Oha yadifa ‘omitima detu’

Jehova oku na ko ngoo nasha nafye shili ile ke na ko nasha nokumona oixuna kwovanhu kombada yedu? Enyamukulo lopaMbibeli kepulo olo otali hekeleke omitima detu. Kalunga oku na ko nasha shili novanhu nokwa hala tu hafele onghalamwenyo. Keshe efiku oha efa ovanhu, nokuli naavo vehe na olupandu, va mone ouwa mouwa waye muhapu. Konakona eendjovo domuyapostoli Paulus. — Lesha Oilonga 14:16, 17.

Eshi Paulus a li ta popi novanhu vomuListra ovo va li ihava longele Kalunga, okwa ti: “Omounyuni wonale [Kalunga] okwa efa oiwana aishe i ende neendjila dayo vene. Nande Ye ina kala ine liholola, osheshi okwe mu monifila ouwa, eshi e mu lokifila odula meulu nokwe mu pa omafimbo oshishipo nokwa yadifa omitima deni oipalwifa nehafo.” Eendjovo odo oda li tadi ti shike kovapwilikini vaPaulus?

Ovanhu vomuListra ova li ve udite ko nawa eendjovo daPaulus, molwaashi ova li moshitukulwa shounamapya nova li medu la lyata noha li lokwa nawa. Ndele ngaashi Paulus a li e va dimbulukifa, Kalunga oye a li he va lokifile odula oyo ya li hai kulike oikunonwa yavo. Onghee hano, efimbo keshe va li tava teya eteyo liwa nokuhafela eendja tadi tokola elaka, ova li tava mono ouwa mouwa waKalunga.

Osho Paulus a li a lombwela ovanhu vomuListra otashi tu hongo oilihongomwa i lili noku lili ya fimana kombinga yaJehova Kalunga.

Jehova okwe tu pa emanguluko lokuninga omatokolo. Didilika kutya Jehova okwa efa ovanhu vomoiwana aishe va ‘ende neendjila davo vene.’ Embo lomauyelele ovatoloki vOmbibeli ola ti kutya outumbulilo oo otau dulu okutya “okuninga ngaashi va hala” ile “okuninga osho tava diladila kutya osho sha denga mbada.” Jehova iha fininike ovanhu ve mu longele. Okwe tu pa emanguluko lokuninga omatokolo, sha hala kutya, okudula okuhoolola onghedi yokukalamwenyo oyo twa hala. — Deuteronomion 30:19.

Jehova okwa hala tu mu shiive. Omuyapostoli Paulus okwa ti kutya “ina kala ine liholola.” Embo lomauyelele olo la tumbulwa metetekelo ola ti kutya oshinokotumbulo osho otashi dulu okutolokwa taku ti: “Okwa ulikila ovanhu monghedi ya yela kutya Ye oKalunga a tya ngahelipi.” Eshito laKalunga otali yandje oumbangi wa yela u na sha ‘noinima ihe wetike,’ ile tu tye omaukwatya aye, mwa kwatelwa ouwa, ounongo, eenghono nosho yo ohole. (Ovaroma 1:20) Jehova okwa holola shihapu kombinga yaye mOmbibeli. (2 Timoteus 3:16, 17) Mbela osho itashi yandje oumbangi wa yela kutya okwa hala tu mu shiive?

Jehova okwa hala tu kale twa hafa. Omuyapostoli Paulus okwa ti kutya oha yadifa ‘omitima detu oipalwifa nehafo.’ Nokuli nomulunde oo ina itavela muJehova otashi dulika a lye oikulya oyo tai yadifa omutima waye nokumona ehafo lonhumba monghalamwenyo. Onghee hano, Kalunga okwa hala tu mone ehafo lashili notali kalelele. Ohatu dulu ashike oku li mona ngeenge otwe lihongo oshili kombinga yaye noku i tula moilonga monghalamwenyo yetu. — Epsalme 144:15; Mateus 5:3.

Atusheni ohatu dulu okumona ouwa keshe efiku mouwa waJehova. Omolwashike ito lihongo shihapu shi na sha nanghee to dulu okuulika kutya owa pandula Kalunga oo a yadifa omutima woye “oipalwifa nehafo”?