Etukulwa 89

Jesus e linyengifwa konghenda a ye kuJudea

OIVIKE yonhumba ya pita, Ovajuda ova li va kendabala okudipaa Jesus pefimbo lOshivilo shEyapulo muJerusalem. Onghee hano, Jesus okwa li a ya molweendo a yuka kolundume, tashi dulika komukunda oo wa li popepi nefuta laGalilea.

Efimbo opo la di ko, Jesus okwa li a ya kolukadi, kuJerusalem, a li ta udifa mondjila momikunda daPerea, oshitukulwa osho sha li sha ama koushilo womulonga waJordan. Konima eshi a li a hokolola efaneko li na sha noshipuna naLasarus, okwa li a twikila okuhonga ovahongwa vaye oinima oyo a li a honga nale fimbo a li muGalilea.

Pashihopaenenwa, okwa li a popya kutya otashi ka kala sha yeleka komunhu “ngeno a mangelwe emanya loshini kofingo yaye, ye a ekelwe mefuta” ponhele yokupundukifa kamwe “kaava vanini” vaKalunga. Okwa li yo a divilika kutya osha pumbiwa okudimina po vamwe, a ti: “Ngenge [omumwaxo] te ku ningi nai lu-7 mefiku limwe alike, ndele ta aluka lu-7 ndee ta ti: Onde lialuluka, mu dimina po.”

Eshi ovahongwa va li ve mu pula va ti kutya “tu wedela eitavelo,” okwa li e va nyamukula a ti: “Ngeno omu na eitavelo li fike pombuto yoshinapi ndele tamu lombwele omukwiyu ou: lidikula po ove u litwike mefuta, ngeno tau mu udu.” Eitavelo linini otali dulu okulonga oilonga ihapu.

Opo nee, Jesus okwa li a hokolola ehokololo tashi dulika loshinima sha ningwa shili olo tali ulike kutya omupiya waKalunga omunaenghono adishe oku na okukala e na oikala ya tya ngahelipi. Jesus okwa ti: “Olyelye womunye e na omupiya ta pulula ile ta lifa, ngenge ta di kepya ndele te mu lombwele ngeno: Ila diva, ove u lye? Ite mu lombwele mbela, ta ti: Pakele nge po ouvalelo, ove u lidike ndee to yakula nge fimbo handi li ndele handi nu. Opo nee ove to ka lya ndele to nu. Ile u shii ta pandula omupiya ou eshi a longa osho e shi lombwelwa? Hano osho nanye yo, ngenge mwa wanifa ashishe mwe shi lombwelwa, tyeni: ofye ovapiya vongaho, otwa longa osho ashike twa li tu noku shi longa.” Onghee hano, ovapiya vaKalunga kave na nandenande okukala ve wete tava kwafele Kalunga eshi tave mu longele. Ponhele yaasho, ove na alushe okudimbuluka kutya ove na oufembanghenda wokulongela Kalunga ve li oilyo youkwaneumbo waye i shii okulineekelwa.

Osha yela kutya okafimbo kanini eshi Jesus a mana okuhokolola efaneko olo, opa li pe uya omutumwa. Omutumwa oo okwa li a tumwa kuMaria naMarta, ovamwaina vaLasarus, ovo va li hava di modoolopa yedina Betania oyo ya li muJudea. Omutumwa oo okwa li a lombwela Jesus a ti: “Omwene, tala, ou u mu hole, ota vele.”

Jesus okwa li a nyamukula a ti: “Oudu ou kau fi wokufya, ndelenee owokufimanekifa Kalunga, Omona waKalunga opo a fimanekifwe kuwo.” Konima eshi Jesus a li a kala omafiku avali ponhele opo a li, okwa li a lombwela ovahongwa vaye a ti: “Tu shuneni kuJudea.” Ovahongwa ova li ve mu dimbulukifa va ti: “Rabbi, Ovajuda hanga ve ku dipaa nomamanya, ndele ove oto i ko vali.”

Jesus okwa li e va nyamukula ta pula ta ti: “Omutenya kau na eetundi omulongo nambali? Ou ta ende omutenya ite lipumu, osheshi oku wete ouyelele wounyuni ou. Ndele ou ta ende oufiku oye te lipumu, osheshi ke nouyelele muye.”

Jesus okwa li a hala okutya ‘eetundi domutenya’ ile efimbo loukalele waye wokombada yedu olo Kalunga a tula po, kala li la pwa ko natango, nokape na oo ta dulu oku mu ningila owii washa fimbo efimbo olo inali pwa ko. Okwa li a pumbwa okulongifa efimbo lixupi alishe ‘lomutenya’ olo la li la xupa ko, molwaashi okwa li taku ke uya “oufiku” eshi ovatondi vaye tave ke mu dipaifa.

Jesus okwa li a weda ko a ti: “Lasarus, kaume ketu okwa kofa, ndelenee Ame ohandi i ko ndi ke mu pendule.”

Molwaashi ovahongwa ova li tava diladila kutya Lasarus ota fuda po a kofa, osha li euliko kutya ota veluka, nova li va nyamukula va ti: “Omwene, ngenge a kofa ota veluka.”

Opo nee Jesus okwa li e va lombwela kondadalunde a ti: “Lasarus okwa fya, ndele Ame onda hafa omolweni, shaashi nda hangika ndi he ko, opo mu itavele. Ndele tu yeni kuye.”

Molwaashi Tomas okwa li e shi shii kutya Jesus oshi na oupu a dipaelwe muJudea, nokwa li yo a hala oku mu kwafela, okwa li a ladipika ovahongwa vakwao a ti: “Nafye yo tu yeni ko tu ka fileni pamwe naye.” Onghee hano, ovahongwa ova li va tula eemwenyo davo moshiponga mokuya pamwe naJesus molweendo olo Jesus a li e linyengifwa konghenda a ye kuJudea. Lukas 13:22; 17:1-10; Johannes 10:22, 31, 40-42; 11:1-16.

▪ Jesus okwa li a hangwa opo a udifile peni?

▪ Jesus okwa li a endulula omahongo elipi, nokwa li a hokolola ehokololo lilipi tashi dulika loshinima sha ningwa shili opo a yelife oshitwa shilipi?

▪ Jesus okwa li a yakula onghundana yashike, nokwa li a hala okutya shike eshi a li a popya kombinga ‘yomutenya’ nosho yo “oufiku”?

▪ Tomas okwa li a hala okutya shike eshi a ti: “Tu yeni ko tu ka fileni pamwe naye”?