Etukulwa 98

Ovahongwa tava tu eemhata eshi Jesus a li poku ka dipawa

JESUS novahongwa vaye ova li ve li popepi nomulonga waJordan, oo va li ve na okutauluka okudja koshitukulwa shaPerea opo va ye kuJudea. Ovanhu vahapu ova li tava ende pamwe navo eshi va li tava i kOpaasa yomo 33 O.P., oyo ya li i na ko oshivike shimwe ile shi dule po.

Jesus okwa li e li komesho yovahongwa vaye, nova li va kumwa eshi a li a tokola nouladi. Dimbuluka kutya oivike inini opo ya piti eshi Lasarus a li a fya nosho yo eshi Jesus a li pokudja muPerea a yuka kuJudea, Tomas okwa li a ladipika ovahongwa vakwao a ti: “Tu yeni ko tu ka fileni pamwe naye.” Dimbuluka yo kutya konima eshi Jesus a li a nyumuna Lasarus, Omhangu yopombada yOvajuda oya li ya pangela omhangela i dipae Jesus. Hano itashi kumwifa eshi ovahongwa va li va tila neenghono eshi va li tava i vali kuJudea.

Opo Jesus a longekidile ovahongwa vaye 12 osho sha li komesho, okwa li e va kufa po ovo aveke ndele te va lombwele ta ti: “Tala, ofye hatu yeni kuJerusalem, nOmona wOmunhu ota yandjwa momake ovapristeri ovakulunhu novanongo vomishangwa, ndele ovo tave mu pe etimba lokufya ndee tave mu yandje kovapaani okushekwa nokudengwa nokuvalelwa, ndelenee mefiku etitatu ota nyumuka.”

Jesus opo ashike a hangwa a li a lombwela ovahongwa vaye kombinga yokufya nokunyumuka kwaye eemwedi opo da piti, naasho osha li oshikando oshititatu. Nonande ovahongwa ova li va pwilikina kuye, kava li ve udite ko kutya okwa hala okutya shike. Osho otashi dulika omolwaashi va li va itavela mokutungululwa kwouhamba waIsrael kombada yedu, nova li va teelela nodjuulufi oku ka hafela oshinge nefimano mouhamba wokombada yedu pamwe naKristus.

Umwe womwaavo va li tava i kuJerusalem kOpaasa okwa li Salome, ina yomuyapostoli Jakob nosho yo Johannes. Jesus okwa li ha ifana ovayapostoli ovo “Ovana vengungumo lodula” molwaashi ova li ovahandunhu. Pomhito imwe, ovalumenhu ovo ova kala va hala oku ka kala va tumbala mOuhamba waKristus, nova li va lombwela ina kombinga yaasho. Ina okwa li e va ila ko kuJesus, ta tu eengolo puye ndele te mu pula e mu kwafe.

Jesus okwa li e mu pula a ti: “Owa hala shike?”

Salome okwa li a nyamukula a ti: “Itavela, ovana vange ava vavali va ka kale omutumba, umwe kolulyo loye nomukwao okolumosho loye omouhamba woye.”

Molwaashi Jesus okwa li a didilika kutya olyelye a tuma Salome, okwa li a lombwela Jakob naJohannes a ti: “Onye kamu shi shii eshi mwe shi hala. Otamu dulu tuu okunwa eholo olo handi ke li nwa?”

Ova li va nyamukula va ti: “Ohatu shi dulu.” Nonande Jesus okwa li ashike opo a hangwa e va lombwele kutya ota ka hepekwa neenghono noxuuninwa ota ka dipawa, osha yela kutya kava li ve udite ko kutya okwa hala okutya shike eshi a li ta popi “eholo” olo a li e li poku ka nwa.

Kakele kaasho, Jesus okwa li e va lombwela a ti: “Eholo lange tamu ke li nwa, ndele okukala omutumba kolulyo lange nokolumosho lange haame handi ku pangele, ndele otaku pewa ovo, ve ku longelwa kuTate.”

Pefimbo opo tuu opo, ovahongwa vakwao omulongo ova li va uda osho Jakob naJohannes va li va pula, nova li va handuka. Otashi dulika Jakob naJohannes ovo va li unene tava dana onghandangala meemhata odo ovayapostoli va li tava tu nale shi na sha naao munene mokati kavo. Ndele osho va li va pula pefimbo opo osha li tashi ulike kutya kava li va tula moilonga omayele oo Jesus a li e va pa nale shi na sha naasho. Shinyikifa oluhodi, ova li natango va halelela okukala va tumbala.

Jesus okwa li a ifana ovahongwa vaye 12, opo a pongolole po oupyakadi oo wa li wa etifwa kuJakob naJohannes. Okwa li e va pukulula pahole a ti: “Onye omu shi shii, ovapangeli voiwana ohave i pangele, novanaenghono ohava longifa eenghono davo kuyo. Ndelenee hasho shi kale mokati keni, ndelenee ou womunye a hala a ninge munene mokati keni, ye na kale omuyakuli weni, naau womokati keni a hala a kale wokomesho, ye na kale omupiya waaveshe.”

Jesus okwa li e va tulila po oshihopaenenwa osho va li ve na okuhopaenena, a ti: “[Ngaashi] nOmona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.” Jesus ka li ashike a yakula vamwe, ndele okwa li e shi ninga monghedi ya tongomana eshi a li a fila ovanhu. Ovahongwa ova li va pumbwa okukala ve na oikala ya fa yaKristus yokukala va hala okuyakula vamwe ponhele yokuyakulwa, nova li ve na okukala ovalininipiki ponhele yokukala va tumbala. Mateus 20:17-28; Markus 3:17; 9:33-37; 10:32-45; Lukas 18:31-34; Johannes 11:16.

▪ Omolwashike ovahongwa va li va tila neenghono?

▪ Jesus okwa li a longekidila ngahelipi ovahongwa vaye osho sha li komesho?

▪ Jesus okwa li a pulwa a ninge shike, nosha li sha kuma ngahelipi ovayapostoli vamwe?

▪ Jesus okwa li a ungaunga ngahelipi noupyakadi oo wa li mokati kovayapostoli vaye?