Etukulwa 75

Osho hashi etifa elao lashili

JESUS okwa li a longa oikumwifilonga muGalilea nosho yo muJudea pefimbo loukalele waye. Pashihopaenenwa, okwa li a ta mo ondemoni oyo ya li momulumenhu umwe, oyo ya li hai mu ningifa a ha dule okupopya. Eemhunga dovanhu oda li da hafa eshi Jesus a li a longa oshikumwifilonga osho, ashike ovapataneki vaye ova li natango tave mu pataneke ngaashi va li va ninga muGalilea. Ovapataneki ovo ova ti: “Eendemoni te di tefa Belsebul, omukulunhu weendemoni.” Vamwe ova li va hala Jesus a ulike natango oumbangi muhapu oo tau holola kutya oye lyelye, nova li tava kendabala oku mu yeleka moku mu pula e va ulikile edidiliko okudja meulu.

Molwaashi Jesus okwa li e shii kutya ovanhu ovo otava diladila shike, okwa li a pa ovapataneki vaye ovo vomuJudea enyamukulo la faafana naalo a li a pa ovo vomuGalilea. Okwa li a popya kutya ouhamba keshe wa tukauka otau teka po. Okwa li a pula a ti: “Satana ngenge e nondubo muye mwene, oshilongo shaye otashi kala po ngahelipi?” Okwa li a ulika kutya ovapataneki vaye ove li monghalo ya nyika oshiponga a ti: “Eendemoni ngenge handi di tefa nomunwe waKalunga, opo nee ouhamba waKalunga owe uya kunye.”

Ovo va li va mona oikumwifilonga oyo Jesus a li a longa ova li ve na okulinyengifwa va ninge ngaashi ovanhu ovo va li ko omafelemido a pita, ovo va li va mona oikumwifilonga oyo Moses a li a longa. Ovanhu ovo ova li va popya kutya: “Eshi omunwe waKalunga!” “Omunwe waKalunga” oo yo wa li wa shanga Oipango Omulongo koipelende yomamanya. “Omunwe waKalunga,” sha hala okutya, omhepo iyapuki ile tu tye eenghono daKalunga tadi longo, oo wa li wa kwafela Jesus a te mo eendemoni nokuvelule ovanhu. Onghee hano, Ouhamba waKalunga owa li shili we uya kovapataneki ovo molwaashi Jesus oo a li ta ka nangekwa po a ninge Ohamba yOuhamba oo, okwa li e li mokati kavo.

Opo nee Jesus okwa li a ulika kutya okudula kwaye okuta mo eendemoni oshi li oumbangi kutya oku na eenghono e dule Satana, ngaashi ashike omulumenhu omunaenghono a dula eenghono omulumenhu a homatekeka oo ta kelele ombala yaye. Okwa li yo a endulula ehokololo olo a li a hokolola muGalilea li na sha nomhepo ya nyata. Omhepo ya nyata oya li ya dja mo momulumenhu umwe, ndele molwaashi omulumenhu oo ka li a fitika omwaka oo noinima iwa, omhepo oyo oya li ya aluka neemhepo dikwao heyali, nonghalo yomulumenhu oo oya li ya naipala i dule ei yotete.

Fimbo ovanhu va li tava pwilikine kehongo laJesus olo, omukainhu umwe oo a li mokati keemhunga dovanhu odo okwa li e linyengifwa a ingide mokule ta ti: “Edimo le ku humbata oli na elao nomavele aa wa nyama.” Molwaashi ovakainhu aveshe Ovajuda ova li va halelela okudala omuprofeti, unene tuu Messias, osha li shi shii okuudiwa ko eshi omukainhu oo a li a popya ngaho. Omukainhu oo otashi dulika a li ta diladila kutya Maria oku na okukala e udite elao molwaashi oye ina yaJesus.

Jesus okwa li a pukulula omukainhu oo shi na sha naasho hashi etifa elao lashili. Jesus okwa ti: “Oshili, ovanelao ovava tava udu eendjovo daKalunga ndee tave di diinine.” Jesus ka li nande a ulika pomhito imwe kutya ina, Maria, oku na okupewa efimano le likalekelwa. Ponhele yaasho, okwa li a ulika kutya elao lashili ohali di mokukala omupiya waKalunga omudiinini ndele hamokukala omupambele nomunhu wonhumba ile mokupondola.

Jesus okwa li yo a hanyena ovanhu vomuJudea eshi va li tave mu pula edidiliko okudja meulu, ngaashi a li a hanyena ovanhu vomuGalilea. Okwa li e va lombwela kutya itava pewa edidiliko limwe lihe fi ashike eli laJona. Okukala kwaJona omafiku atatu medimo loshi nosho yo okuudifa kwaye nouladi osho sha li sha ningifa Ovaninive ve lidilulule, oya li edidiliko. Jesus okwa ti: “Ndele tala, ou e li apa, ye e dule Jona.” Sha faafana, ohambanghainhu yokuSheba oya li ya kuminwa ounongo waSalomo. Jesus okwa ti yo: “Ndele tala, ou e li apa, ye e dule Salomo.”

Jesus okwa li a yelifa kutya ngeenge omunhu a tema olamba, ihe i tula mekololo ile koshi yoshimbale ndele ohe i tula koshikwatelwalamba opo ovanhu va dule okumona ouyelele wayo. Jesus otashi dulika a li ta ti kutya okuhonga nokulonga oikumwifilonga moipafi yovanhu ovo ovatangalali ovo va li mokati kovapwilikini vaye osha fa ashike omunhu ta holeke ouyelele wolamba. Ovapwilikini ovo kava li ve na eisho li li nawa, sha hala okutya, kava li va yandja elitulemo, onghee hano, oikumwifilonga yaJesus kaya li ya hanga elalakano layo.

Jesus okwa hangwa ashike opo a te mo ondemoni momulumenhu umwe nokwa li a fitulula ondaka yaye. Osho osha li shi na okulinyengifa ovanhu va kale ve na eisho li li nawa, sha hala okutya, va yandje elitulemo nova pandule omolwoikumwifilonga oyo nokuudifa onghundana iwa. Ndele ovapataneki ovo hasho vali va ninga ngaho. Onghee hano, Jesus okwa li a xulifa a ti: “Lungama hano, ouyelele womeni loye u ha kale omulaulu. Hano olutu loye alishe ngenge la yela, mu he na nande ombinga i li momulaulu, otali ningi ouyelele auke, ove wa fa wa minikilwa komutemo wolamba.” Lukas 11:14-36; Exodus 8:18, 19; 31:18; Mateus 12:22, 28.

▪ Ovanhu ova li ve linyenga ngahelipi eshi Jesus a li a velula omulumenhu wonhumba?

▪ “Omunwe waKalunga” oshike, nongahelipi Ouhamba waKalunga wa li we uya kovapwilikini vaJesus?

▪ Oshike hashi etifa elao lashili?

▪ Omunhu ota dulu ngahelipi okukaleka eisho laye li li nawa?