Etukulwa 27
Jesus ta ifana Mateus
KONIMA yefimbo lixupi okudja eshi Jesus a li a velula omulumenhu oo a li a vela ombada, Jesus okwa li a dja mo muKapernaum ndele ta i kefuta laGalilea. Pomhito oyo, eemhunga dovanhu natango oda li de uya kuye, nokwa li a hovela oku di honga. Fimbo a li ta ende, okwa li a mona Mateus, oo ha ifanwa yo Levi, e li omutumba pombelewa yokufutila oifendela. Jesus okwa li a shiva Mateus a ti: “Shikule nge.”
Otashi dulika Mateus a li e shii nale omahongo aJesus, ngaashi Petrus, Andreas, Jakob nosho yo Johannes navo va li ve a shii nale fimbo Jesus ine va ifana. Ngaashi Petrus navakwao ovo, Mateus naye okwa li a shikula diva Jesus. Okwa li a fikama nokufiya po oilonga yaye yokufutifa oifendela, ndele ta shikula Jesus.
Lwanima, Mateus okwa li a unganeka oshivilo sha kula peumbo laye, tashi dulika oshivilo shi na sha naashi a li a ifanwa kuJesus. Kakele kaJesus nosho yo ovahongwa vaye, koshivilo oko okwa li yo kwe uya ookaume kaMateus vonale. Ovafendelifi ova li ve tondike kOvajuda vakwao molwaashi ova li have va pula oifendela oyo hai i kepangelo laRoma olo va li ve tonde. Kakele kaasho, ovafendelifi ovo ova li yo hava nyokoma ovanhu moku va pula oifendela ihapu.
Eshi Ovafarisai va li va mona Jesus e li poshivilo osho novanhu va tya ngaho, ova li va pula ovahongwa vaJesus tava ti: “Omuhongi weni oshike ta lile pamwe novafutifi novalunde?” Eshi Jesus a li a uda epulo lavo, okwa li e va nyamukula a ti: “Ava va pama, ihava pumbwa omuveluli, ndelenee ovanaudu ovo tuu aveke. Ndelenee indeni mu ke lilonge kutya, eshi otashi ti shike: Efilonghenda nda hala, [hayambo]. Osheshi inandi uya okwiifana ovayuki, ndelenee ovalunde ovo tuu.”
Otashi dulika Mateus a li a shiva ovafendelifi ovo opo ve uye va pwilikine kuJesus nova velulwe pamhepo. Onghee hano, Jesus okwa li pamwe navo opo e va kwafele va kale va hokiwa kuKalunga. Jesus ka li e tonde ovafendelifi ngaashi Ovafarisai ovo ve lishii ouyuki va li ve va tonde. Ponhele yokukala e va tonde, Jesus okwa li e linyengifwa kolukeno, opo e va velule pamhepo.
Onghee hano, Jesus ka li ha file ovalunde onghenda molwaashi a hokwa omanyono avo, ndelenee okwa li he va kenukile ngaashi naanaa a li ha kenukile ovanhu ovo va li tava vele palutu. Pashihopaenenwa, dimbuluka eshi Jesus a li a kenukila omulumenhu oo a li ta vele oshilundu nokwa li e mu kwata ndele ta ti: “Onda hala, yela!” Nafye natu kaleni hatu file ovanhu onghenda mokukwafela ovo ve li momhumbwe, unene tuu oku va kwafela pamhepo. Mateus 8:3; 9:9-13; Markus 2:13-17; Lukas 5:27-32.
▪ Mateus okwa li e li peni eshi Jesus a li e mu mona?
▪ Mateus okwa li ha longo shike, nomolwashike ovanhu ovo va li hava longo oilonga oyo va li ve tondike kOvajuda vakwao?
▪ Ovanhu vamwe ova li tava ngongota shike shi na sha naJesus, na Jesus okwa li e va nyamukula ngahelipi?
▪ Omolwashike Jesus a li ha kala novalunde?