Etukulwa 94

Otwa pumbwa okukala hatu ilikana nokukala ovalininipiki

EFIMBO la tetekela, fimbo Jesus a li muJudea, okwa li a yandja efaneko li na sha nanghee sha fimana okudiinina okwiilikana. Pomhito ei, eshi a li molweendo laye laxuuninwa lokuya kuJerusalem, okwa li a divilika kutya otwa pumbwa okudiinina okwiilikana. Otashi dulika Jesus a li natango muSamaria ile muGalilea eshi a li a lombwela ovahongwa vaye efaneko limwe vali.

Jesus okwa ti: “Moshilando shimwe omwa li mu na omutokoli weendjovo ina tila Kalunga noina fya ohoni ovanhu. Ndele moshilando osho mwa li omufiyekadi e uya luhapu kuye ndele okwa tya: Yukifa eendjovo detu nomutamananeki wange. Ndelenee ye okwa ninga omafiku mahapu ina hala; konima okwe lipopila ta ti: nande ihandi tila Kalunga noihandi fi ohoni ovanhu onda hala oku mu yukifila oshinima shaye, osheshi omufiyekadi ou ta kenyeneke nge, opo a ha twe nge momesho nokuli.”

Opo nee Jesus okwa li a popya shi na sha nanghee efaneko laye tali dulu okutulwa moilonga, a ti: “Pwilikineni omutokoli ou mwii eshi ta ti. Hano Kalunga ita yukifile mbela ovahoololwa vaye oshinima shavo ava have mu ifana pombada omutenya noufiku ye a fye ounye ngeno oku va kwafa?”

Jesus ka li a hala okutya Jehova Kalunga okwa fa omutokoli oo ehe fi omuyuki. Ndele ponhele yaasho, okwa li ta ti kutya ngeenge nokuli nomutokoli oo ehe fi omuyuki oha nyamukula ovo tava twikile oku mu indila ekwafo, osha yela kutya Kalunga oo omuyuki nomuwa, ota ka nyamukula ovapiya vaye ovo tava diinine okwiilikana. Jesus okwa li a twikila ko a ti: “Ohandi mu lombwele: [Kalunga] ote shi va yukifile divadiva.”

Luhapu ovanhu ovo va lyatelwa pedu nosho yo eehepele ihava ungaungwa navo pauyuki ngaashi ovanaenghono nosho yo oipuna. Ashike Kalunga ita ka hanauna po ashike ovakolokoshi ndele ota ka fya yo oshisho kutya ovapiya vaye ova ungaungwa navo pauyuki moku va pa omwenyo waalushe. Ndele mbela ovanhu vangapi va itavela filufilu kutya Kalunga ota ka yukifa oinima diva?

Jesus okwa li a ulika nghee eitavelo la pambafana neilikano eshi a pula a ti: “Omona wOmunhu ngenge te uya, ota hange ko tuu eitavelo kombada yedu?” Nonande epulo laJesus kala li la nyamukulwa, oushili oyoo kutya otashi dulika ovanhu vahapu vaha ka kale neitavelo la tya ngaho eshi Kristus te ke uya meenghono dOuhamba.

Mokati kaavo va li tava pwilikine kuJesus omwa li vamwe ovo va li ve liwete ve na eitavelo filufilu. Ova li ve lishii ouyuki nova li va dina ovanhu vakwao. Vamwe vomovahongwa vaJesus navo otashi dulika va li ve lishii ouyuki. Onghee hano, Jesus okwa li e va hokololela efaneko.

Okwa ti: “Ovalumenhu vavali ova ya motembeli okwiilikana, umwe omufarisai nomukwao omufendelifi. Ndele omufarisai okwa kala ofika e likalela ndele okwa ilikana ngaha: Kalunga, ohandi ku pandula, osheshi ame inandi fa ovanhu vamwe, ovakolokoshi, eembudi novanyoni vohombo ile ongaashi omufendelifi ou, eendya ohandi di lidilike luvali moshivike keshe ndele handi yandje oitimulongo moilikolwa yange aishe.”

Ovafarisai ova li va shiivika kutya ove hole okulimonikifa kuvamwe kutya vo ovayuki. Ova li ve litulila po omafiku okulidilika oikulya ngaashi Omaandaxa nEtine nova li hava yandje alushe oitimulongo, nokuli naayo yoihemba inini yomomapya. Eemwedi dinini da tetekela, pefimbo lOshivilo shOmatwali, ova li va ulika kutya ova dina ovanhu vongaho eshi va ti: “Ovanhu ava, inava shiiva omhango, [sha hala okutya, efatululo lOmhango olo la tulwa po kOvafarisai] ova fingwa.”

Jesus okwa li a twikila efaneko laye ta popi shi na sha nomunhu oo womwaavo taku ti “ova fingwa” a ti: “Ndele omufendelifi okwa kala ofika kokule, ye ina hala okuyelula omesho keulu, okwe lidenga ponhulo yaye ndee ta ti: Kalunga, file nge onghenda, aame omulunde.” Molwaashi omufendelifi oo okwa li a dimina nelininipiko kutya ye omulunde, Jesus okwa ti: “Ohandi mu lombwele: ou a shuna keumbo omuyuki, e dule winya, osheshi ou te linenepeke ota ninipikwa, ndele ou te lininipike ota nenepekwa.”

Kungaho, Jesus natango okwa li a divilika kutya ovanhu ova pumbwa okukala ovalininipiki. Itashi kumwifa eshi ovahongwa vaJesus navo va li ve na oikala yokulishii ouyuki molwaashi ova kulila moshitukulwa omo mu na Ovafarisai ovo va li ve lishii ouyuki nova li va lenga eendodo. Jesus ka li tuu a honga oshilihongomwa shiwa shi na sha nelininipiko! Lukas 18:1-14; Johannes 7:49.

▪ Omolwashike omutokoli oo a li ehe fi omuyuki a li a nyamukula eindilo lomufiyekadi, nefaneko laJesus otali hongo oshilihongomwa shilipi?

▪ Jesus okwa hala a hange ovanhu ve na eitavelo la tya ngahelipi eshi ta aluka?

▪ Jesus okwa li ta lombwele oolyelye efaneko laye li na sha nOmufarisai nosho yo omufendelifi?

▪ Otu na okuhenuka oikala yOvafarisai ilipi?