Etukulwa 23

Jesus ta longo oikumwifilonga ihapu muKapernaum

MESHABATA limwe konima eshi Jesus a li a ifana ovahongwa vaye votete vane, Petrus, Andreas, Jakob naJohannes, ova li va ya koshinagoga yomuKapernaum. Jesus okwa li a udifila moshinagoga osho, novanhu ova li va kumwa molwaashi okwa li te va hongo ngaashi omunhu oo e na eenghonopangelo, ndele hangaashi ovanongo vomishangwa.

Mefiku olo lEshabata, moshinagoga osho omwa li mwe uya omulumenhu e na ondemoni. Konima yefimbo, omulumenhu oo okwa li a ingida mokule a ti: “Woo, otu na shike naave, Jesus Omunasaret? We uya u tu hanaune po? Ondi ku shii, Oove Omuyapuki waKalunga.”

Ondemoni oyo ya li i kwete omulumenhu oo oya li umwe womovaengeli vaSatana. Jesus okwa li a hanyena ondemoni oyo a ti: “Mwena, ove u dje mo muye.”

Ondemoni oyo oya li ya nata po omulumenhu oo, ndele tai ingida mokule nokudja mo momulumenhu oo nopehe na oku mu yahameka. Ovanhu aveshe ovo va li po ova li va kumwa, ndele tava pula tava ti: “Ondjovo ei oya tya ngahelipi, eshi ta [lombwele] eemhepo da nyata nepangelo neenghono, ndele do otadi di mo?” Onghundana i na sha naasho oya li ya tandavela moitukulwa aishe yopoushiinda.

Eshi Jesus novahongwa vaye va dja moshinagoga, ova li va ya keumbo laSimon ile Petrus. Inamweno yaPetrus okwa li ta vele olwiidi neenghono. Opo nee ova li va pula Jesus va ti: ‘Mu kwafela.’ Jesus okwa li a ya puye ndele te mu kwata keke noku mu pendula po. Diva inamweno yaPetrus okwa li a veluka ndele ta hovele oku va telekela.

Konima yefimbo, konima eshi etango la ningina, ovanhu va dja koitukulwa aishe ova li va hovela okuuya keumbo laPetrus tava eta ovanaudu vavo. Opo nee, ovanhu aveshe vomoshilando ova li va ongala poshivelo sheumbo laPetrus, na Jesus okwa li a velula ovanhu aveshe ovo va li ve na omikifi, kashi na nee mbudi kutya oda li da tya ngahelipi. Jesus okwa li nokuli a ta mo eendemoni odo da li movanhu. Eendemoni odo a li a ta mo, oda li da ingida da ti: “Oove Omona waKalunga.” Jesus okwa li e di hanyena noka li a efa di popye molwaashi odi shii kutya oye Kristus. Markus 1:21-34; Lukas 4:31-41; Mateus 8:14-17.

▪ Oshike sha li sha ningwa po moshinagoga mEshabata konima eshi Jesus a li a ifana ovahongwa vaye vane?

▪ Jesus okwa li a ya peni eshi a dja moshinagoga, nokwa li a longa oshikumwifilonga shilipi?

▪ Oshike sha ka ningwa po konguloshi yefiku olo?