko, ndele kanda li nda tambula ko ekwafo lavo. Ovadali vange ova li va nyemata neenghono.

Konima eshi nda dja mo meumbo, onda li nda hovela okulongifa oingangamifi, kwa li nokuli handi kunu nokulandifa epangwe lihapu neenghono. Onda li ndi na onghalamwenyo inai koshoka paenghedi nonda li handi longifa efimbo lihapu okuya koivilo nosho yo keekalaba oufiku. Onda li yo nda hovela okukala handi handuka diva. Ngeenge umwe a li a popya sha ile a ninga sha ndihe shi hole, onda li handi handuka neenghono, naluhapu onda li handi ngwenyaukile ovanhu noku va denga. Onda li handi ningi oinima aishe oyo nda li nda hongwa ndiha ninge ndi li Omukriste.

NGHEE OMBIBELI YA LUNDULULA ONGHALAMWENYO YANGE: Onda li nda hovela okupanga oukaume wopofingo naumwe oo twa li hatu nu naye oingangamifi, oo a li a filwa xe ofimbo a li okaana. Otwa li hatu kundafana luhapu fiyo omokati koufiku. Onguloshi imwe, okwa li a hovela okupopya omaliudo aye e na sha nanghee a djuulukwa xe neenghono. Molwaashi onda putuka ndi shii kombinga yeteelelo lenyumuko, onda li nda hovela oku mu lombwela kombinga yaJesus, kutya okwa li a nyumuna oonakufya nokwa udaneka kutya ota ka ninga vali ngaho monakwiiwa. (Johannes 5:28, 29) Onda li nde mu lombwela nda ti: “Itashi ka kala tuu shikumwifi okumona vali tate woye! Atusheni ohatu dulu oku ka kala fiyo alushe mOparadisa kombada yedu.” Eendjovo odo oda li da kuma omutima wakaume kange.

Omafimbo amwe vali, kaume kange okwa li ha eta po oikundafanwa ngaashi omafiku axuuninwa ile ehongo lOukwatatu. Onda li handi longifa Ombibeli yaye opo ndi mu ulikile omishangwa di lili noku lili odo tadi holola oshili kombinga yaJehova Kalunga, yaJesus nosho yo yomafiku axuuninwa. (Johannes 14:28; 2 Timoteus 3:1-5) Apa ngoo pa kala pefike okulombwela kaume kange kombinga yaJehova, opo ngoo pa kala pefike handi diladila kombinga yaYe.

Mokweendela ko kwefimbo, ombuto yoshili yOmbibeli oyo ya kala momutima wange, oyo ovadali vange va li va kendabala noudiinini okukuna, oya li ya hovela okukula. Pashihopaenenwa, omafimbo amwe ngeenge nda li koshivilo shonhumba nookaume kange hatu longifa oingangamifi, onda li handi hovele meendelelo okudiladila kombinga yaJehova. Ookaume kange vahapu ova li hava popi kutya ove hole Kalunga, ndele oilonga yavo ohai ulike kutya kave mu hole shili. Molwaashi kanda li nda hala okukala nde va fa, onda li nda mona osho nda li ndi na okuninga. Onda li ndi na okwaalukila kuJehova.

Oshipu okukala u shii kutya ou na okuninga shike, ashike oshidjuu neenghono oku shi ninga. Onda li nda ninga omalunduluko amwe noupu; onda li nda efa po noupu okulongifa oingangamifi. Onda li yo nda efa po ookaume vakulu nokuhovela okukonakona Ombibeli nomukulunhuongalo umwe Omukriste.

Ndele osha li shidjuu neenghono okuninga omalunduluko amwe. Osha li shidjuu unene tuu okupangela ehandu lange. Omafimbo amwe onda li handi shi endifa nawa, ndele peemhito dimwe ohandi nyengwa okupangela ehandu. Onda li handi kala ndi udite ondjo konima yaasho, handi diladila kutya nghi na efiku ndi ka pondole. Molwaashi onda li nda teka omukumo, onda li nda ka popya nomukulunhuongalo oo a li ta konakona naame Ombibeli. Omukulunhuongalo oo okwa li alushe ha tunge omukumo, te shi ningi nelididimiko nononheni. Oshikando shimwe, okwa li a lombwela nge ndi leshe oshitukulwa shimwe mOshungonangelo shi na sha nanghee sha fimana okuhasholola.a Otwa li twa kundafana eenghatu odo handi dulu okukatuka ngeenge nda handuka. Mokweendela ko kwefimbo, onda li nda dula okukala handi pangele ehandu lange kekwafo loshitukulwa osho nosho yo okwiilikana luhapu kuJehova. Hauxuuninwa, onda li nda ninginifwa ndi li umwe womEendombwedi daJehova muAprili 2000. Osho osha li sha hafifa ovadali vange neenghono.

OUWA OO NDA MONA: Paife ondi na ombili yopamadiladilo nosho yo eliudo la koshoka, molwaashi ondi shii kutya ihandi nyateke vali olutu lange noingangamifi ile noluhaelo. Keshe osho handi ningi, kutya nee oilonga, okuya kokwoongala kwopaKriste, ile ohandi hafele omalihafifo onhumba, ohandi kala nda hafa neenghono. Ondi na etaleko liwa li na sha nonghalamwenyo.

Ohandi pandula Jehova omolwovadali vange, ovo inava sholola nande okukwafela nge. Ohandi diladila yo eendjovo daJesus odo di li muJohannes 6:44, odo tadi ti: “Kape na ou ta dulu okuuya kuame okuninga Tate, ou a tuma nge, te mu shili.” Ohandi kala nda tunhukwa neenghono ngeenge handi diladila kunghee Jehova a nana nge opo ndi dule okwaalukila kuYe.

“Onda li nda djuulukwa tate.” — MARCO ANTONIO ALVAREZ SOTO

ODULA OMO A DALWA: 1977

OSHILONGO OMO A DALELWA: CHILE

ONAKUDIWA: ONDA LI MONGUDU HAI DANA EENGALO TADI XWAXWAMEKE ELONGIFO LEENGHONO NOMUNYONENA

ONGHALAMWENYO YANGE YONALE: Onda tekulwa kumeme muPunta Arenas, oshilando shiwa shomuChile, osho shi li moAmerika lokOlukadi. Ovadali vange ova li va topoka eshi nda li ndi na omido nhano, naasho osha li sha ningifa nge ndi kale ndi udite nda ekelwashi. Onda li nda djuulukwa tate.

Meme okwa konakona Ombibeli nEendombwedi daJehova nokwa li ha i naame kokwoongala kwopaKriste kOlupale lOuhamba. Ndele onda li handi kala nda fula onya mondjila molwaashi kanda li ndi hole okwoongala. Eshi nda li ndi na omido 13, onda li nda efa po okuya kokwoongala.

Onda li nda hovela okukala ndi hole omusika nonda li nda mona kutya ondi na ounghulungu womusika. Eshi nda li ndi na omido 15, onda li nda hovela okushika eengalo odo hadi ningi omaweelelo neenghono nosho yo odo tadi xwaxwameke elongifo leenghono nomunyonena, poivilo yeemusika dokomudo, peembaa nosho yo poivilo yopaumwene. Onda li handi endafana novashiki veengalo ovo ve na ounghulungu nosha li sha pendula mwaame ohokwe yeemusika odo da talwa ko diwa okupwilikina. Onda li nda hovela okulihonga omusika kofikola yeemusika yomoshitukulwa. Eshi nda li ndi na omido 20, onda li nda tembukila koshilandopangelo, Santiago, opo ndi ke liwedele ko kehongo lange. Onda li yo nda twikila okudana eengalo odo hadi ningi omaweelelo neenghono nosho yo odo tadi xwaxwameke elongifo leenghono nomunyonena.

Efimbo alishe olo, onda kala ndi udite ndihe na oshilonga. Opo ndi taatae po omaliudo okukala ndi udite ndihe na oshilonga, onda kala handi kolwa nokulongifa oingangamifi pamwe navakwetu vatatu ovo hatu shiki navo eengalo, ovo nda li nda tala ko ve li oukwaneumbo wetu. Onda li ndi na oikala younashibofa oyo ya li hai limonikila meholokepo lange. Onda li handi djala oikutu ilaula, ndi na eendjedi dile neexwiki dile da twa hanga peenho.

Onda kala handi i momalwoodi nosho yo momaupyakadi nopolifi omolwoikala yange. Oshikando shimwe eshi nda li koshi yodungo, onda li nda ponokela ovalandifi voingangamifi ovo va li tave tu piyaaneke nookaume kange. Ovalandifi voingangamifi ova li va denga nge unene ndele handi teka ohamama.

Ovo nda li nda tala ko ookaume kange kopofingo ova li va yahameka nge unene. Onda li nda mona kutya okakadona kange oka kala ke na oihole nakaume kange kopofingo umwe oule womido dihapu, nookaume kange aveshe ova li ve shi holeka nge. Osho osha li sha yahameka nge pamaliudo.

Onda li nda shuna koPunta Arenas, oko nda li nda hovela okuhonga omusika nokulonga ndi li omushiki woviolina. Onda li yo nda twikila okushika nokukwata eengalo odo hadi ningi omaweelelo neenghono nosho yo odo tadi xwaxwameke elongifo leenghono nomunyonena. Onda li nda shakeneka okakadona kawa kedina Sussan, ndele hatu hovele okukala pamwe. Lwopokati opo, Sussan okwa li a mona kutya ina okwa itavela mehongo lOukwatatu ndele ame inandi itavela mulo. Okwa li a pula nge a ti: “Hano oshili oilipi?” Onda li nde mu nyamukula kutya ondi shii kutya ehongo lOukwatatu kali fi loshili ndele itandi dulu oku shi ulika okudja mOmbibeli, ashike ondi shii oo ta dulu oku shi ulika. Onda li nde mu lombwela kutya Eendombwedi daJehova otadi dulu oku mu ulikila oshili okudja mOmbibeli. Opo nee onda li nda ilikana kuKalunga noku mu pula ekwafo, oshinima osho nda kala inandi ninga oule womido dihapu.

Omafiku manini konima yaasho, onda li nda mona omulumenhu umwe a fa omunhu ndi mu shi, ndele handi mu pula ngeenge oku li umwe womEendombwedi daJehova. Nonande omulumenhu oo okwa li a tila neenghono omolweholokepo lange, okwa li a nyamukula nombili omapulo ange e na sha nokwoongala kOlupale lOuhamba. Onda li nda tomhwa kutya omailikano ange okwa nyamukulwa eshi nda shakena nomulumenhu oo. Onda li nda ya kOlupale lOuhamba ndele handi kala omutumba konima lela opo ngeno ovanhu vaha dimbuluke nge. Ndele vahapu ova li va dimbuluka nge molwaashi ova li ve shii nge eshi nda li handi i kokwoongala fimbo nda li okaana. Ova li va hambelela nge nokupapatela nge pahole ndele handi kala nda mbilipalelwa neenghono. Onda li ndi udite nda fa nda alukila keumbo. Eshi nda li nda mona omulumenhu oo a li ha hongo nge Ombibeli eshi nda li okaana, onda li nde mu pula a konakone naame natango.

NGHEE OMBIBELI YA LUNDULULA ONGHALAMWENYO YANGE: Efiku limwe, onda li nda lesha Omayeletumbulo 27:11, oo taa ti: “[Kala] u neendunge, omumwange, hafifa omutima wange.” Onda li nda kumwa okushiiva kutya omunhu wongaho ota dulu okuhafifa Omushiti weshito alishe. Onda li nda mona kutya Jehova oye naanaa tate oo nda kala handi kongo monghalamwenyo yange aishe.

Onda li nda hala okuhafifa Tate yange womeulu nokulonga ehalo laye, ndele onda kala nda pikwa koingangamifi nokoikunwa oule womido dihapu. Onda li nda uda ko ehongo laJesus olo li li muMateus 6:24, tali ti kutya “kaku na ou ta dulu okukalela oovene vavali.” Eshi nda li handi kendabala okuninga omalunduluko, onda li nda kwafelwa kefinamhango olo li li mo 1 Ovakorinto 15:33, tali ti: “Ookaume [vai] otava nyono po eenghedi diwa.” Onda li nda mona kutya itandi dulu okweefa po eenghedindjikilile dii ngeenge onda twikile okukala handi i keenhele da faafana nokweendafana novanhu va faafana. Omayele Ombibeli okwa yela kutya: Onda li ndi na okukatuka eenghatu da kwata moiti opo ndi efe po oinima oyo ya li tai pundukifa nge. — Mateus 5:30.

Osha li shidjuu neenghono okweefa po okupwilikina keengalo odo hadi ningi omaweelelo molwaashi ondi hole omusika. Ndele kekwafo lookaume kange meongalo, onda li nda dula okweefa po okupwilikina kudo. Onda li nda efa po okunwa sha pitilila nokulongifa oingangamifi. Onda li yo nda kulula ko eexwiki neendjedi dange, nokweefa po okudjala oikutu ilaula. Eshi nda li nda lombwela Sussan kutya onda hala okukulula ko eexwiki dange, okwa li a hala okushiiva kutya ohandi ka ninga shike kOlupale lOuhamba. Okwa ti: “Ohandi i pamwe naave ndi ka tale kutya oshike naanaa hashi ningwa kOlupale lOuhamba!” Okwa li a hokwa osho a li a mona ko ndele ta hovele diva okukonakona Ombibeli. Lwopokati opo, ame naSussan otwa li twa hombola. Mo 2008, otwa li twa ninginifwa tu li Eendombwedi daJehova. Otwa hafa okulongela Jehova pamwe nameme.

OUWA OO NDA MONA: Onda fiya po ehafo lihe fi lashili neendafano lookaume ovanaihelele. Natango ondi hole ngoo omusika, ashike ohandi i hoolola noukeka. Ohandi longifa oimoniwa yange opo ndi kwafele oukwaneumbo wange nosho yo vamwe, unene tuu ovanyasha. Onda hala oku va kwafela va mone kutya oinima ihapu oyo i li mounyuni otashi dulika i kale tai monika nawa, ashike “oimbodi yongaho.” — Ovafilippi 3:8.

Onda mona ookaume kashili meongalo lopaKriste omo mu na ombili nohole yashili. Komesho yaaishe, eshi nda ehena kuJehova onda mona Tate.

[Eshangelo lopedu]

[Eendjovo dididilikwedi pepandja 13]

“Onda li nda dula okwaalukila kuJehova molwaashi a nana nge”