Etukulwa 76

Jesus ta li pamwe nOmufarisai

KONIMA eshi Jesus a li a nyamukula ovapataneki ovo va li tave mu pula kutya eenghono dalyelye da li de mu kwafela a fitulule ondaka yomulumenhu oo a li iha popi, Omufarisai umwe okwa li e mu shiva a ka lye ouvalelo keumbo laye. Fimbo inava hovela okulya, Ovafarisai ova li va kosha omake avo fiyo opeengolo domaoko, osho sha li onghedindjikilile yavo. Ova li have likosho ngaho fimbo inava lya nosho yo konima eshi va mana okulya, nova li nokuli have shi ningi lwopokati opo fimbo tava li. Nonande onghedindjikilile oyo kaya li tai nyono omhango yaKalunga, ova li hava ningi shi dulife pwaasho Kalunga a li e va lombwela va ninge shi na sha noukoshoki.

Eshi Jesus a li ina ninga ngaashi vo, Omufarisai oo a li e mu shiva okwa li a kumwa. Ndele nonande ka li a popya kutya okwa kumwa, Jesus okwa li eshi didilika mo ndele ta ti: “Nye ovafarisai, ohamu kosho eholo netiti kombada, ndele meni leni omu yadi enyeko nowii. Omalai nye, ou a shita eshi shokombada, haye tuu a shita eshi shomeni yo?”

Jesus okwa li a nyaneka pomutenya oihelele yOvafarisai ovo va li hava shikula onghedindjikilile yokulikosha komake ofimbo omitima davo da li di yadi oukolokoshi. Okwa li e va kumaida a ti: “Eshi shomeni shi yandjeni oikwafa yeehepele, aishe notai mu koshokele.” Ova li ve na okuyandja tave linyengifwa kohole, ndele hamolwaashi va hala okulimonikifa ovayuki kovanhu.

Jesus okwa li a twikila ko a ti: “Woo, nye ovafarisai, eshi hamu yandje oitimulongo yombidi noyoidimba noyeembidi adishe, ndele hamu pitilile ouyuki nohole okuhola Kalunga, eshi oshi nokuwanifwa nashinya kashi na okweefiwa.” Pamhango yaKalunga oyo a li a pa Ovaisrael, ova li ve na okuyandja oshitimulongo shoilikolomwa yavo yomomapya. Ombidi nosho yo oidimba oya li oimeno inini ile tu tye oihemba oyo ya li hai longifwa okunyenyepeka oikulya. Ovafarisai ova li hava yandje oitimulongo yoihemba oyo inini, ndele Jesus okwa li e va tokola eshi va li have lipwililikile oiteelelwa oyo ya fimanenena, ngaashi okuulikila vamwe ohole, okukala nolukeno nosho yo okukala ovalininipiki.

Jesus okwa li a twikila va li te va tokola a ti: “Woo nye ovafarisai, eshi mu hole oipundi yokomesho moshinagoga nokupopifwa pomalandelo. Woo nye ovanongo vomishangwa novafarisai, eshi mwa fa eembila di he wetike, novanhu tava ende kombada yado, ndele vo kave shi shii.” Okuhenoukoshoki kwOvafarisai ovo kakwa li ku liwetikile. Ovafarisai ovo ova li have limonikifa va fa ovayuki ndele momitima davo hasho va li shili, ova li ovanaihelele.

Eshi omutokoli umwe oo a li e shii nawa Omhango yaKalunga a li a uda eshi Jesus a li ta tokola Ovafarisai ovo, okwa ti: “Omuhongi, eshi to popi ngaha, hafye yo to tu fifa ohoni.”

Jesus okwa li yo a ulika kutya omushiivinawa wOmhango oo naye omunaihelele eshi a ti: “Woo nanye yo ovanongo vomhango, eshi hamu twike ovanhu omitengi didjuu okuhumbata, nye vene ihamu di kumu nande okamunwe keni kamwe. Woo nye, ovo hamu wapeke eembila dovaprofeti, vo ova dipawa kooxo.”

Omitengi odo Jesus a li ta popi odo eenghedindjikilile odo va li hava lombwele ovanhu, ndele ovatokoli kava li hava ningulula nande oimwe yomuyo opo ve shi ninge shipu kovanhu. Jesus okwa li yo a holola kutya ova panda okudipawa kwovaprofeti eshi a li e va londwela a ti: “Epupi eli opo li pulwe ohonde yovaprofeti aveshe ya tilwashi okehovelo lounyuni, okohonde yaAbel fiyo okohonde yaSakaria a dipaelwa pokati keyambelo notembeli. Heeno, ohandi mu lombwele oyo otai ka pulwa kepupi eli.”

Ounyuni wovanhu ovo va wana okukulilwa owa hovela okudja pokudalwa kwovana vaAdam naEva, onghee hano, Abel okwa li ko ‘kehovelo lounyuni.’ Konima yokudipawa kunyanyalifa kwaSakaria, etangakwaita laSiria ola li la hanauna po Juda. Ashike Jesus okwa li ta xunganeke shi na sha nokuhanaunwa po kwepupi olo la li ko pefimbo laye molwaashi ola li likolokoshi neenghono. Osho osha li sha ningwa konima yomido 38 lwaapo, mo 70 O.P.

Jesus okwa li a twikila nokutokola kwaye a ti: “Woo nye ovanongo vomhango, eshi mwa nyeka oshapi younongo, nye vene inamu ya mo, naavo va hala okuya mo, mwe va kelela.” Ovashiivinawa vOmhango ova li ve na oshinakuwanifwa shokuyelifila ovanhu Eendjovo daKalunga opo va ude ko eityo lado. Ndele ovashiivinawa vOmhango ovo ova li va dopa okuninga ngaho, nokava li hava longifa eemhito odo da li di li po opo va kwafele ovanhu va ude ko.

Ovafarisai ovo novashiivinawa vOmhango ova li va handukila Jesus eshi a li e va nyaneka pomutenya. Eshi Jesus a li ta di mo meumbo omo, ova li va hovela oku mu pataneka neenghono noku mu pula omapulo. Ova li tava kendabala oku mu ningifa a popye oshinima shonhumba osho tashi dulu oku mu kwatifa. Lukas 11:37-54; Deuteronomion 14:22; Mika 6:8; 2 Omafimbo 24:20-25.

▪ Omolwashike Jesus a li a tokola Ovafarisai nosho yo ovashiivinawa vOmhango?

▪ Omitengi dilipi ovatokoli va li va twika ovanhu?

▪ Onaini ‘ounyuni wa hovela’?