3 | Nghee oihopaenenwa yopaMbiibeli tai dulu oku ku kwafela

OMBIIBELI OYA POPYA KOMBINGA . . . Yovalumenhu novakainhu ovadiinini ovo va li ‘ovanhu ngaashi fye.’ — Jakob 5:17.

Osho osha hala okutya ngahelipi?

MOmbiibeli omu na oihopaenenwa yovalumenhu novakainhu ovo va li ve na oupyakadi wopamadiladilo. Eshi hatu lesha oimoniwa yavo, otashi dulika tu mone kutya umwe womuvo okwa li e na omaliudo a fa etu.

Nghee osho tashi dulu okukwafela

Atushe ohatu kala twa hala okuudiwa ko, unene tuu ngeenge hatu kondjo noudu wopamadiladilo. Ngeenge hatu lesha Ombiibeli, ohatu lihongo kombinga yavamwe, ovo va li ve udite ngaashi fye. Oshidjemo, ohatu mono kutya katu li ofye atuke momaupyakadi etu noihatu kala twe litongola ko, ngeenge hatu ungaunga noisho nosho yo omaliudo mai.

MOmbiibeli omu na oihopaenenwa yavahapu, ovo va li ve udite vehe na ekwafo nova polimana. Mbela owa kalele ngoo nale u udite kutya, ‘ito dulu vali okutwikila nonghalamwenyo? Moses, Elia naDavid osho va li ve udite ngaho. — Numeri 11:14; 1 Eehamba 19:4; Epsalme 55:4.
Ombiibeli oya popya kombinga yomukainhu Hanna oo a li e udite ‘ouyehame ulula,’ molwaashi ka li ha mono ounona nokwa li ha shindwa kunyamunghwao. — 1 Samuel 1:6, 10.
Ombiibeli oya popya yo kombinga yomulumenhu wedina Job. Nonande okwa li omulumenhu e na eitavelo, okwa li a yahamekwa pamaliudo nokwa popya, a ti: “Nda kuta! Inandi hala okukala nomwenyo fiyo alushe.”— Job 7:16.

Ngeenge otwe lihongo nghee ovo va popiwa mOmbiibeli va dula okuungaunga nomadiladilo mai, otashi ke tu pameka tu dule okuungaunga noupyakadi wetu.

Nghee Ombiibeli tai dulu okukwafela Kevin

Nghee omukifi wepolimano Bipolar wa kuma nge

“Onda li nda monika omukifi wepolimano bipolar, eshi nda li ndi na omido omilongo nhee nasha. Omafimbo amwe ohandi kala ndi udite kutya ohandi dulu okuungaunga noupyakadi keshe. Ashike omafimbo amwe, ohandi kala ndi udite kutya inandi wana vali okukala nomwenyo.”

Nghee Ombiibeli ya kwafela nge

“Ehokololo laumwe oo a popiwa mOmbiibeli la kwafela nge, olomuyapostoli Petrus. Okwa li a ninga omapuko oo e mu ningifa a kale e udite ehe na oshilonga. Ponhele yokukala e udite ngaho, okwa kendabala okukala nookaume kaye ovo ve na ko nasha naye. Ngeenge efiku lange itali endele nge nawa omolwomukifi wange wepolimano, okuhawanenena kwange ohaku wilile nge po nohandi kala ndi udite ndihe na oshilonga. Ngaashi Petrus, onda kendabala okukala nookaume ovo tava kwafele nge ndi pule komesho nonghalamwenyo.

“Oshihopaenenwa shimwe vali hashi hekeleke nge mOmbiibeli oshohamba David. Luhapu okwa kala a polimanekwa konghalo yaye nokulipa oushima omolwomapuko aye. Ondi hole ehokololo laye, shaashi omafimbo amwe ohandi ningi oshinima, ile ndi popye sha osho handi ke lipa oushima lwanima. Ohandi mono eendjovo daDavid odo di li mEpsalme 51 tadi hekeleke. Movelishe 3, David okwa ti: ‘Enyono lange, ame mwene ondi li shii nawa, nomatimba ange alushe e li momesho ange.’ Osho naanaa handi kala ndi udite ngaho nohashi kala shidjuu okudiladila oinima iwa kombinga yange. Eendjovo daDavid odo di li movelishe 10 nado ohandi kumu nge, okwa ti: ‘Kalunga, shitile nge omutima wa yela, nomeni lange tula mo omhepo ipe i neenghono.’ Naame osho handi pula Kalunga ngaho, opo a kwafele nge ndi kale ndi na etaleko liwa li na sha naame mwene. Natango, ovelishe 17 ohai hekeleke nge. Oya ti: ‘Omutima, ou wa teyauka nowa alamekwa, oo nee, Kalunga ito u dini.’ Ovelishe oyo ohai shilipaleke nge kutya Kalunga oku hole nge.

“Ngeenge handi yandje elitulemo koihopaenenwa oyo ya popiwa mOmbiibeli nosho yo kwaasho Kalunga a pange, ohashi pameke eteelelo lange li na sha nonakwiiwa. Omaudaneko oo a popiwa mOmbiibeli okwa kuma nge shili nohaa kwafele nge ndi pule komesho.”