Etukulwa 65

Jesus ta i kuJerusalem meholeko

OSHA li omwedi wOshijuda wedina Tishri, oo tau tu kumwe naSeptemba naOktoba lwaapo, mo 32 O.P., nOshivilo shOmatwali osha li popepi. Jesus okwa kala unene ta longo muGalilea okudja pOpaasa yomo 31 O.P., eshi Ovajuda va li va kendabala oku mu dipaa. Osha yela kutya okudja opo Jesus okwa li ashike ha i kuJerusalem opo a ka dane oivilo itatu yokomudo yOshijuda.

Ovamwaxe vaJesus ova li tave mu ladipike tava ti: “Fikama, u dje po apa, u ye kuJudea.” Jerusalem osha li oshilando shinene shaJudea, nosha li ondingandinga yelongelokalunga moshilongo ashishe. Ovamwaxe vaJesus ova li tava tomhafana tava ti: “Kape na ou a hala a monike, ta longo sha meholeko.”

Nonande Jakob, Simon, Josef naJudas kava li va itavela kutya omumwaxe womukulunhu, Jesus, oye shili Messias, ova li va hala a ka ulike eenghono daye dokulonga oikumwifilonga kovanhu aveshe ovo va li tava ka ongala koshivilo. Ndele Jesus okwa li e wete kutya osha nyika oshiponga, onghee okwa li e va lombwela a ti: “Ounyuni itau dulu oku mu tonda; Ame otau tondo nge, shaashi handi hepaulula nokutya, oilonga yao oii.” Okwa li yo e va lombwela a ti: “Indeni koshivilo, Ame itandi i manga koshivilo eshi.”

Oshivilo shOmatwali ohashi danwa oule womafiku aheyali. Mefiku etihetatu, oshivilo osho osha li hashi xulifwa noshoongalele shiyapuki. Oshivilo osho osha li hashi didilikifa exulilo lomudo wounamapya nosha li hashi kala efimbo lehafo linene nolokupandula. Omafiku onhumba konima eshi ovamwaxe vaJesus va li va ya pamwe novanhu vamwe va ka dane oshivilo, Jesus novahongwa vaye ova li va ya meholeko opo vaha monike kovanhu. Ova li va ya nondjila oyo ya li ya pita muSamaria ponhele yokuya naayo ya li ya pita popepi nomulonga waJordan, oyo ya li hai endwa kovanhu vahapu.

Molwaashi Jesus novaendi pamwe naye ova li tava ka pumbwa onhele yokunangala muSamaria, Jesus okwa li a tuma ovatumwa komesho opo va ka ninge omalongekido. Ndele ovanhu kava li va hala okuningila sha Jesus eshi va li va uda kutya ota i kuJerusalem. Molwaashi Jakob naJohannes ova li va handukifwa kwaasho, ova li va pula Jesus va ti: “Omwene, owa hala tu ifane omundilo meulu u va lungwinife po?” Jesus okwa li e va hanyena omolweetepo lavo la tya ngaho, ndele tava i komukunda umwe.

Fimbo Jesus novahongwa vaye va li mondjila, omunongo womishangwa umwe okwa li a lombwela Jesus a ti: “Ame onda hala oku ku shikula keshe apa to i.”

Jesus okwa li a nyamukula a ti: “Eembadje odi na omakwena, needila dokeulu odi na oihadi, ndelenee Omona wOmunhu ke na apa ta wilike omutwe waye.” Jesus okwa li ta yelifile omunongo womishangwa oo kutya ota ka shakeneka omaupyakadi ngeenge okwa ningi omushikuli waye. Neendjovo odo otadi ulike kutya omunongo womishangwa oo ita tambula ko onghalamwenyo ya tya ngaho molwaashi oku na ounhwa.

Jesus okwa li a lombwela omulumenhu umwe vali a ti: “Shikule nge!”

Omulumenhu oo okwa li a nyamukula a ti: “Efe nge manga ndi ka pake tate.”

Jesus okwa li e mu lombwela a ti: “Efa ovafi va pake ovafi vavo, ndele ove inda u ka udife ouhamba waKalunga.” Xe yomulumenhu oo osha yela kutya ka li a fya natango, nomolwaasho ngeno omona ina dula okukala ta pwilikine kuJesus. Omulumenhu oo okwa li ta pula a pewe efimbo opo a ka teelele xe a fye, molwaashi ka li e lilongekida okupitifa komesho Ouhamba waKalunga monghalamwenyo yaye.

Fimbo va li tava xumu komesho va yuka kuJerusalem, omulumenhu umwe okwa li a lombwela Jesus a ti: “Omwene, onda hala ndi ku shikule, ndelenee efe nge manga, ndi ke lilekele noovakwetu ve li meumbo lange.”

Jesus okwa li e mu nyamukula a ti: “Kape nomunhu a kwata oshipululo neke laye ta tale vali konima, a wapalela ngeno ouhamba waKalunga.” Ovo tava ningi ovahongwa vaJesus ove na okuyandja elitulemo koilonga yOuhamba. Ngaashi ashike oshinhenga tashi ka kala sha endama ngeenge omunhu oo ta pulula ita tale komesho, osho ngoo omunhu oo ta tale konima koinima yonghalelo ei ya kulupa ta ka puma mo mondjila oyo tai twala komwenyo waalushe. Johannes 7:2-10; Lukas 9:51-62; Mateus 8:19-22.

▪ Ovamwaxe vaJesus ovo oolyelye, nova li ve udite ngahelipi shi na sha naye?

▪ Omolwashike Ovasamaria va li ve na eenghedi dii, na Jakob naJohannes ova li va hala okuninga po shike?

▪ Jesus okwa li a ninga eenghundafana novanhu vatatu dilipi fimbo va li mondjila, nokwa li a divilika ngahelipi omhumbwe yokulonga oilonga yeliyambo?