Natu longe pamwe naJehova efiku keshe

1. Omeenghedi dilipi hatu dulu okulonga pamwe naJehova?

OSHA kala nale elalakano lOmushiti ovanhu va wanenena va longe pamwe naye eshi ta wanifa po omalalakano aye. Nonande ovanhu kunena inava wanenena, ovanhu ovadiinini otava dulu okulonga pamwe naJehova efiku keshe. Pashihopaenenwa, otwa ninga “ovalongi pamwe naKalunga” eshi hatu udifa onghundana iwa yOuhamba waye nosho yo eshi hatu ningi ovanhu ovahongwa. (1 Kor. 3:5-9) Diladila ashike koufembanghenda oo tu na wokulongela kumwe nOmushiti omunaenghono weshito alishe moilonga oyo a tala ko ya fimana. Ashike okuudifa nokuninga ovanhu ovahongwa hako akuke eenghedi odo hatu dulu okulonga pamwe naJehova. Moshitukulwa eshi, ohatu ka konakoneni eenghedi dimwe omo hatu dulu okuninga ngaho, ngaashi okukwafela omaukwaneumbo etu nosho yo Ovakriste vakwetu, okuyakula vamwe, okuliyamba moilonga yopauteokratika nosho yo okutamununa mo oilonga yetu iyapuki. — Kol. 3:23.

2. Omolwashike shihe li pandunge okuyelekanifa osho ho ningi opo u yambidide elalakano laJehova naasho vamwe hava ningi?

² Eshi hatu konakona oshitukulwa eshi, ino yelekanifa osho to dulu okuningila Jehova naasho vamwe tava dulu oku mu ningila. Dimbuluka kutya omido, oukolele, eenghalo nosho yo okudula kwovanhu okwa yoolokafana. Omuyapostoli Paulus okwa ti: “Omunhu keshe na konakone oilonga yaye mwene nhumbi i li, opo a kale e nelitango molwaye mwene, hamolwamukwao.” — Gal. 6:4.

KWAFELA OUKWANEUMBO WENI NOSHO YO OVAKRISTE VAKWENI

3. Omolwashike taku dulu okutiwa kutya keshe umwe oo ha file oshisho oukwaneumbo wavo ota longele kumwe naKalunga?

³ Jehova okwa teelela ovapiya vaye va file oshisho omaukwaneumbo avo. Pashihopaenenwa, otashi dulika wa pumbwa okulonga opo u yambidide ovaholike voye pashimaliwa. Ovakulukadi vahapu ohava kala peumbo opo va file oshisho ounona. Ovanyasha vamwe otashi dulika ve na okufila oshisho ovadali vavo ovo tava yahama. Oinima oyo oya pumbiwa. Eendjovo daKalunga oda ti: “Ou iha file vakwao oshisho naunene ava vambulaye, ye okwe lidimbika eitavelo noku dulike kwaau ehe fi omwiitaveli.” (1 Tim. 5:8) Ngeenge ou na oinakuwanifwa ya tya ngaho, otashi dulika ito dulu okulitulila po efimbo lihapu momalipyakidilo opamhepo ngaashi wa hala. Ashike ino sholola. Jehova oha kala a hafa ngeenge to file oshisho oukwaneumbo weni. — 1 Kor. 10:31.

4. Ongahelipi ovadali tava dulu okupitifa komesho oinima yOuhamba ponhele yoinima yavo vene, noidjemo ilipi tava ka mona?

⁴ Ovadali Ovakriste ohava longo pamwe naJehova ngeenge tava kwafele ovana vavo ve litulile po omalalakano opamhepo. Vahapu ovo va ninga ngaho lwanima ova ka mona ovana tava i moilonga yefimbo li yadi nova ka longela keenhele di li kokule nomaumbo avo. Vamwe ova ninga ovatumwa, vamwe ova ka kokola ondjila oko ku na omhumbwe inene yovaudifi navamwe otava longele koBetel. Otashi dulika oshinano shi imbe oilyo youkwaneumbo i kale hai kala pamwe luhapu ngaashi ya hala. Ndele nande ongaho, ovadali ovo hava ningi omaliyambo ohava tu omukumo ovana va twikile noinakuwanifwa yavo. Omolwashike mbela? Omolwaashi ova mona ehafo linene nohava kala va mbilipalelwa eshi ve shii kutya ovana ova pitifa komesho oinima yOuhamba. (3 Joh. 4) Otashi dulika ovadali vahapu hava kala ve udite ngaashi Hanna, oo a ti kutya okwa “yandja” omona Samuel kuJehova. Ovadali ovo ova tala ko elongelokumwe la tya ngaho li li oufembanghenda munene. Inava hala oinima i kale monghedi imwe i lili. — 1 Sam. 1:28.

5. Ongahelipi to dulu okukwafela oilyo yeongalo leni? (Tala efano pehovelo loshitukulwa.)

⁵ Ngeenge ku na oinakuwanifwa idjuu moukwaneumbo weni, mbela ito dulu okukwafela Ovakriste vakweni ovo hava file oshisho ovo tava yahama, ovanamido ile ovo ve na omhumbwe? Omolwashike ito talaatala meongalo leni nokudidilika ovo va pumbwa ekwafo? Otashi dulika u kale efimbo nomudali omunamido womumwameme oo he mu file oshisho ofimbo ye ta ungaunga vali noinima imwe. Ile otashi dulika u kwafele ovo va pumbwa ekwafo moku va twaalela kokwoongala, moku ka landa ko koinima yavo, moku ka futa oifutomwa yavo, ile va ka talele po umwe oo e li moshipangelo. Mokuninga ngaho, otashi dulika to longele kumwe naJehova eshi ta nyamukula eilikano lonhumba. — Lesha 1 Ovakorinto 10:24.

KALA HO YAKULA VAMWE

6. Oshike sha kwatelwa mo mokuyakula vamwe?

⁶ Ovalongi pamwe naKalunga ohava didilikwa mo omolwokuyakula vamwe kwavo. MOmishangwa dopaKriste dOshigreka, outumbulilo “okuyakula ovaenda” otau ti ‘okuyakula ovaendanandjila nolune.’ (Heb. 13:2) MEendjovo daKalunga omu na omahokololo oo tae tu kwafele tu ulike ohole ya tya ngaho. (Gen. 18:1-5) Ohatu dulu okukonga eemhito tu kwafele vamwe, kutya nee “oovakwetu vomeitavelo” ile hasho. — Gal. 6:10.

7. Omolwashike tu na okuyakula ovaenda ovo ve li moilonga yefimbo li yadi?

⁷ Mbela ito dulu okulonga pamwe naKalunga mokuyakula ovaenda ovo ve li moilonga yefimbo li yadi? (Lesha 3 Johannes 5, 8.) Luhapu omafimbo a tya ngaho ohaa yandje omhito ‘yokuhekelekafana.’ (Rom. 1:11, 12) Natu ka tale koshihopaenenwa shaOlaf. Ota dimbuluka omido da ya kutya kapa li umwe meongalo a li ta dulu okupa omupashukilishikandjo, oo a li ina hombola, onhele yokunangala. Olaf okwa li a pula ovadali vaye ovo vehe fi Eendombwedi ngeenge omupashukilishikandjo ota dulu okukala meumbo lavo. Ova li va dimina, ashike ova ti Olaf oku na okunangala ketyofa. Nonande okwa li a nangala ketyofa, oshi shii okupandulwa. Olaf okwa ti: “Kasha li tuu oshivike shitunhula! Ame nosho yo omupashukilishikandjo otwa li hatu penduka ongula keshe hatu kundafana oikundafanwa ihokwifa eshi hatu li oshuumbululwa. Etwomukumo olo nda mona ola li le linyengifa nge ndi ye moilonga yefimbo li yadi.” Oule womido 40, Olaf okwa kala moilonga youtumwa ya yoolokafana.

8. Omatomheno elipi tu na okuulikila vamwe onghenda nonande potete otava monika va fa vehe na olupandu? Yandja oshihopaenenwa.

⁸ Oto dulu okuulikila ovo uhe shii nale ohole meenghedi dihapu, nonande potete otashi dulika vehe ku pwilikine. Natu ka tale koshihopaenenwa shimwe. Eshi omuudifi umwe wokoSpain a li ta ningi ekonakonombiibeli naYesica, oo a dja koEcuador, okwa li a didilika kutya ota lili. Omuudifi okwa li e mu pula kutya omolwashike ta lili. Yesica okwa ti kutya ofimbo ina tembuka okwa li a hepa nefiku limwe ka li e na oikulya. Okwa li ashike e na omeva oo a li ta dulu okupa okamonakadona. Yesica okwa li ta kendabala oku ka kofeka eshi a li ta ilikana a mone ekwafo. Diva konima yaasho, Eendombwedi mbali oda li de mu talela po, ashike Yesica ka li a ungaunga nado nawa nokwa li a taula po oshishangomwa osho a li a pewa kovamwameme. Okwa li e va pula a ti: “Ei oyo oikulya mwa hala ndi pe okaana kange?” Ovamwameme ova li va kendabala oku mu hekeleka, ashike eenghendabala davo kada li da kwafa sha. Lwanima, ovamwameme ovo ova li va fiya okambaba koikulya poshivelo. Yesica okwa li a kumwa konghenda oyo a ulikilwa nokwa li a uda nai omolwokuhenolupandu eshi Kalunga a nyamukula eilikano laye. Ashike paife okwa tokola okulongela Jehova. Okuyandja kwavo nehalo liwa inaku eta tuu oidjemo iwa! — Omuud. 11:1, 6.

OILONGA YELIYAMBO

9, 10. (a) Opoiningwanima ilipi yopefimbo lOmbiibeli pa li hapa kala pa pumbiwa ovaliyambi mokati koshiwana shaKalunga? (b) Omoinima ilipi meongalo kunena ovalumenhu ovo ve na ehalo tava dulu okukwafela?

⁹ Poiningwanima ya yoolokafana mondjokonona yOvaisrael vonale, opa li hapa kala pa pumbiwa ovaliyambi. (Ex. 36:2; 1 Omaf. 29:5; Neh. 11:2) Kunena, naave ou na eemhito dihapu odo to dulu okulongifa opo u yambe po efimbo, oiniwe nosho yo ounghulungu woye u kwafele ovamwatate novamwameme. Oto ka mona ehafo linene nosho yo omanangeko noupuna mahapu ngeenge owa ningi omaliyambo.

¹⁰ Eendjovo daKalunga otadi ladipike ovalumenhu momaongalo va longe pamwe naJehova mokulalakanena oinakuwanifwa. (1 Tim. 3:1, 8, 9; 1 Pet. 5:2, 3) Ovo hava ningi ngaho ova hala okukwafela vamwe palutu nosho yo pamhepo. (Oil. 6:1-4) Mbela ovakulunhuongalo ove ku pula u kale omuyakuli ile u kwafele noishangomwa, noitukulwa, nokuwapekulula, ile moinima vali imwe meongalo? Ovo hava wanifa po oinakuwanifwa oyo otava dulu oku ku lombwela kutya okukwafela vamwe ohaku eta ehafo linene.

11. Ongahelipi omumwameme umwe a li a mona ouwa moukaume oo a li a panga navamwe pefimbo lokutunga?

¹¹ Ovo hava kufa ombinga moilonga oyo luhapu ohava pange oukaume novanhu vape. Diladila koshihopaenenwa shaMargie, omumwameme oo a kala ta longo moilonga yokutunga Omalupale Ouhamba oule womido 18. Momukokomoko womido odo, okwa kala ta deula ovamwameme ovanyasha. Okwa mona kutya onghedi ya tya ngaho oya denga mbada mokutwaafana omukumo pamhepo. (Rom. 1:12) Eshi Margie a li a taalela omaupyakadi monghalamwenyo yaye, okwa li a tuwa omukumo kwaavo a li a panga navo oukaume pefimbo lokutunga. Mbela owe liyambele ngoo nale u ye moilonga yokutunga? Nonande ou na ounghulungu ile ku na sha, mbela ito dulu okuliyamba?

12. Ongahelipi to dulu okukwafela ovo va dengwa koiponga yopaushitwe?

¹² Ngeenge opa holoka oiponga yopaushitwe, oshiwana shaKalunga ohashi mono eemhito dokulonga pamwe naKalunga mokukwafela ovamwatate meenghedi tadi longo. Pashihopaenenwa, ohashi yambidida pashimaliwa ovo va kumwa. (Joh. 13:34, 35; Oil. 11:27-30) Onghedi imwe vali tai longo oyo okukwafela mokuwapaleka ile mokutungulula. Gabriela, omumwameme a dja koPoland oo eumbo laye la hanaunwa po kefundja, okwa li a hafa eshi ovamwatate vokomaongalo opopepi va li ve uya oku mu kwafela. Okwa ti: “Inandi hala okupopya kombinga yoinima oyo nda kanifa, molwaashi oyo oinima ashike yopamaliko. Ponhele yaasho, onda hala oku mu lombwela kombinga yaasho nda likola. Oshimoniwa osho osha kwafela nge ndi mone kutya okukala oshitukulwa sheongalo lopaKriste oshi li oufembanghenda we likalekelwa nosho yo odjo yehafo nembilipalelo.” Vahapu ovo hava mono ekwafo konima yoshiponga shopaushitwe ohava mono ouwa mekwafo olo tava pewa. Ovo hava longo pamwe naJehova mokuyandja ekwafo ohava kala va mbilipalelwa. — Lesha Oilonga 20:35; 2 Ovakorinto 9:6, 7.

13. Ongahelipi okuliyamba taku dulu okupameka ekwatafano letu naJehova? Yandja oshihopaenenwa.

¹³ Stephanie nosho yo ovaudifi vamwe ova mona ehafo mokulonga pamwe naKalunga eshi tava kwafele Eendombwedi odo de uya koUnited States di li eenhauki. Ova li va kwafela omaukwaneumbo oo a dja koitukulwa oyo ya kumwa koita a mone omaumbo nosho yo oku a wapekulula. Stephanie okwa ti: “Otwa li twe linyengifwa kehafo nosho yo kolupandu lavo eshi va ulikilwa ohole youmwainafana kovamwatate womounyuni aushe. Omaukwaneumbo oo okwa li taa diladila kutya otwe a kwafela, ashike paulelalela oo e tu kwafela. Ohole, oukumwe, eitavelo nosho elineekelo muJehova olo twa mona ola pameka ohole yetu yokuhola Jehova, naasho oshe tu ningifa tu kale tu na olupandu linene loinima aishe oyo hatu mono okupitila mehangano laye.”

TAMUNUNA MO OILONGA YOYE

14, 15. (a) Omuprofeti Jesaja okwa li a ulika omhepo ilipi? (b) Ongahelipi ovaudifi vOuhamba kunena tava dulu okuhopaenena omuprofeti Jesaja?

¹⁴ Mbela owa hala okulonga pamwe naJehova pauyadi? Mbela oto ka kala ngoo wa hala okutembuka u ka longe oko ku na omhumbwe inene yovalongi mehangano laye? Oshoshili kutya ovapiya vaKalunga kave na okutembukila kokule nomaumbo opo va ulike kutya ova hala okulonga shihapu. Ashike ovamwatate novamwameme vamwe eenghalo davo ohadi va pitike va tembukile keenhele dokokule. Ove na ehalo ngaashi omuprofeti Jesaja. Eshi Jehova a pula a ti: “Olyelye handi mu tumu? Nolyelye te tu ile ko?” okwa nyamukula a ti: “Aame ou, tume nge!” (Jes. 6:8) Mbela naave ou na ehalo neenghalo doye otadi shi pitike u ka longele oko ku na omhumbwe? Mbela ope na omhumbwe yashike?

¹⁵ Shi na sha noilonga yokuudifa nosho yo yokuninga ovanhu ovahongwa, Jesus okwa ti: “Oilya oi li po ihapu, ndele ovatei ovo ovanini. Ilikaneni hano Omwene weteyo, a tume ovatei keteyo laye.” (Mat. 9:37, 38) Mbela ito dulu oku ka longela oko ku na omhumbwe inene, u li omukokolindjila? Ile mbela ito dulu okukwafela umwe a ninge ngaho? Ovamwatate novamwameme vahapu ova mona kutya onghedi ya denga mbada omo hatu dulu okuulika ohole yetu yokuhola Kalunga nosho yo ovanhu vakwetu, oyo oku ka kokola ondjila koitukulwa oko ku na omhumbwe inene yovateyi. Mbela ope na vali eemhito dimwe omo to dulu okutamununa mo oukalele woye? Ohashi eta ehafo linene okuninga ngaho.

16, 17. Eemhito vali dilipi u na ngeenge owa hala okulonga shihapu moilonga yaJehova?

¹⁶ Mbela ito dulu oku ka kwafela koBetel ile moilonga yokutunga, pakafimbo ile u kale ho longo to di keumbo? Opa pumbiwa oohandimwe ovo tava dulu okulongela Jehova keshe opo tava tuminwa nosho yo oshilonga keshe tava pewa. Otashi dulika va ka longe koshikondo oko ku na omhumbwe nonande ove na ounghulungu wonhumba moshinima shimwe shi lili. Jehova oha pandula omhepo yeliyambo yaavo ve liyamba va ka longe oko ku na omhumbwe. — Eps. 110:3.

¹⁷ Mbela owa hala okumona edeulo la wedwa po opo u kale wa pyokoka eshi to wanifa po oilonga yoye iyapuki? Ngeenge osho, otashi dulika wa wana okuya kOfikola yOvaudifi vOuhamba. Kofikola oyo ohaku deulwa ovalumenhu novakainhu ovo va pyokoka pamhepo nove li moilonga yefimbo li yadi opo va dule okutamununa mo oukalele wavo. Ovo va ninga omaindilo va ye kofikola oyo ova pumbwa okukala ve na ehalo lokutambula ko oshinakuwanifwa keshe tava pewa ngeenge va mane. Mbela owa hala okulongifa omhito oyo opo u mone oufembanghenda munene moilonga iyapuki? — 1 Kor. 9:23.

18. Ouwa ulipi to ka mona ngeenge owa kala ho longo pamwe naJehova efiku keshe?

¹⁸ Tu li oshiwana shaJehova, ngeenge ohatu ulike omaukwatya ngaashi ouwa, onghenda nosho yo ohole, ohatu ke linyengifwa tu yandje nehalo liwa nokukala tu na ko nasha navamwe. Ngeenge otwa ningi ngaho, ohatu ka mona ehafo nombili. (Gal. 5:22) Kutya nee ou li monghalo ya fa peni, oto dulu okumona ehafo mokuhopaenena oukwatya waJehova wokuyandja nehalo liwa nosho yo mokukala umwe womovalongi pamwe naye vawa. — Omayel. 3:9, 10.