Omolwashike Kalunga a efa okumona oixuna ku kale po?

KALUNGA OHA KALA E UDITILE NGAHELIPI OKUMONA OIXUNA KWETU?

Michelle: Wa lele po Sophia! Onda hafa eshi nde ku hanga meumbo.

Sophia: Naame onda hafa eshi we uya.

Michelle: Oshikando sha dja ko eshi nda li apa, otwa li twa kundafana kutya Kalunga oha kala e udite ngahelipi eshi hatu mono oixuna.a Owa li wa popya kutya oshinima osho owa kala to shi lipula efimbo lile, unene tuu konima eshi meme woye a li a yahamekelwa moshiponga shohauto. Shitiwa, oku li po ngahelipi paife?

Sophia: Oha ningi ngoo fiku limwe oku li nawa, mulikwao okwa ombokelwa. Ashike nena oku li nawa.

Michelle: Osho oshihafifa. Oshi na okukala shi li eshongo lela okukala u na etaleko liwa monghalo ya tya ngaho.

Sophia: Ou li mondjila. Efimbo limwe ohandi lipula kutya fiyo onaini e na okukala ta mono oixuna ngaho.

Michelle: Oshi li paushitwe okulipula ngaho. Ondi wete kutya oto dimbuluka kutya oshikando sha dja ko onda li nde ku fiila epulo olo kutya omolwashike Kalunga a efa okumona oixuna ku twikile ngeenge oku na eenghono doku ku xulifa po.

Sophia: Heeno, ohandi dimbuluka.

Michelle: Fimbo inatu tala kwaasho Ombibeli tai ti, natu endulule manga oitwa imwe yomwaayo twa li twa kundafana oshikando sha dja ko.

Sophia: Eewa.

Michelle: Otwa li twe lihonga kutya nokuli nomulumenhu umwe omudiinini wopefimbo lOmbibeli okwa li e lipula kutya omolwashike Kalunga a efa okumona oixuna ku kale po. Ashike, Kalunga ka li e mu hanyena eshi a pula epulo olo noka li e mu lombwela kutya okwa pumbwa ashike eitavelo la kola.

Sophia: Osho osha li ediladilo lipe kwaame.

Michelle: Otwa li twe lihonga yo kutya Jehova Kalunga oku tonde okumona ovanhu tava mono oixuna. Pashihopaenenwa, Ombibeli oya ti momaudjuu avo aeshe okwe va “nyikila oluhodi.”b Mbela itashi hekeleke okushiiva kutya Kalunga oha kala e tu uditile onghenda eshi hatu mono oixuna?

Sophia: Heeno, osho.

Michelle: Xuuninwa, otwa li twa dimina kutya okutala keenghono dinenenene dOmushiti wetu, osha yela kutya ota dulu shili okukatuka onghatu efimbo keshe a xulife po okumona oixuna.

Sophia: Osho osho nee ndihe udite ko. Omolwashike Kalunga a efa oinima aishe oyo ii i ningwe ngeenge oku na eenghono doku i xulifa po?

OLYELYE A LI A POPYA OSHILI?

Michelle: Opo tu mone enyamukulo kepulo loye tete natu tale membo lotete lOmbibeli, muGenesis. Mbela ou shii ehokololo li na sha naAdam naEva nosho yo oshiimati sha dilikwa?

Sophia: Heeno, onde lihonga ehokololo olo mofikola yOsoondaxa. Kalunga okwa li e va lombwela vaha lye komuti wonhumba, ashike ova ka lya ko owina.

Michelle: Ou li mondjila. Paife natu ka tale koiningwanima oyo ya twalifa Adam naEva menyono. Oiningwanima oyo otai ke tu pa enyamukulo kepulo olo kutya omolwashike hatu mono oixuna. Kwafele nge u leshe muGenesis etukulwa 3, ovelishe 1 fiyo 5.

Sophia: Eewa. “Ndelenee eyoka la li la lungama li dule oifitukuti aishe yomoixwa Omwene Kalunga e i ninga. Ndele lo ola pula omwalikadi: Kalunga okwa tile tuu shili: nye inamu lya komiti adishe domoshikunino? Ndele omwalikadi okwa nyamukula eyoka: ohatu li oiimati yomiti domoshikunino, ndelenee koiimati yomuti wopokati koshikunino Kalunga okwa tile: nye inamu lya oiimati yao, nye inamu u kuma, mu ha fye. Opo nee eyoka la tya komwalikadi: Nye itamu ka fya shili. Ndelenee Kalunga oku shi shii nokutya, ngenge tamu li [kuo], omesho eni taa pashuka, opo mu shiive ngaashi Kalunga ouwa nowii.”

Michelle: Tangi unene. Paife natu ka kundafane eevelishe odo. Tete didilika kutya eyoka ola popya nomukainhu, Eva. Oshitukulwa shimwe shOmbibeli osha ulika kutya Satana Ondiaboli oye lela a popya naEva okupitila meyoka.c Satana okwa li a pula Eva kombinga yoshipango shaKalunga shi na sha nomuti wonhumba. Mbela owa didilika oilanduliko oyo Kalunga a ti Adam naEva otava ka mona ngeenge ova li kuo?

Sophia: Heeno, okwa ti otava ka fya.

Michelle: Osho naanaa. Ashike, meendjovo daye da shikula ko odo a popya okwa li ta lundile Kalunga filufilu. Didilika osho a ti: “Nye itamu ka fya shili.” Satana okwa li a popya kutya Kalunga omunaipupulu.

Sophia: Inandi uda nande onale oshitukulwa osho shehokololo eli.

Michelle: Eshi Satana a popya kutya Kalunga omunaipupulu, osha etifa po omhata oyo tai pula efimbo okupongololwa po. Mbela ou shii kutya omolwashike?

Sophia: Nghi shi shii lela.

Michelle: Pamwe nandi shi faneke ngaha. Natu tye nee ngeno efiku limwe onde uya kwoove ndele handi ti kutya ondi ku dule meenghono. Oto ka ulikila nge ngahelipi kutya hasho?

Sophia: Otu na okuninga po sha opo tu tale ngeenge osho to popi oshoshili.

Michelle: Osho naanaa. Otashi dulika tu hoolole oshinima shidjuu nokutala kutya olyelye ta dulu oku shi tumba po. Paulelalela, oshipu okumona kutya olyelye e na eenghono.

Sophia: Paife ondi wete kutya owa hala okutya shike.

Michelle: Ndele ongahelipi ngeenge ngeno ponhele yokutya ondi ku dule meenghono, onda ti ame omunashili ndi ku dule? Osho oshinima shidjuu, hasho mbela?

Sophia: Heeno osho.

Michelle: Kakele kaasho, okukala omunashili inaku fa eenghono odo hatu dulu okuulika moinima yanafangwa.

Sophia: Ou li mondjila.

Michelle: Onghedi imwe omo hatu dulu okupongolola po omhata oyo oyo okweefa pa pite efimbo la wana opo vamwe ve shi limonene kutya olyelye lela omunashili.

Sophia: Oko okutomhafana ku li pandunge.

Michelle: Paife natu ka tale vali kehokololo olo li li muGenesis. Mbela Satana okwa ti oku na eenghono e dule Kalunga?

Sophia: Ahowe.

Michelle: Kalunga okwa li ta dulu okuulika divadiva kutya Satana okwa puka. Ashike ponhele yaasho, Satana okwa ti kutya omunashili e dule Kalunga. Paulelalela, okwa li a lombwela Eva ta ti, ‘Kalunga ote mu fufya, ashike ame ohandi mu lombwele oshili.’

Sophia: Osho oshihokwifa shili.

Michelle: Omolwounongo waye, Kalunga oku shii kutya onghedi ya denga mbada yokupongolola po omhata oyo okuteelela pa pite efimbo la wana. Mokweendela ko kwefimbo, otashi ka yela mo kutya olyelye a popya oshili naau a popya oipupulu.

OMHATA YA FIMANA

Sophia: Ndele eshi Eva a fya, mbela osho inashi ulika kutya Kalunga okwa popya oshili?

Michelle: Ohatu dulu kutya osho. Ndele omhata yaSatana oya li ya kwatela mo shihapu. Natu tale natango movelishe 5. Mbela owa didilika vali osho Satana a lombwela Eva?

Sophia: Okwa ti kutya ngeenge okwa li oshiimati, omesho aye otaa pashuka.

Michelle: Osho naanaa, nonokutya ota ka “shiiva ngaashi Kalunga ouwa nowii.” Satana okwa li ta ti kutya Kalunga ota ngungunine ovanhu oshinima shonhumba shiwa.

Sophia: Ou li mondjila.

Michelle: Naasho osha li eshongo linene.

Sophia: Owa hala okutya ngahelipi?

Michelle: Neendjovo odo, Satana okwa li ta ti kutya Eva nosho yo ovanhu aveshe otava dulu oku shi endifa nawa nopehe na okupangelwa kuKalunga. Moshinima eshi, Jehova oku shii yo kutya onghedi ya denga mbada omo ta dulu okuungaunga neshongo olo okweefa Satana a ulike kutya osho ta popi oshoshili. Onghee hano, Kalunga okwa efa Satana a pangele ounyuni ou oule wefimbo. Osho osha yelifa kutya omolwashike tu wete okumona oixuna apeshe; omolwaashi Satana oye lela omupangeli wounyuni ndele haKalunga.d Ashike ope na onghundana iwa.

Sophia: Oilipi oyo?

Michelle: Ombibeli otai hongo eeshili diwa dopavali kombinga yaKalunga. Yotete, Jehova oha kala e na ko nasha nafye ngeenge hatu mono oixuna. Pashihopaenenwa, diladila keendjovo dohamba David, odo da popiwa mEpsalme 31:8. David okwa mona oixuna neenghono monghalamwenyo yaye, ashike didilika osho a li a ilikana kuKalunga. Kwafele nge u leshe ovelishe oyo?

Sophia: Eewa. Otai ti: “Handi hafele nokunyakukilwa ouwanghenda woye, shaashi wa tala oudjuu wange, nowa dimbulukwa omatilifo omwenyo wange.”

Michelle: Nonande David okwa li a mona oixuna, okwa li a hekelekwa eshi a shiiva kutya Jehova okwa mona eenghalo adishe odo a pita mudo. Mbela ou wete ediladilo olo tali hekeleke, olo okutya Jehova oku wete keshe shimwe, kutya nee omauyahame etu opamaliudo oo ovanhu vakwetu itava dulu oku a uda ko filufilu?

Sophia: Heeno, osho.

Michelle: Oshili onhivali oyoyo kutya Kalunga ita efa okumona oixuna kwetu ku kalelele. Ombibeli otai hongo kutya mafiku ota ka xulifa po ounyuni ou woukolokoshi tau pangelwa kuSatana. Nota ka xulifa po filufilu oinima aishe ii oyo tai ningwa, mwa kwatelwa omaupyakadi oo ove nameme woye mu na. Nandi aluke moshivike tashi uya ndi uye ndi ku ulikile kutya omolwashike hatu dulu okukala noushili kutya mafiku Kalunga ota ka xulifa po okumona oixuna akushe?e

Sophia: Heeno, oshi li nawa.