1921 Omido Efele Da Pita

OSHUNGONANGELO ye 1 Januali 1921 oya li ya pula Ovakonakoni vOmbiibeli ya ti: “Otwa taalela oilonga yokondadalunde ilipi omudo ou?” Opo nee oya yandja enyamukulo ya tofa muJesaja 61:1, 2, olo le va dimbulukifa kombinga yoshinakuwanifwa shavo shi na sha nokuudifa onghundana iwa. ‘Omwene okwa vaeka nge ndi udifile omapongo ondaka yehafo . . . , okuudifa pombada omudo muwa wOmwene nefiku longhone yaKalunga ketu.’

OVAUDIFI OVALADI

Ovakonakoni vOmbiibeli ova li ve na okukala ovaladi, opo va wanife po oilonga yavo yokuudifa. Inava pumbwa ashike okuudifila omapongo, ile tu tye ovalininipiki “ondaka yehafo,” ndele ova pumbwa yo okuudifila ovakolokoshi kombinga ‘yefiku longhone.’

Omumwatate J. H. Hoskin, oo a li ha di moCanada, okwa li ha udifa nouladi, nonande opa li omapataneko. Lwopehovelo mo 1921, okwa li a shakena nomufita wongeleka yoMethodist. Omumwatate Hoskin okwa li a hovela eenghundafana a ti: “Onda hala tu hafele eenghundafana di na sha nOmbiibeli. Nonande itatu ka twa kumwe moinima aishe, ohatu dulu okuxulifa po eenghundafana detu nombili notu kale natango ookaume.” Ashike osho hasho sha li sha ningwa. Omumwatate Hoskin okwa ti: “Otwa popya ashike ominute dinini, opo nee omufita okwa denga po omuvelo neenghono nonda li nokuli ndi shii ekende lao linene otali u mo.”

Omufita okwa li a ingida mokule ta ti: “Omolwashike ito i kovanhu ovo vehe fi Ovakriste, opo u ka popye navo?” Omumwatate Hoskin ka li e mu nyamukula, ndele eshi a dja po opo, okwe lipopila a ti, ‘Onda fa ashike nda li handi popi nomunhu ehe fi Omukriste!’

Eshi omufita oo a li ta udifile mongeleka yavo mefiku la shikula ko, okwa li a popila mowii omumwatate Hoskin. Omumwatate Hoskin okwa ti: “Okwa li a lombwela ovakwaneongalo lavo kutya ame ondi li omunaipupulu a shiya ko, oo ina monika mo nale modoolopa yavo nonda pumbwa okudipawa.” Ashike osho kasha li sha shololifa omumwatate Hoskin. Okwa li a twikila okuudifa nokwa popya novanhu vahapu. Okwa ti: “Onda hafela neenghono okuudifila modoolopa oyo. Ovanhu vamwe nokuli ova popya va ti: ‘Otu shii kutya ove omupiya waKalunga,’ nova li va pa nge oinima oyo nda li nda pumbwa.”

EKONAKONO LOPAUMWENE NOSHO YO ELONGELOKALUNGA LOUKWANEUMBO

Opo Ovakonakoni vOmbiibeli va kwafele ovo ve na ohokwe va ninge exumokomesho, ova li va nyanyangida omapulo nomanyamukulo opaMbiibeli moshifo The Golden Age.a Omwa li mu na omapulo opaMbiibeli e na sha novanyasha, oo ovadali tava dulu okukundafana nounona vavo. Ovadali ova li tava dulu “okupula ounona vavo omapulo oo, noku va kwafela va mone omanyamukulo mOmbiibeli.” Omapulo amwe ongaashi, “Ombiibeli oi na omambo angapi?” Epulo olo ola popya oinima imwe i na sha nOmbiibeli paunafangwa. Likwao ongaashi, “Mbela Omukriste keshe washili okwa teelela omahepeko monghedi yonhumba, ile yongadi?” Epulo olo ola kwafela ovanyasha va kale ovaudifi ovaladi.

Omwa li yo omapulo opaMbiibeli nosho yo omanyamukulo aavo ve na nale eshiivo lihapu lOmbiibeli. Omanyamukulo okwa li taa hangwa membo Studies in the Scriptures. Ovaleshi omayovi ova li va mona ouwa momapulo a tya ngaho, ashike oshifo The Golden Age sho 21 Desemba 1921, osha li sha popya kutya omapulo aeshe oludi olo itaa ka nyanyangidwa vali. Omolwashike mbela pa li pa ningwa elunduluko olo ombadilila?

EMBO LIPE!

Embo *The Harp of God*

Okakalata ke na omapulo

Oukalata ve na omapulo

Ovo va li tava kwatele komesho ova li va mona kutya Ovakonakoni vOmbiibeli ovo vape ova pumbwa okulihonga omahovelohongo monghedi ya unganekwa nawa. Onghee hano, muNovemba 1921, opa li pa nyanyangidwa embo The Harp of God. Ovo va li va ulika ohokwe ova li va tambula ko embo olo nova li ve lishangifa, opo va konakone kuvo vene embo The Harp Bible Study Course. Ekonakono la tya ngaho, ola li la kwafela ovanhu ve lihonge kombinga “yelalakano laKalunga li na sha nokupa ovanhu omwenyo waalushe.” Ola li hali longo ngahelipi?

Ngeenge omunhu a li a tambula ko embo olo, okwa li ha pewa okakalata kanini, oko ka yelifa kutya omapandja elipi e na okulesha membo olo. Opo nee moshivike sha shikula ko, okwa li ha pewa okakalata ke na omapulo a pambafana, a kanghamena komapandja oo a li a fiilwa. Pexulilo lokakalata oko ope na omapandja, oo e na oku ka lesha moshivike sha shikula ko.

Omukonakoni okwa li ha tuminwa okakalata kape, oko haka tuminwa keongalo olo li li popepi naye, oshivike keshe moule woivike 12. Luhapu, ovanamido meongalo, ile ovo ve na omangabeko, ova li hava tuminwa oukalata vavo. Pashihopaenenwa, Anna K. Gardner, wokoMillvale, Pennsylvania, sha U.S.A., okwa ti: “Eshi embo The Harp of God la pita, ola kwafela omumwamemekadona Thayle, oo iha dulu okweenda, a dule okukala e lipyakidila nokutuma oukalata vomapulo oshivike keshe.” Ngeenge omunhu okwa mane ko oukalata ovo, okwa li ha talelwa po kuumwe, opo e mu kwafela e lihonge shihapu kombinga yOmbiibeli.

OILONGA OYO VA LI VA TAALELA

Pexulilo lomudo, omumwatate J.F. Rutherford okwa li a tumina omaongalo aeshe onhumwafo. Okwa li a didilika kutya “ovanhu vahapu ova udifilwa etumwalaka lOuhamba omudo oo, nole va kwafela shi dulife omido da pita.” Opo nee okwa weda ko, ta ti: “Ope na natango shihapu osho shi na okulongwa. Ladipikeni vamwe va kufe ombinga moshilonga eshi shitunhula.” Ovakonakoni vOmbiibeli ova li va ninga ngaashi a popya. Mo 1922, ova li va udifa nouladi kombinga yOuhamba shi dulife nale.

Ookaume ovaladi

Ovakonakoni vOmbiibeli ova li va ulika ohole youmwainafana, opo va kwafelafane. Ova li ookaume ve na ouladi va ‘dalwa va kwafe moluhepo,’ ngaashi ehokololo tali shikula tali shi ulike. — Omayel. 17:17.

MEtivali 31 Mei 1921, omulumenhu omulaule womodoolopa yedina Tulsa, Oklahoma, mo U.S.A., okwa li a tulwa modolongo nota pangulwa, eshi a ponokela omukainhu omutilyane. Konima yaasho, ovalumenhu ovatilyane ve dulife pe 1 000 ova li va lwifa okangudu kanini kovalumenhu ovalaule. Olwoodi ola li le lihanena diva moshitukulwa hashi ifanwa Greenwood, omo mwa li hamu di ovalaule vahapu. Omaumbo e dulife 1 400 nosho yo eengeshefa oda li da tewa nokuxwikwa po. Eelaporta oda popya kutya ovanhu 36 ova li va kanifila mo eemwenyo davo, ndele omuvalu wavo otashi dulika ve li 300 lwaapo. Oshiningwanima osho lwanima osha ka lukwa Tulsa Race Massacre.

Omumwatate Richard J. Hill, oo a li Omukonakoni wOmbiibeli omulaule nosho yo ovakalimo vomoGreenwood ova hokolola kombinga yaasho sha ningwa po. Ova ti: “Oufiku oo, eshi omapiyaano a hovela, otwa hangika tu na okwoongala, ngaashi hatu ningi shito. Konima eshi olwoodi la pola, otwa uda omitopelo deendjebo tadi topa pondingandinga yaTulsa. Otwa li twa uda omitopelo deendjebo fiyo omokati koufiku.” Mongula kushe, mEtitatu, mu 1 Juni, onghalo osho ya ka naipala. “Ovamwatate vamwe ova li ve uya nove tu lombwela kutya ngeenge otwa hala tu kale meameno, natu ye konhele yepangelo, oyo hai ningilwa oyoongalele ya kula. Onghee hano, omumwatate Hill nosho yo omukulukadi waye nounona vavo vatano ova li va ya onhapo konhele oyo moTulsa. Ovalumenhu novakainhu ovalaule 3 000 ova li va ka konga eameno konhele oyo ya li mepashukilo letangakwaita, olo la tumwa kepangelo li ka xulife po olwoodi olo.

Pefimbo opo tuu opo, omumwatate Arthur Claus, oo a li omutilyane, okwa li a ninga etokolo, olo la li tali pula ouladi. Okwa ti: “Eshi nda uda kutya ovanhu ova teya eengeshefa nova xwika po omaumbo omoGreenwood, onda li nda tokola okuya ko, opo ndi ka tale kutya kaume kange, omumwatate Hill, oku li monghalo ya tya ngahelipi.”

Omumwatate Arthur Claus ta kwafele ounona 14 ve lihonge shihapu kombinga yOmbiibeli, ta longifa embo The Harp of God

Eshi a fika peumbo lomumwatate Hill, okwa mona omushiinda shaye womutilyane e na ondjebo. Omushiinda, oo e li yo kaume komumwatate Hill, okwa li ta diladila kutya Arthur naye oumwe womwaavo va li molwoodi. Okwa pula a ti: “Oto kongo shike monhele yomulumenhu ou?”

Arthur okwa ti: “Ngeenge onde mu nyamukula nai, ota ka yasha nge. Onde mu lombwela kutya ame okaume komumwatate Hill nohandi kala peumbo laye oikando ihapu.” Arthur nomushiinda shaye ova li va dula okwaamena onhele oyo kovanyeki.

Arthur okwa li a didilika diva kutya omumwatate Hill novaneumbo laye ove li konhele yepangelo, oko haku ningilwa oyoongalele. Arthur okwa li a lombwelwa kutya ovalaule itava dulu okudja mo monhele oyo nopehe na omukanda wa shainwa komunambelewa omukulunhu wonhele oyo wedina Barrett. Arthur okwa ti: “Osha li shidjuu neenghono okupopya nomunambelewa oo. Eshi nde mu lombwela kutya onda hala okukufa mo oukwaneumbo womumwatate Hill, okwa pula nge ta ti: ‘Oto ka dula ngoo okupashukila oukwaneumbo oo noku u fila oshisho?’ Onghee hano, onda li nda dimina nehafo.”

Arthur okwa li a endelela a ye konhele yepangelo oko haku ningilwa oyoongalele ya kula, e na omukanda wepitikilo peke. Opo nee okwe i yandja komunambelewa, oo a ti: “Omukanda ou owa shainwa komunambelewa omukulunhu yemwene! Mbela ou shii ngoo kutya oove wotete to kufa mo omunhu monhele ei?” Divadiva, Arthur nomunambelewa oo, ova li va mona omumwatate Hill novaneumbo laye. Aveshe ova li va londa motuwa yaArthur nova li va ya keumbo laye.

Omumwatate Claus okwa li a shilipaleka kutya omumwatate Hill novaneumbo laye ove li meameno. Oshihopaenenwa shomumwatate Claus shouladi nosho yo shohole yokuhola ovamwaxe osha li sha kumwifa vamwe. Arthur okwa ti: “Ovashiinda ovo va li va kwafela nokwaamena onhele yaHill okudja opo ova kala va fimaneka Eendombwedi daJehova shi dulife nale. Ovanhu vahapu ova ka kala ve na ohokwe metumwalaka lOuhamba, molwaashi ova li va mona kutya oshiwana shaKalunga inashi tukaulwa koukwamuhoko, oshi fike pamwe.”

a Oshifo The Golden Age osha li sha lukululwa Consolation mo 1937, nomo 1946 osha ka ninga o-Awake!, ile tu tye Kala oupafi!