Ookaume kaKalunga otava ka kala moparadisa

Oparadisa itai ka kala ngaashi ounyuni ou tu li muo kunena. Kalunga ka li nande efiku limwe nehalo opo edu li kale liyadi omaupyakadi nosho yo omaluhodi, omauyahame nokumona oixuna. Monakwiiwa, Kalunga ota ka ninga edu oparadisa. Oparadisa otai ka kala ya tya ngahelipi? Natu tale eshi Ombibeli tai ti:

Ovanhu ve li nawa. Oparadisa otai ka kala eumbo lookaume kaKalunga. Otava ka ningilafana oinima iwa. Otava ka kala paenghedi dopauyuki daKalunga. — Omayeletumbulo 2:21.

Oikulya ya wana. MOparadisa itamu ka kala ondjala. Ombibeli otai ti: “Moshilongo namu kale oshishipo shoilya [sha hala kutya, oikulya].”— Epsalme 72:16.

Omaumbo mawa nosho yo oilonga inyakula. MOparadisa kombada yedu oukwaneumbo keshe otau ka kala u na eumbo lao vene. Keshe umwe ota ka longa oilonga oyo tai eta ehafo lashili. — Jesaja 65:21-23.

Ombili mounyuni aushe. Ovanhu itava ka lwa vali nokufya moita. Eendjovo daKalunga otadi ti: “[Kalunga ota] xulifa po oita.” — Epsalme 46:8, 9.

Oukolele muwa. Ombibeli otai udaneke: “Onakukala mo [mOparadisa] nande umwe ta ti: Aame oshingone.” (Jesaja 33:24) Kape na yo umwe oo ta ka kala oshilema ile omupofi ile ombolo ile iha dulu okupopya. — Jesaja 35:5, 6.

Exulifepo louyahame, oluhodi nefyo. Eendjovo daKalunga otadi ti: “Nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:4.

Ovanhu vai otava ka xula po. Jehova okwa udaneka ta ti: “Ovahenakalunga tava ka dudwa mo moshilongo, novaliteeki tava ka kufwa mo musho.” — Omayeletumbulo 2:22.

Ovanhu otava ka kala ve holafane nova fimanekafana. Itapa ka kala vali pe na okuhenouyuki, efininiko, olwisho nosho yo outondwe. Ovanhu otava ka kala va hangana notava ka kala metwokumwe neenghedi daKalunga dopauyuki. — Jesaja 26:9.