Owe shi shiiva tuu?

Mbela ovashingifi ovo va li hava landifa oimuna motembeli yaJerusalem otava dulu okwiifanwa “ovanyeki?”

SHE likolelela kehokololo olo li li mEvaengeli laMateus, ‘Jesus okwa ya motembeli yaKalunga; ndele okwa ta mo aveshe va li mo tava lande naava tava landifile mo, ndele okwa undulila poshi oitaafula yovakumaani voimaliwa noipundi yovalandifi veenghuti. Ndele okwa tya kuvo: Okwa shangwa: ‘Ongulu yange i nokwiifanwa ongulu yeilikano,’ ndele nye omwe i ninga oshikololo shovanyeki.’ — Mat. 21:12, 13.

Ondjokonona yOvajuda otai ulike kutya ovalandifi vomotembeli ova li hava ungaunga novalandi vavo nai molwaashi ova li have va landifa oinima kondilo. Pashihopaenenwa, oshishangomwa shonale shOvajuda osha yandja ouyelele woshiningwanima osho sha li sha ningwa mefelemudo lotete O.P., eshi ondado yeenghuti mbali dokuninga omaxwikiloyambo ya londa ndele tai ningi odenari yoshingoli. Naayo oya li i fike pamwe nondado yomunailonga oo ehe na owino tashi dulika a futwe moule womafiku 25. Eehepele oda li da pitikwa di kale hadi yandje omayambo eenghuti; ashike nokuli nondado youdila ovo oya li ya londa pombada. (Lev. 1:14; 5:7; 12:6-8) Rabbi Simeon ben Gamaliel, okwa li e lidopa mo moshinima osho ndele ta shunifa pedu omuvalu womayambo oo kwa li e na okuyandjwa, naasho osha ka ningifa ondado yeenghuti mbali i shune pedu shi dulife pwaayo nokuli yonale.

Okutala kouyelele oo, okwa li sha yuka eshi Jesus a ifana ovalandifi vomotembeli kutya “ovanyeki” omolwolwisho lavo nokuhepeka ovanhu kwavo.