Etukulwa 41

Jesus ta twifwa eemhata shi na sha noukalele waye

KONIMA eshi Jesus a dja keumbo laSimon oko li a shivwa, okwa li a hovela olweendo laye olutivali lokuudifa muGalilea. Pefimbo lolweendo laye lotete okwa li a longa pamwe novahongwa vaye ovo a li a ifana tete, Petrus, Andreas, Jakob nosho yo Johannes. Ndele pomhito oyo, okwa li a ya pamwe novayapostoli vaye 12 nosho yo ovakainhu vamwe. Mokati kovakainhu ovo omwa li Maria Magdalena, Susanna, naJohanna oo a li omukulukadi welenga lohamba Herodes.

Eshi oukalele waJesus wa enda tau tamunuka mo, ovapataneki vaye ova kala tave mu pataneke. Efiku limwe, omulumenhu wonhumba oo a li e na ondemoni nokwa li omupofi noka li ha popi, okwa li a etwa kuJesus. Eshi Jesus a li a velula omulumenhu oo, e mu twikulula, a fitulula ondaka yaye nokwa ta mo ondemoni oyo ya li muye, osha li sha kumwifa unene eemhunga dovanhu odo da li opo. Ovanhu ova ti: “Ou haye mbela omona waDavid?”

Eemhunga dovanhu oda li da ongala peumbo omo Jesus a li, na Jesus novahongwa vaye kava li va mona efimbo lokulya. Mepingafano novanhu ovo va li tava ti kutya Jesus “omona waDavid” oo a udanekwa, opa li yo ovanongo vomishangwa nOvafarisai ovo va li va enda ondjila ile okudja kuJerusalem opo ve uye ve mu pataneke. Eshi ovapambele vaJesus va li va mona kutya ovanhu ovo ve li puye otave mu piyaaneke, ova li ve mu ila po. Omolwashike mbela?

Pefimbo opo, nokuli novamwainamati vaJesus kava li va itavela kutya Jesus Omona waKalunga. Shimwe vali, eshi Jesus a putukila muNasaret inava mona nale ta etifa omapiyaano neenhamanana mokati kovanhu ngaashi pomhito oyo. Onghee hano, ova li tava diladila kutya Jesus ke li nawa momutwe nandenande. Ova li va fika pexulifodiladilo kutya “ota i eenghwengu,” onghee hano ova li va hala oku mu kwata vaye naye.

Ndele nande ongaho, oumbangi owa li wa yela kutya Jesus okwa velula omulumenhu oo a li e na ondemoni. Ovafarisai novanongo vomishangwa ova li ve shii kutya itava dulu okupataneka oushili oo. Onghee hano, opo va nyateke edina laJesus, ova li va lombwela ovanhu tava ti: “Eendemoni ote di tefa mo Belsebul aeke, omukulunhu weendemoni.”

Eshi Jesus a li a didilika kutya ovanongo vomishangwa nOvafarisai osho tava diladila ngaho, okwa li e va ifana ndele ta ti kuvo: “Okeshe tuu oshilongo tashi litwile ondubo musho vene, otashi teka po, nongaashi kaku noshilando ile eumbo tali litwile ondubo mulo vene tali kala po. Ndele ngenge Satana ta te mo Satana omukwao, hano oye okwe litwila ondubo muye mwene, oshilongo shaye otashi kala po ngahelipi?”

Jesus ka li tuu a tomhafana pandunge! Molwaashi Ovafarisai ova li tava ti kutya vamwe vomuvo navo ohava te mo eendemoni, Jesus okwa li yo e va pula a ti: “Ndele ngenge Ame handi te mo eendemoni naBelsebul, ovana veni hano otave di te mo nalyelye?” Oku shi popya noitya imwe, osho tava lundilile Jesus otashi dulu yo okuyukifwa kuvo shaashi navo osho hava ningi. Jesus okwa li e va lombwela a ti: “Ndelenee Ame ngenge handi te mo eendemoni nOmhepo yaKalunga, opo hano ouhamba waKalunga wa fika nee kunye.”

Opo Jesus a ulike kutya eshi ta te mo eendemoni oshi li oumbangi kutya oku na eenghono e dule Satana, Jesus okwa ti: “Olyelye ta dulu okupumina meumbo lomunaenghono noku mu nyeka oinima shapu ta mange tete omunaenghono mwene? Opo ta tinhi po eumbo laye. Ou iha kala kumwe naame, oye e nondubo naame, naau ita ongele pamwe naame, oye ta halakanifa.” Osha yela kutya eshi Ovafarisai va li ve li omhinge naJesus otava ulike kutya ove li ovakalelipo vaSatana. Ova li tava halakanifa po Ovaisrael puJesus.

Oshidjemo, Jesus okwa li a londwela ovapataneki ovo va nwefwa mo kuSatana kutya “okusheka Omhepo Iyapuki itaku diminwa po.” Jesus okwa li a yelifa a ti: “Ndele ngenge ku na ou ta popi ondjovo a twa ondubo nOmona wOmunhu, otai mu diminwa po, ndele ou ta popi Omhepo Iyapuki, oye ite shi diminwa po nande nomounyuni ou nomwa winya tau uya.” Ovafarisai ovo novanongo vomishangwa ova li va nyona enyono olo itava dulu okudiminwa po eshi va li tava ti kutya oikumwifilonga oyo Jesus a li ta longo kekwafo lomhepo iyapuki yaKalunga oya dja kuSatana. Mateus 12:22-32; Markus 3:19-30; Lukas 8:1-3; Johannes 7:5.

▪ Omolwashike oshikonga oshitivali shaJesus shokuudifa muGalilea sha li sha yooloka ko kwaashi shotete?

▪ Omolwashike ovapambele vaJesus va li tava kendabala oku mu kwata?

▪ Omolwashike Ovafarisai va li tava kendabala okudinifa oikumwifilonga yaJesus, na Jesus okwa li e va tomha ngahelipi?

▪ Ovafarisai ove na etimba lashike, nomolwashike?