Etukulwa 103

Jesus ta i vali kotembeli

JESUS novahongwa vaye ova li muBetania oufiku utitatu okudja eshi va li va dja kuJeriko. Ongula inene yOmaandaxa, 10 aNisan, ova li va ya mondjila va yuka kuJerusalem. Ashike Jesus okwa li a fya ondjala, nomolwaasho eshi a li a mona omukwiyu wonhumba u na omafo, okwa li a ya kuo a ka tale ngeenge pamwe ou na eenghwiyu.

Omukwiyu oo owa li wa hapa diva shihe fi pefimbo, molwaashi omikwiyu ohadi pi muJuni, nopefimbo opo osha li muMarsa. Jesus okwa li ta diladila kutya molwaashi omukwiyu oo owa hapa diva, otashi dulika yo wa pya. Ashike hasho sha li ngaho, nonande omafo oo a li komukwiyu okwa li tae u monikifa wa fa u na oiimati. Opo nee Jesus okwa li a finga omukwiyu oo a ti: “Inaku kala vali ou ta li oshiimati shomuove fiyo alushe.” Oilanduliko yeendjovo daJesus nosho yo eityo lado oya li ya ka holoka mefiku la landula ko.

Jesus novahongwa vaye ova li va twikila olweendo lavo, nova li ve li pokufika muJerusalem. Opo nee Jesus okwa li a ya kotembeli, oyo a li a konakona efiku la tetekela. Ndele efiku olo okwa li a katuka eenghatu, ngaashi a li a ninga omido nhatu da pita eshi a li a ya kOpaasa yomo 30 O.P. Jesus okwa li a taataa ovanhu ovo va li tava landifile notava lande oinima motembeli, ndele ta undula oitaafula yovakumaani voimaliwa nosho yo oimbaba yaavo va li tava landifa eenghuti. Ka li nokuli a efa nande oumwe a humbate oshiyuma ta pitile motembeli.

Jesus okwa li a tangunina ovanhu ovo va li tava kumaana oimaliwa notava landifile oinamwenyo motembeli, a ti: “Hamba, inaku shangwa: ongulu yange i nokwiifanwa ongulu yeilikano yovanhu aveshe? Ndele nye omwe i ninga oshikololo shovanyeki.” Ovanhu ovo ova li ovanyeki molwaashi ova li tava pula oimaliwa ya pitilila okudja kovanhu ovo va li va pumbwa oinamwenyo yokuninga omayambo. Onghee hano, Jesus okwa li a tala ko ovashingifi ovo ve li ovanyeki ile ovanyokomi.

Eshi ovapristeri ovakulunhu, ovanongo vomishangwa nosho yo ovakulunhu va li va uda osho Jesus a ninga, ova li natango va kendabala oku mu dipaifa. Kungaho, ova li va ulika kutya kave na efiku va ninge omalunduluko. Ndele nande ongaho, kava li ve shii kutya nava dipae Jesus ngahelipi, molwaashi ovanhu aveshe ova li va ongala tava pwilikine kuye.

Kakele kOvajuda vopambelela, ovanhu ovo va li vehe fi Ovajuda navo ova li ve uya kOpaasa, nova li va ninga veitavelo lOshijuda. Ovagreka vamwe, tashi dulika ovo va li ve lidilulula, ova li ve uya kuFilippus ndele tava pula va mone Jesus. Filippus okwa li a ya kuAndreas, tashi dulika a ka pule ngeenge okwoongala kwa tya ngaho otaku wapala ngoo. Jesus otashi dulika a li natango motembeli, nOvagreka ova li tava dulu oku mu mona.

Jesus okwa li e shi shii kutya oku na ko ashike omafiku manini fimbo ina fya, onghee hano, okwa li a yelifa nelungi onghalo oyo a ti: “Efimbo ola fika, Omona wOmunhu a fimanekifwe. Oshilishili ohandi mu lombwele: Omuma yolulya ngenge itai wile medu ndee itai file mo, otai likalele aike. Ndele ngenge tai file mo, otai dala eemuma dihapu.”

Omuma imwe yoshilya kai na ongushu ya sha. Ndele ongahelipi ngeenge oya kunwa medu ndele “tai file mo”? Otai mene ndele mokweendela ko kwefimbo tai kulu ndele tai dala omutwe u na eemuma dihapudihapu. Sha faafana, Jesus okwa li ashike omunhu umwe a wanenena. Ndele eshi a li ta ka fya e li omudiinini kuKalunga, okwa li ta ka kala oupitilo oo okupitila muo ovanhu ovadiinini, ovo ve na oikala yokuliyamba ya fa yaye, tava dulu okumona omwenyo waalushe. Jesus okwa ti: “Ou e hole omwenyo waye, ote u kanifa, naau ta tondo omwenyo waye mounyuni ou, oye te u diininine omwenyo waalushe.”

Osha yela kutya Jesus ka li ashike ta diladila kombinga yaye mwene, molwaashi okwa li a yelifa a ti: “Ngenge pe na ou ta kalele nge, [na] shikule nge; naapa ndi li, omupiya wange oko ta ka kala. Ndele ngenge pe na ou ta kalele nge, Tate ote mu fimaneke.” Kai fi tuu ondjabi inene okulandula Jesus noku mu longela! Ondjabi oyo oi na sha noku ka tumbalekwa kuXe, opo omunhu a ka kale pamwe naKristus mOuhamba.

Molwaashi Jesus okwa li te lipula shi na sha naashi ta ka monifwa oixuna neenghono nosho yo efyo olo a li ta ka fya, okwa ti: “Paife omwenyo wange owa tukuluka, ndee handi ti ngahelipi? Tate, [xupife] nge mokafimbo aka.” Mbela Jesus okwa li ta dulu okuhenuka osho sha li tashi ke mu ningilwa? Hasho nandenande, molwaashi okwa ti: ‘Omolwaashi nde uya mokafimbo tuu aka.’ Jesus okwa li e li metwokumwe nomalongekido aKalunga aeshe, mwa kwatelwa efyo lopayambo olo a li ta ka pita mulo. Mateus 21:12, 13, 18, 19; Markus 11:12-18; Lukas 19:45-48; Johannes 12:20-27.

▪ Omolwashike Jesus a li e shii pamwe ota hange ko eenghwiyu komukwiyu oo a li a mona nonande kasha li efimbo leenghwiyu?

▪ Omolwashike Jesus a li a popya kutya ovanhu ovo va li tava landifile motembeli ‘ovanyeki’?

▪ Omonghedi ilipi Jesus a fa omuma yoshilya oyo ya fya?

▪ Jesus okwa li e udite ngahelipi kombinga yokumona oixuna nokufya kwaye?