Etukulwa 85

Efaneko lodi ya kana

JESUS okwa li a halelela okukonga eedi odo da li da kana nokumona ovo va hala okulongela Kalunga nelininipiko. Onghee hano, okwa li ta kongo nokupopya nomunhu keshe shi na sha nOuhamba, mwa kwatelwa nokuli novanhu ovo va li va talika ko ovalunde neenghono. Ovanhu va tya ngaho ova li va ehena kuJesus opo va pwilikine kuye.

Eshi Ovafarisai novanongo vomishangwa va li va mona Jesus e li novanhu va tya ngaho, ova li tave mu kembaula molwaashi ota endafana novanhu ovo va li va tala ko kutya kave na oshilonga. Ova li ve linongofolela tava ti: “Ou ota tambula ovalunde ndele ta lile pamwe navo.” Ovanhu ovo kava li tuu va dinika nai! Ovafarisai novanongo vomishangwa ova li hava tale ko ovanhu vongaho va fa ondwi i li koshi yeemhadi davo. Ova li hava longifa outumbulilo wOshiheberi ‛am ha·’aʹrets, oo tau ti, “ovakwadu,” opo va ulike nghee va li va dina ovanhu ovo.

Mepingafano nOvafarisai ovo, Jesus okwa li ha ungaunga novanhu aveshe nefimaneko, nolune nonolukeno. Oshidjemo, ovanhu vahapu ovo va li va lyatelwa pedu, mwa kwatelwa novanhu ovo va li va shiivika nawa kutya ovakolokoshi, ova li va halelela okupwilikina kuJesus. Ndele ongahelipi shi na sha nOvafarisai ovo va li tava kembaula Jesus eshi a li ta ningi eenghendabala opo a kwafele ovanhu ovo va li va tala ko ve li ovanhu vongaho?

Jesus okwa li a nyamukula Ovafarisai ovo a longifa efaneko. Okwa li a popya ta longifa etaleko lOvafarisai, eshi va li have litale ko ve li ovayuki nonokutya ova amenwa moshiunda shaKalunga, ofimbo ovanhu ovo hava ula kutya ovo ‛am ha·’aʹrets hava ti kutya otava ka kana.

Jesus okwa li a pula a ti: “Olyelye ou womunye e na eedi efele limwe ndee ta kanifa mo imwe, ita fii po ngeno odo 99, ndee ta ka shikula inya ya kana fiyo te i mono? Ndele ngenge te i mono, ote i humbata komapepe aye nokunyakukwa. Ndele ngenge te uya keumbo, ota ifana ookaume novashinda vaye, ndele ote va lombwele: Hafeni pamwe naame, osheshi odi yange ya li ya kana onde i mona.”

Opo nee Jesus okwa li a popya shi na sha naasho ehokololo laye tali ti a yelifa a ti: “Osho yo meulu tamu ka kala ehafo lokuhafela omulunde umwe e lidilulula, li dule olo lokuhafela ovayuki 99 ava itava pumbwa elidilululo.”

Ovafarisai ova li have litale ko kutya vo ovayuki noinava pumbwa okulivela ombedi. Eshi vamwe vomuvo va li va tokola Jesus omido donhumba da tetekela eshi a li ta li novafendelifi nosho yo novalunde, Jesus okwa li e va lombwela a ti: “Inandi uya okwiifana ovayuki, ndelenee ovalunde ovo tuu.” Ovafarisai ovo va li ve lishii ouyuki nova li ve wete inava pumbwa okulivela ombedi kava li hava hafelwa meulu. Ndele omulunde oo e livela ombedi shili oha hafelwa meulu.

Opo Jesus a divilike oshitwa osho kutya ovalunde ovo ve livela ombedi ohava etifa ehafo linene, okwa li a hokolola va li efaneko limwe. Okwa ti: “Omukainhu olyelye, ngenge e kwete oimaliwa oisilveri omulongo, ndee ta kanifa po shimwe, ita temifa olamba ye ita kombo meumbo noku shi konga shili fiyo ote shi mono? Ndele ngenge te shi mono, ota ifana ookahewa novashinda vaye ndee ta ti: Tu nyakukweni, osheshi oshimaliwa shange nde shi kanifile, onde shi mona.”

Jesus okwa li a popya shi na sha nanghee efaneko olo tali dulu okutulwa moilonga. Okwa ti: “Ohandi mu lombwele, osho tuu tamu ningi ehafo movaengeli vaKalunga omolwomulunde umwe e lidilulula.”

Okunakonasha kwopahole oko ovaengeli hava ulike shi na sha novalunde ovo ve livela ombedi kaku fi tuu oshinima shididilikwedi! Osho oshididilikwedi unene tuu eshi ovanhu ovo va li va lyatelwa pedu, ovo va li va tali ka ko ve li ‛am ha·’aʹrets lwanima va li tava ka ya mouhamba waKalunga womeulu. Oshidjemo, ovanhu ovo ova li tava ka kala ve na eendodo dopombada meulu ve dule novaengeli nokuli. Ponhele yokukala va twila ovanhu ovo ondubo, ovaengeli ovo ovalininipiki ohava kala ve udite ko kutya ovanhu ovo inava wanenena ova pita meenghalo didjuu monghalamwenyo yavo, odo de va longekida va ka kale eehamba meulu novapristeri ovanalukeno novananghenda. Lukas 15:1-10; Mateus 9:13; 1 Ovakorinto 6:2, 3; Ehololo 20:6.

▪ Omolwashike Jesus a li ha endafana novanhu ovo va li va talika ko ovalunde, nOvafarisai ova li ve mu tokola ngahelipi?

▪ Ovafarisai ova li hava tale ko ngahelipi ovanhu vongaho?

▪ Jesus okwa li a longifa omafaneko elipi, noshike hatu lihongo mo muo?

▪ Omolwashike okuhafa kwovaengeli ku li oshinima shididilikwedi?