OSHIPALANYOLE SHOKOMBADA: ONAINI HATU KA KALA MOUNYUNI MUHE NA ONHONDO?
ONHONDO OUPYAKADI OO U LI MOUNYUNI AUSHE
JONATHAN, okwa dalelwa muAmerika kovadali Ovakorea, nokwa li a ninga oshihakanwa shoutondwe eshi a li okaana. Eshi a kula, okwa li a konga onhele yokukala opo ta diladila kutya ovanhu itava ka kala ve mu tonde omolweholoke po laye ile molwoukwashiwana waye. Okwa li a ninga ndokotola modoolopa i li kolundume laAlaska, mo-U.S.A., omo vahapu ve mu fa. Okwa li ta diladila kutya kodoolopa oyo kaku na outondwe ngaashi kuyavo.
Onghalo kaya li ngaashi a li a teelela, efiku limwe fimbo a li ta yandje ekwafo lopaunamiti komukainhu weedula 25, eshi omunaudu oo a dja mokoma, okwa li ta tale nawa Jonathan nokwa li a hovela oku mu tuka, naasho okwe shi ninga molwaashi okwa li a hongwa okudja kounona waye a kale e tonde Ovakorea. Oshiningwanima osho shinyemateka osha li sha dimbulukifa Jonathan kutya eenghendabala daye dokutembuka nodokutambula ko eputuko lovanhu vokoshitukulwa oko inandi mu kwafela a faduke po onhondo.
Oshimoniwa shaJonathan otashi divilike oushili oo kutya onhondo oi li keshe pamwe mounyuni. Otashi ulike kutya keshe apa pe na ovanhu, ope na onhondo.
Nonande onhondo oi li apeshe, ovanhu vahapu kave i hole. Osho otashi kondjifafana lelalela. Ongahelipi oshinima shonhumba osho shitondike neenghono pomhito opo tuu opo tashi dulu okukala shi li apeshe? Shididilikwedi, vahapu ovo ve tonde onhondo ohava dopa okumona kutya navo ove i na. Mbela naave osho u li ngaho?
OSHIDJUU OKUMONA KUTYA OU NA ONHONDO
Kutya nee otu shi shii kutya otu na onhondo ile hasho, kashipu kufye oku shi didilika mo ngeenge otu i na momitima detu. Ombibeli oya popya kutya omolwashike shi li ngaho eshi ya ti: “Omutima wovene ou nomakoto u dule ashishe.” (Jeremia 17:9) Onghee hano, otashi dulika tu lipukife fye vene mokwiitavela kutya otu hole ovanhu vomihoko adishe. Ile otashi dulika tu tomhafane kutya otu na etomheno lolela lokukala tu tonde ovanhu vomihoko donhumba.
Mbela ngeno oto kala u udite ngahelipi, ngeenge owe lihange monghalo ngaashi ei?
Opo u mone nghee shi li eshongo okudidilika kutya otu na onhondo meni letu, diladila konghalo ei tai landula apa: Natu tye nee oto ende mepandavanda oove auke oufiku. Opo to ende, okwa dja ovalumenhu ovanyasha vavali ovo uhe shii. Otava monika ve na eenghono, naumwe womuvo okwa fa e na sha meke laye.
Mbela oto ka fika pexulifodiladilo kutya ovanyasha ovo ova hala oku ku ningila omatilifo? Otashi dulika wa li nale monghalo oyo ye ku honga kutya ou na okukala wa lungamena eenghalo da tya ngaho, ndele mbela osho otashi ulike ngoo shili kutya owa fika pexulifodiladilo li li mondjila kutya ovanyasha ovo vavali ova nyika oshiponga? Epulo limwe vali la fimana ololo kutya, Mbela oto diladila kutya ovanyasha ovo ovomuhoko ulipi? Enyamukulo loye kepulo olo otali dulu okuholola osho shi li momutima woye. Otashi dulika li ulike kutya ou na onhondo.
Paushili wovene, otu na okudimina kutya atusheni otu na onhondo momitima detu monghedi yonhumba ile yongadi. Nokuli nOmbibeli oya koleka oushili oo kutya onhondo oi li apeshe eshi ya ti: “Omunhu ta tale osho shokombada.” (1 Samuel 16:7) Molwaashi atusheni otu na eamo olo luhapu hali etifa oilanduliko ya nyika oshiponga, mbela ope na ngoo eteelelo kutya ohatu dulu okuxulifa po onhondo monghalamwenyo yetu? Mbela ope na ngoo efimbo opo ounyuni aushe tau ka kala uhe na onhondo?