OSHIPALANYOLE SHOKOMBADA | OMBIIBELI OTAI TI SHIKE KOMBINGA YOVAENGELI?
Oshili kombinga yovaengeli
Mbela owa hala okushiiva oshili kombinga yovaengeli, kutya ovo oolyelye, ova dja peni nonokutya ohava ningi shike? Eendjovo daKalunga da nwefwa mo odo adike tadi dulu oku tu pa omanyamukulo. (2 Timoteus 3:16) Ombiibeli otai tu lombwele shike?
Ngaashi ashike Kalunga e na olutu lopamhepo, ovaengeli navo ove li oishitwa yopamhepo ihe na “onhumba nomakipa.” Ovaengeli ovadiinini ohava kala meulu nohava dulu okuya koshipala shaKalunga. — Lukas 24:39; Mateus 18:10; Johannes 4:24.
Nale omafimbo amwe ovaengeli ova li have lihololele ovanhu ve li momalutu opanhu opo va wanife po oinakuwanifwa oyo va li va pewa kuKalunga kombada yedu ndele konima tava shuna momalutu avo opamhepo ngeenge va mane oilonga yavo. — Ovatokolipangeli 6:11-23; 13:15-20.
Nonande Ombiibeli oya popya ovaengeli onga ve li ovalumenhu nova li alushe hava kala molupe lovalumenhu ngeenge tave lihololele ovanhu, mokati kavo kamu na etongoko loukashike kookanhu. Ihava hombola noihava dala ovaengeli vakwao. Natango, ovaengeli kava li tete ovanhu kombada yedu, kutya nee ouhanana, ounona, ile ovakulunhu. Ovaengeli ova li va shitwa kuJehova; nomolwaasho Ombiibeli tai va ifana “ovana ovamati vaKalunga.” — Job 1:6; Epsalme 148:2, 5.
Ombiibeli oya popya kombinga ‘yomalaka ovanhu novaengeli,’ tai ulike kutya oishitwa yopamhepo oi na omalaka oo hai popi. Nonande Kalunga okwa longifa ovaengeli opo a popye novanhu, ina pitika ovaengeli va longelwe ile va ilikanwe. — 1 Ovakorinto 13:1; Ehololo 22:8, 9.
Ope na ovaengeli omayovi omilongo, tashi dulika ve li omabiliyona.a — Daniel 7:10; Ehololo 5:11.
Ovaengeli ove li “ovaladi ovanaenghono.” Ove na eenghono neendunge ve dule ovanhu kokule. Ohava dulu okutuka ponhapo yopombada, ve dule oinima yokombada yedu. — Epsalme 103:20; Daniel 9:20-23.
Nonande ovaengeli ove na eendunge dihapu neudeko lopamhepo, ove na omangabeko, nope na oinima imwe oyo vehe shii. — Mateus 24:36; 1 Petrus 1:12.
Ovaengeli ova shitwa ve na omaukwatya a fa aKalunga nove na emanguluko lokuninga omatokolo. Onghee hano, ngaashi ovanhu, otava dulu okuhoolola okulonga osho sha yuka ile osho shii. Mupya munene, ovaengeli vamwe inava dulika kuKalunga. — Judas 6.
a Omayovi omulongo lwomayovi omulongo otaa ningi omamiliyona 100. Ashike Ehololo ola popya ovaengeli “omayovi omulongo lwomayovi omulongo.” Osho otashi ulike kutya ope na oishitwa yopamhepo omamiliyona omafele, tashi dulika omabiliyona.