Mbela otu na okukala hatu litade?

OKULITADA otashi ti shike? Mbela ou shi shii kutya otashi ti shike? —  Nandi ku pe oshihopaenenwa. Mbela owa kendabalele ngoo nale okuninga oshinima shonhumba osho uhe shii nawa oku shi ninga? Otashi dulika wa li wa kendabala okulyata etanga. Ile pamwe owa li wa kendabala okudana eshipa nongodi. Mbela ope na umwe oo a li e ku yola, ndele te ku lombwele kutya ota dulu okulyata etanga ile okudana eshipa nongodi e ku dule? —  Ngeenge omunhu oo osho a li a ninga ngaho, okwa li te litade.

Oho kala u udite ngahelipi ngeenge vamwe tave litade? Mbela oho kala u udite nawa? —  Mbela vakweni ohava kala ve udite ngahelipi ngeenge to litade? —  Mbela oshiwa ngoo okulombwela umwe kutya ame ondi ku dule moshinima shonhumba? —  Mbela Jehova oku hole ovanhu ovo hava ningi ngaho? — 

Omuhongi Munene okwa li e shii ovanhu vamwe ovo va li ve liwete ve li xwepo ve dule ovanhu vakwao. Okwa li have litade ile have linomo nova li va dina ovanhu vakwao. Onghee hano, efiku limwe Jesus okwa li e va hokololela ehokololo lonhumba e va ulikile kutya osha puka okulitada. Natu ka pwilikine kehokololo olo.

Ehokololo olo oli na sha nOmufarisai nosho yo omufendelifi. Ovafarisai ova li ovahongi velongelokalunga, ovo va li ve lishii ouyuki ve dule ovanhu vakwao. Omufarisai womehokololo laJesus okwa li a ya kotembeli yaKalunga muJerusalem a ka ilikane.

Jesus okwa popya kutya omufendelifi naye okwa li yo a ya kotembeli a ka ilikane. Ovanhu vahapu kava li ve hole ovafendelifi. Ova li hava kala ve udite kutya ovafendelifi ova hala ashike oku va nyokoma. Ndele oshoshili kutya ovafendelifi vahapu kava li ovanashili.

Eshi Omufarisai oo a li a ya kotembeli, okwa li a ilikana a ti: ‘Kalunga, ohandi ku pandula, osheshi ame kandi fi omulunde ngaashi ovanhu vamwe. Ihandi nyokoma ovanhu noihandi ningi oinima ikwao ii. Ame inandi fa omufendelifi ou, ame omulumenhu omuyuki. Ohandi lidilike luvali moshivike keshe opo ndi diladile kombinga yoye, nohandi yandje kotembeli oitimulongo moilikolomwa yange aishe.’ Omufarisai oo okwa li ta diladila kutya oku li xwepo e dule ovanhu vakwao, hasho mbela? — Okwa li nokuli a lombwela Kalunga kutya oku li xwepo e dule ovanhu vakwao.

Ndele omufendelifi ka li a fa Omufarisai oo. Ka li nokuli a yelula omesho aye a tale keulu eshi a li ta ilikana. Okwa li a fikama kokule a nyongama. Omufendelifi oo okwa li e livela ombedi omolwomanyono aye, nokwa li nokuli e lidenga monhulo omolwokunyika oluhodi. Ka li a lombwela Kalunga kutya ye oku na oikala iwa, ponhele yaasho, okwa li a ilikana a ti: “Kalunga, file nge onghenda, aame omulunde.”

Mbela elipi womovalumenhu ovo vavali a li a hokiwa kuKalunga? Mbela omulumenhu Omufarisai, oo a li ta diladila kutya oku li xwepo neenghono e dule ovanhu vakwao? Ile omulumenhu omufendelifi, oo a li e livela ombedi omolwomanyono aye? — 

Jesus okwa ti kutya omufendelifi oye a li a hokiwa kuKalunga, omolwashike mbela? Jesus okwa ti: ‘Ou te liningifa a fa oye e li xwepo kuvakwao ota ka dinifwa, ndele ou te lininipike ota ka nenepekwa.’ — Lukas 18:9-14.

Jesus okwa li a hala okuhonga shike eshi a hokolola ehokololo olo? —  Okwa li ta hongo kutya osha puka okudiladila kutya otu li xwepo tu dule ovanhu vakwetu. Otashi dulika tuhe shi popye meendjovo, ndele onghedi omo hatu lihumbata, otashi dulika tu ulike kutya ohatu diladila kutya otu li xwepo tu dule ovanhu vakwetu. Mbela owa li nale we lihumbata monghedi ya tya ngaho? — Natu ka tale koshihopaenenwa shomuyapostoli Petrus.

Eshi Jesus a li a lombwela ovayapostoli vaye kutya aveshe otave ke mu fiya po ngeenge a kwatwa po, Petrus okwa li e linoma a ti: ‘Nande aveshe nave ku fiye po, ame itandi ke ku fiya po nande!’ Ndele Petrus okwa li a puka mokutya ngaho, molwaashi okwa li e lishii ouyuki. Petrus okwa ka fiya po Jesus, ndele lwanima okwa ka alukila kuJesus, ngaashi hatu ke lihonga mEtukulwa 30 lembo eli. — Mateus 26:31-33.

Natu ka tale koshihopaenenwa shimwe shopefimbo letu. Natu tye nee ngeno ove nomuhongwa umwe womongudu yeni otamu pulwa omapulo onhumba kofikola. Oto ka ninga po shike ngeenge owa dulu okuyandja omanyamukulo meendelelo u dule omuhongwa mukweni? Heeno, ohashi kala shihafifa ngeenge u shii omanyamukulo. Ndele mbela otashi ka kala ngoo sha yuka okuliyeleka namukweni oo iha dulu okunyamukula meendelelo? —  Mbela osha yuka ngoo okulimonikifa kutya ou shii shihapu u dule mukweni? — 

Omufarisai womehokololo laJesus osho naanaa a li a ninga ngaho. Okwa li e litada kutya ye oku li xwepo e dule omufendelifi. Ndele Omuhongi Munene okwa ti kutya osho Omufarisai oo a li a ninga kasha li sha yuka. Odoshili kutya omunhu umwe ota dulu okuninga oshinima shonhumba nawa e dule mukwao, ndele osho itashi ulike kutya oku li xwepo e dule omunhu mukwao.

Ngeenge otu shii shihapu tu dule vamwe, mbela osha yuka okulitada? — Diladila kwaasho. Mbela ofye vene twa shita ouluvi wetu? — Ahowe, Kalunga oye a shita ouluvi wetu. Nokuli noinima ihapu oyo tu shii otwe i lihonga kuvamwe. Otashi dulika pamwe twa lesha kombinga yoinima oyo membo lonhumba. Ile otashi dulika pe na umwe oo e tu lombwela kombinga yoinima oyo. Nokuli nongeenge otwa ningi oshinima shonhumba kufye vene, mbela otwa dula oku shi ninga ngahelipi? — Otwa dula oku shi ninga omolwouluvi oo Kalunga e tu shita nao.

Ngeenge omunhu wonhumba okwa kendabala neenghono okuninga oshinima shonhumba, otashi ka kala sha yuka okutya sha osho tashi mu hafifa. Mu lombwela kutya ou hole osho a ninga. Pamwe oto dulu nokuli oku mu kwafela e shi ninge nawanawa. Mbela naave hasho to ka kala wa hala vamwe ve ku ningile ngaho? — 

Ovanhu vamwe ove na eenghono ve dule vakwao. Ongahelipi ngeenge ou na eenghono u dule eendenge doye ile ovakulu voye? Mbela ou na okulitada? —  Ahowe. Oikulya oyo hatu li oyo hai tu kwafele tu kale tu na eenghono. Mbela Kalunga haye ha pitifa etango noha lokifa odula nokuyandja keshe osho sha pumbiwa opo tu dule okumona oikulya? —  Onghee hano, otu na okupandula Kalunga ngeenge otu na eenghono. — Oilonga 14:16, 17.

Kape na umwe womufye e hole okuuda ovanhu tave litade, hasho mbela? —  Natu dimbulukwe eendjovo daJesus odo tadi ti: “Ngaashi mwa hala ovanhu ve mu ningile, osho va ningileni yo.” Ngeenge otwa ningi ngaho, itatu ka kala ngaashi Omufarisai oo a li e litada ngaashi sha hokololwa mehokololo lOmuhongi Munene. — Lukas 6:31.

Oshikando shimwe opa li omulumenhu umwe oo a li a ula Jesus kutya omuwa. Mbela Omuhongi Munene okwa li a tya kutya: ‘Heeno ame ondi muwa’? —  Ahowe. Ponhele yaasho, Jesus okwa ti: “Kaku na umwe muwa, oKalunga aeke.” (Markus 10:18) Nonande Omuhongi Munene okwa li a wanenena, ka li he litade, ponhele yaasho, okwa li ha yandje olupandu kuXe, Jehova.

Mbela ope na umwe oo hatu dulu okulitadela? —  Heeno, ope na. Ohatu dulu okulitadela Omushiti, Jehova Kalunga. Ngeenge twa mono etango liwa tali ningine, ile oshinima shimwe shikumwifi meshito, ohatu dulu okulombwela umwe hatu ti: ‘Kalunga ketu mukumwifi, Jehova oye a shita oinima oyo.’ Natu kale alushe twe lilongekida okupopya kombinga yoinima inene oyo Kalunga a ninga nale nosho yo oyo ta ka ninga monakwiiwa.