Etukulwa 102

Kristus ta i muJerusalem e li omufindani

ONGULA yefiku la shikula ko, Osoondaxa, 9 aNisan, Jesus novahongwa vaye ova li va dja mo muBetania nova li va pita pOmhunda yEemono va yuka kuJerusalem. Moule wokafimbo kaxupi ova li nale tava hale okufika puBetfage, onhele oyo ya li kOmhunda yEemono.

Jesus okwa li a lombwela ovahongwa vaye vavali a ti: “Indeni komukunda winya u li komesho yeni ndele tamu ka hanga ko divadiva okambulu okakadi ka pandekwa, nokambulwena kako; va pandukululeni nye mu va ete kuame. Ndele ngenge oku na ou te mu lombwele sha, tyeni: Omwene e va pumbwa; oye te va tumu diva.”

Nonande ovahongwa tete kava li ve udite ko kutya osho a li e va lombwela otashi wanifa exunganeko lOmbibeli, lwanima ova li ve ke shi uda ko. Omuprofeti Sakaria okwa li a xunganeka kutya Ohamba oyo ya li ya udanekwa kuKalunga otai ka londa “okambulwena kokambulu okakadi” ya yuka muJerusalem. Ohamba Salomo nayo oya li ya londa kokandongi eshi ya li tai i i ka vaekwe.

Eshi ovahongwa va ya muBetfage ndele tava kufa mo okambulwena naina yako, ovanhu vamwe ovo va li po ova li ve va pula va ti: “Oshike tamu pandukulula okambulwena?” Eshi va li va nyamukula kutya ove va tumwa kOmwene, ovanhu ovo ova li va efa ovahongwa ovo va twale oumbulu ovo kuJesus. Ovahongwa ovo ova li va tula oikutu yavo yokombada kombuda yokambulu a ka kokakadi nosho yo kokambulwena kako, ndele Jesus okwa li a londa kokambulwena.

Eshi Jesus a li a londa a yuka muJerusalem, ovanhu vahapu ova li tave mu shikula. Ovanhu vahapu ova li va yala oikutu yavo yokombada mondjila ofimbo vamwe va li va teta oivale yomilunga nove i yala mondjila. Ova li va ingida va ti: “Na nangekwe noupuna ohamba, ou te uya medina lOmwene, ombili meulu nefimano opombada.”

Ovafarisai vamwe ovo va li mokati kovanhu ovo ova li va handuka eshi ovanhu tava ingida nova li va lombwela Jesus tava ti: “Omuhongi hanyena ovalongwa voye.” Ndele Jesus okwa li e va nyamukula ta ti: “Ohandi mu lombwele: ava ngenge tava mwena, omamanya otaa ingida.”

Eshi Jesus a li e li pokufika muJerusalem, okwa li a tala oshilando osho ndele ta hovele okupopya kombinga yasho a nyika oluhodi ta ti: “Ngeno mefiku eli ove wa koneka osho sha wapalela ombili yoye, ndelenee paife eshi sha holekwa omesho oye.” Jerusalem osha li shi na okuhandukilwa molwaashi okwa li hashi nyonene owina.

Jesus okwa li a xunganeka shi na sha nokuhandukilwa kwasho a ti: “Ovatondi voye [Ovaroma ovo va li ve li mewiliko londjai Titus] tave ku fele omikangha ndee tave ku dingilile, ndele otave ku fininike keembinga adishe, ndele tave ku ngumauna po fiyo okomikangha, novamwoye vomuove, vo itava fii po emanya la londekwa kulikwao.” Ehanauno laJerusalem olo Jesus a li a xunganeka ola li la ningwa konima yomido 37, momudo 70 O.P.

Oivike inini ya tetekela, ovanhu vahapu opo va li eshi Jesus a li a nyumuna Lasarus. Ovanhu ovo ova kala tava lombwele vakwao shi na sha noshikumwifilonga osho. Onghee hano, eshi Jesus a li a ya muJerusalem, ovanhu aveshe moshilando ova li va tunhukwa neenghono. Ovanhu ova li va pula va hala okushiiva va ti: “Olyelye ou?” Eemhunga dovanhu oda ti: “Oye omuprofeti ou, Jesus womuNasaret shaGalilea.” Eshi Ovafarisai va mona aishe oyo ya li tai ningwa, ova li va popya kutya itava dulu vali okuninga po sha molwaashi ‘ounyuni aushe owa li tau mu shikula,’ ngaashi va li va popya.

Jesus okwa li a ya kotembeli a ka honge ovanhu ngaashi a li he shi ningi alushe ngeenge ta talele po muJerusalem. Fimbo a li motembeli, ovapofi noingudu ova li ve uya kuye ndele te va velula. Eshi ovapristeri ovakulunhu novanongo vomishangwa va li va mona oilonga ikumwifi oyo Jesus a li ta longo, naashi va li va uda ounona voumati ovo va li motembeli va li tava ingida tava ti kutya “Hoshianna Omona waDavid!” osha li she va handukifa. Ova ti: ‘Ove, ou udite ko tuu ava osho tava ti?’

Jesus okwa li e va nyamukula a ti: “Heeno, onye inamu lesha hamba nande lumwe: Omomakanya ounona nouhanana we lilongela ehambelelo?”

Jesus okwa li a twikila okuhonga ovanhu nokwa li a talaatala koinima aishe oyo ya li motembeli. Diva etango ola li la toka, onghee hano okwa li a ya pamwe novahongwa vaye 12 nova li va enda eekilometa 3 ile di dule po va yuka kuBetania. Jesus okwa kala muBetania oufiku wOsoondaxa, tashi dulika a li meumbo lakaume kaye Lasarus. Mateus 21:1-11, 14-17; Markus 11:1-11; Lukas 19:29-44; Johannes 12:12-19; Sakaria 9:9.

▪ Onaini nongahelipi Jesus a li a ya muJerusalem e li ngaashi Ohamba?

▪ Omolwashike sha li sha fimanenena eshi eemhunga dovanhu da li tadi tange Jesus?

▪ Jesus okwa li e udite ngahelipi eshi a tala Jerusalem, nokwa li a xunganeka exunganeko lilipi?

▪ Oshike sha li sha ningwa po eshi Jesus a li a ya motembeli?