Kala omuladi ngaashi Sadok

1-2. Sadok okwa li lyelye? (1 Omafimbo 12:​22, 26-28)

DILADILA kongudu yovalumenhu ve dulife po 340 000, va ongala, opo va ninge David ohamba yaIsrael. Oule womafiku atatu, ovalumenhu ovo ova kala keemhunda, di li popepi naHebron, tava yolo, tava popi nokwiimbila Jehova omaimbilohambelelo. (1 Omaf. 12:39) Mokati kavo, omwa li omunyasha wedina Sadok, novanhu vahapu otashi dulika kava li ve mu didilika. Ashike Jehova okwa shilipaleka kutya otwa shiiva kutya omo a li mokati kavo. (Lesha 1 Omafimbo 12:​22, 26-28.) Sadok okwa li lyelye?

² Sadok okwa li omupristeri, nokwa li ha longo pamwe nomupristeri omukulunhu, Abjatar. Kalunga okwa li yo a pa Sadok ounongo nosho yo eudeko, opo a dule okuuda ko ehalo laye. (2 Sam. 15:27) Ngeenge ovanhu va li va pumbwa omayele, ova li hava ka pula Sadok. Okwa li yo omulumenhu omuladi. Moshitukulwa eshi, ohatu ke lihonga nghee a li a ulika ouladi.

3. (a) Omolwashike ovalongeli vaJehova va pumbwa ouladi? (b) Oshike hatu ka kundafana moshitukulwa eshi?

³ Momafiku aa axuuninwa, Satana ota ponokele neenghono oshiwana shaJehova. (1 Pet. 5:8) Otwa pumbwa ouladi, eshi twa teelela Jehova a xulife po Satana nounyuni waye wa kolokosha. (Eps. 31:24) Natu ka kundafaneni eenghedi nhatu, omo hatu dulu okuhopaenena ouladi waSadok.

YAMBIDIDA OUHAMBA WAKALUNGA

4. Omolwashike oshiwana shaJehova sha pumbwa ouladi, opo shi yambidide Ouhamba waKalunga? (Tala yo efano.)

⁴ Tu li oshiwana shaJehova, ohatu yambidida nomutima aushe Ouhamba waKalunga, ashike luhapu ohashi pula ouladi okuninga ngaho. (Mat. 6:33) Pashihopaenenwa, mounyuni ou wa kolokosha, otwa pumbwa ouladi, opo tu kale metwokumwe nomifikamhango daJehova nokuudifa onghundana iwa yOuhamba. (1 Tes. 2:2) Natango, ohashi pula ouladi, opo tuha kufe ombinga moinima yopapolotika mounyuni ou wa tukauka. (Joh. 18:36) Vahapu vomoshiwana shaJehova otava xupu shokadila, tava hepekwa palutu, ile tava tulwa meedolongo, molwaashi va anya okukufa ombinga moinima yopapolotika, ile okuya moukwaita.

5. Omolwashike Sadok a li a pumbwa ouladi, opo a yambidide David?

⁵ Sadok ka li ashike a ya kuHebron nelalakano loku ka tyapula, eshi David a ninga ohamba. Okwa ya a homata, e lilongekida okulwa. (1 Omaf. 12:38) Okwa li a halelela okushikula David kolwoodi, nokwaamena Ovaisrael kovatondi. Otashi dulika Sadok aha li omukwaita e na owino, ashike okwa li omulumenhu e na ouladi.

6. Ongahelipi David a tulila po Sadok oshihopaenenwa shiwa shi na sha nouladi? (Epsalme 138:3)

⁶ Omupristeri Sadok okwe lihonga peni okukala omuladi? Okwa li ha kala novalumenhu ve na eenghono novaladi. Oku na okukala e lihonga koshihopaenenwa shavo. Pashihopaenenwa, oshihopaenenwa shaDavid shi na sha nokuwilika Israel “momalwoodi asho,” osha li she linyengifa Ovaisrael aveshe ve mu yambidide nomutima aushe. (1 Omaf. 11:​1, 2) David okwa li alushe ha kongo ekwafo kuJehova, opo a lwife ovatondi vaye. (Eps. 28:7; Lesha Epsalme 138:3.) Sadok okwa li yo e lihonga okukala omuladi kovalumenhu ovo a li ha kala navo, ngaashi Jehoiada, omonamati waye ependafule, Benaia, nosho yo omalenga amwe 22, oo a li haa yambidida David. (1 Omaf. 11:​22-25; 12:​26-28) Ovalumenhu aveshe ovo ova li hava yambidida David e li ohamba yavo.

7. (a) Oihopaenenwa yopefimbo letu i na sha nouladi ilipi hatu dulu okulihonga kuyo? (b) Oshike hatu dulu okulihonga koshihopaenenwa shomumwatate Nsilu, ngaashi sha ulikwa mokavidio?

⁷ Ohatu mono eenghono nouladi, ngeenge hatu konakona oihopaenenwa yaavo va li va yambidida nouladi epangelo laJehova. Eshi Ohamba yetu, Kristus Jesus, ya li kombada yedu, oya li ya anya filufilu okukufa ombinga moinima yopapolotika yomounyuni waSatana. (Mat. 4:​8-11; Joh. 6:​14, 15) Jesus okwa kala alushe ha kongo ekwafo kuJehova. Otu na yo oihopaenenwa ihapu yovanyasha vopefimbo letu, ovo va li anya okukufa ombinga moukwaita, ile moinima yopapolotika. Omolwashike ito lesha oimoniwa yavo ko jw.org?a

KWAFELA OVAMWAXO

8. Onaini tashi dulika ovakulunhuongalo va pumbwa ouladi, opo va kwafele ovamwaxe?

⁸ Oshiwana shaJehova ohashi kwafelafana. (2 Kor. 8:4) Ashike omafimbo amwe, ohashi pula ouladi okuninga ngaho. Pashihopaenenwa, ngeenge pa holoka oita, ovakulunhuongalo vomoshitukulwa ohava didilike kutya ovamwatate novamwameme ohava kala va pumbwa etwomukumo, eyambidido nosho yo omakwafo opamhepo, ile opalutu. Molwaashi ovakulunhuongalo ove hole ovamwatate novamwameme, ohava tula eemwenyo davo moshiponga, opo ve va kwafele. (Joh. 15:​12, 13) Kungaho, ohava shikula oshihopaenenwa shaSadok shouladi.

9. Ngaashi sha popiwa mu 2 Samuel 15:​27-29, David okwa li a lombwela Sadok a ninge shike? (Tala yo efano.)

⁹ Onghalamwenyo yaDavid oya li moshiponga. Omonamati waye Absalom okwa li a tokola oku mu dipaa, opo a ninge ohamba ponhele yaye. (2 Sam. 15:​12, 13) David okwa li a pumbwa okufiya po Jerusalem diva! Okwa lombwela ovapiya vaye a ti: “Fikameni, tu fadukei po, osheshi kape na nande oumwe womufye ta ka dula okufaduka po Absalom!” (2 Sam. 15:14) Eshi ovapiya va li tava i, David okwa li a didilika kutya opa pumbwa okufyaala umwe, opo a kale te mu lombwele shi na sha neemhangela daAbsalom. Onghee okwa li a lombwela Sadok nosho yo ovapristeri vamwe va shune koshilando ve li eendadi. (Lesha 2 Samuel 15:​27-29.) Ova li va pumbwa okukala va lungama. Osho David a li a lombwela ovapristeri va ninge osha li sha nyika oshiponga. Absalom okwa li omulumenhu omukolokoshi noku lihole ye mwene, oo a li a kengelela xe. Diladila nee kutya ngeno okwa ka ningila shike Sadok nosho yo ovapristeri vakwao, ngeno okwa shiivile kutya otave mu ndaada, opo va amene David!

10. Ongahelipi Sadok nosho yo vamwe va amena David?

¹⁰ David okwa li a pula Sadok nosho yo kaume kaye umwe omudiinini, Husai, opo ve mu kwafele momhangela yaye. (2 Sam. 15:​32-37) Husai okwa li e na okuliningifa a fa ta yambidida Absalom, noku mu pa omayele e na sha nanghee ta dulu okuponokela David, osho sha li tashi pe David omhito, opo e lilongekidile olwoodi. Opo nee Husai okwa lombwela Sadok naAbjatar omhangela oyo. (2 Sam. 17:​8-16) Ovalumenhu ovo vavali ova li va dula okulombwela David shi na sha neemhangela daAbsalom. (2 Sam. 17:17) Kekwafo laJehova, Sadok nosho yo ovapristeri vakwao ova dana onghandangala ya fimana mokwaamena omwenyo waDavid. — 2 Sam. 17:​21, 22.

11. Ongahelipi hatu dulu okuhopaenena ouladi waSadok, eshi hatu kwafele ovamwatate?

¹¹ Ngeenge otwa pulwa tu ka kwafele ovamwatate pefimbo loudjuu, ongahelipi hatu dulu okukala nouladi ngaashi Sadok? (1) Shikula omalombwelo. Meenghalo da tya ngaho, osha fimana okukala twa hangana. Kala ho dulika komalombwelo, oo taa di koshitaimbelewa sheni. (Heb. 13:17) Ovakulunhuongalo ove na okukala hava talulula pandjikilile omalombwelo e na sha nanghee ve na okulilongekida, ngeenge pa holoka oiponga yopaushitwe nosho yo osho ve na okuninga po. (1 Kor. 14:​33, 40) (2) Kala u na ouladi, ashike kala okamutwevandu. (Omayel. 22:3) Longifa eendunge dokuyoolola. Ino litwala komutemo. (3) Lineekela muJehova. Dimbuluka kutya Jehova okwa hala amushe mu kale mwa amenwa. Ota dulu oku ku kwafela, u kwafele ovamwaxo monghedi ya amenwa.

12-13. Oshike hatu lihongo koshimoniwa shaViktor naVitalii? (Tala yo efano.)

¹² Natu ka taleni koshihopaenenwa shaViktor naVitalii, ovamwatate vavali, ovo ve hole Jehova, ovo va li hava twaalele ovamwaxe oikulya nomeva muUkraine. Viktor okwa ti: “Otwa li hatu kongo oikulya keshe pamwe. Peemhito dihapu, otwa li hatu udu omitopelo deendjebo popepi nafye. Omumwatate umwe okwa li a yandja oikulya okudja meemhungulilo daye. Osho osha li sha kwafela ovaudifi vahapu, opo va dule okweenda ko oule wokafimbo. Eshi twa li hatu londeke oinima motuwa yetu, oule weemeta 20 okudja opo twa li, opa li pa umbwa oboma. Momukokomoko wefiku, onda li nda pula Jehova, a pe nge ouladi, opo ndi twikile okukwafela ovaudifi.”

¹³ Vitalii okwa ti: “Ohashi pula ouladi. Olweendo lange lotete ola pula eevili 12. Momukokomoko wondjila aishe, onda kala handi ilikana kuJehova.” Vitalii okwa li omuladi, ashike okwa li yo okamutwevandu. Okwa weda ko a ti: “Onda kala handi pula Jehova ounongo nokukala omulininipiki. Onda kala ashike handi shingi keepate, odo da ufwa kopolifi. Eitavelo lange ola li la pama, eshi nda mona nghee ovamwatate novamwameme tava longele kumwe. Ova li hava kufa mo omainda, oo a tulwa mopate, hava londeke nokuyelula oipumbiwa, nova li have tu pe oikulya neenhele, opo hatu dulu okufuwila.”

KALA OMUDIININI KUJEHOVA

14. Ohashi tu kumu ngahelipi, ngeenge umwe, oo tu hole, a fiya po Jehova?

¹⁴ Limwe lomomashongo, oo hae tu teya omukumo neenghono, ongeenge omupambele, ile kaume ketu kopofingo a fiya po Jehova. (Eps. 78:40; Omayel. 24:10) Ngeenge otwa kala tu hole neenghono omunhu a tya ngaho, ohashi kala shidjuu okutambula ko onghalo. Ngeenge owa pita monghalo ya tya ngaho iyahameka, oshihopaenenwa shaSadok shoudiinini otashi dulu oku ku pameka.

15. Omolwashike Sadok a li a pumbwa ouladi, opo a kale omudiinini kuJehova? (1 Eehamba 1:​5-8)

¹⁵ Sadok okwa li a twikila okukala omudiinini kuJehova, eshi kaume kaye kopofingo umwe, Abjatar, a li a fiya po Jehova. Osho osha li sha ningwa pexulilo lokupangela kwaDavid. Eshi David a li pokufya, omonamati waye, Adonia, okwa li a kendabala okulininga ohamba, nokuli nonande Jehova okwa li a hoolola Salomo oye a ninge ohamba. (1 Omaf. 22:​9, 10) Abjatar okwa li a hoolola okulongela kumwe naAdonia. (Lesha 1 Eehamba 1:​5-8.) Kungaho, Abjatar okwa li a ulika kutya ke fi omudiinini kuDavid nokuJehova. Osho otashi dulika sha li sha udifa nai neenghono Sadok. Oule womido di dulife po 40, Sadok naAbjatar ova kala tava longele kumwe ve li ovapristeri. (2 Sam. 8:17) Ova li hava humbata “Oshikefa shaKalunga kashili.” (2 Sam. 15:29) Ovalumenhu aveshe ovo vavali ova li hava yambidida David, eshi a li ohamba, nokupondola shihapu moilonga ikwao yaJehova. — 2 Sam. 19:​11-14.

16. Oshike tashi dulika sha li sha kwafela Sadok, a kale omudiinini?

¹⁶ Sadok okwa kala omudiinini, nonande Abjatar, oo a li ta kengelele David, ka li omudiinini kuJehova. David okwa li e lineekela filufilu Sadok. Eshi oukengeleledi waAdonia wa nyanekwa pomutenya, David okwa li a hoolola Sadok, Natan naBenaia, va vaeke Salomo a ninge ohamba. (1 Eeh. 1:​32-34) Sadok oku na okukala a li a pamekwa nokutuwa omukumo, eshi a li ha kala pamwe novapiya vaJehova ovadiinini, ngaashi Natan nosho yo ovo va li hava yambidida ohamba David. (1 Eeh. 1:​38, 39) Eshi Salomo a ninga ohamba, okwa li a “nangeka po omupristeri Sadok ponhele yaAbjatar.” — 1 Eeh. 2:35.

17. Ongahelipi to dulu okuhopaenena Sadok, ngeenge umwe, oo u hole, okwa kala ehe fi omudiinini kuJehova?

¹⁷ Ongahelipi to dulu okuhopaenena Sadok? Ngeenge umwe, oo u hole, okwa fiye po Jehova, ulika kutya owa hala okukala omudiinini kuJehova. (Jos. 24:15) Jehova ote ke ku pa eenghono nosho yo ouladi. Ilikana kuJehova, nokupanga oukaume navamwe, ovo ve li ovadiinini kuye. Jehova okwa lenga oudiinini woye, note ke ku pa ondjabi. — 2 Sam. 22:26.

18. Oshike hatu lihonga moshimoniwa shaMarco naSidse?

¹⁸ Natu ka taleni koshihopaenenwa shaMarco nomukulukadi waye, Sidse, ovo ve na ovanakadona vavo vavali va fiya po oshili. Marco okwa ti: “Okudja ashike efiku ounona voye va dalwa, oho kala u va hole neenghono. Oho kendabala okuninga keshe shimwe, opo u va amene. Onghee ngeenge va fiya po Jehova, ohashi ku ehameke neenghono.” Okwa twikila ko a ti: “Ashike Jehova okwa kala te tu kwafele tu lididimike. Jehova okwa shilipaleka kutya ngeenge nda wililwa po, omukulukadi wange oha hekeleke nge, nokutwa nge omukumo, opo ndi longe osho sha yuka. Nongeenge a wililwa po, naame ohandi ningi sha faafana.” Sidse okwa ti: “Katwa li hatu dulu okulididimika kufye vene, ngeno Jehova ka li e tu kwafela. Onda li handi kondjo nomaliudo okukala ndi udite kutya aame ndi na epuko. Onghee onda li nda lombwela Jehova nghee ndi udite. Konima yefimbo lixupi, omumwameme, oo pa li pa pita eedula dihapu inandi mu mona, okwe uya kwaame, ta kwata nge komapepe, nokutala nge momesho, ndele ta ti: ‘Sidse, dimbuluka kutya kashi fi epuko loye!’ Kekwafo laJehova, onda li nda dula oku mu longela nehafo.”

19. Owa tokola toko okuninga shike?

¹⁹ Jehova okwa hala ovalongeli vaye aveshe va kale ovaladi ngaashi Sadok. (2 Tim. 1:7) Ashike ina hala tu kale twe lineekela meenghono detu vene. Okwa hala tu kale twe mu lineekela. Onghee ngeenge owe lihange monghalo, omo to pumbwa ouladi, ilikana kuJehova. Oto dulu okukala noushili kutya ota dulu oku ku kwafela, u kale omuladi ngaashi Sadok. — 1 Pet. 5:10.