Eenghundafana Odo Hadi Ningwa Hauxuuninwa Naavo Va Wana Oku Ka Ninginifwa

Eninginifo ohali ningwa alushe poyoongalele yEendombwedi daJehova, inini naayo yakula. Omuyandji woshipopiwa sheninginifo oha shivi ovaninginifwa va fikame lwopexulilo loshipopiwa shaye, nova nyamukule mokule nonewi la yela omapulo avali taa shikula.

1. Mbela omwe livela ombedi omolwomatimba eni, mwe liyapulila Jehova mu longe ehalo laye nomwa dimina kutya ote mu xupifa okupitila muJesus Kristus?

2. Mbela omu udite ko tuu kutya eninginifo otali mu didilikifa mu li vamwe vomEendombwedi daJehova metwokumwe nehangano laye?

Eshi ovaninginifwa tava nyamukula heeno newi la yela komapulo oo, otava ‘hepaulula moipafi’ eitavelo lavo mekuliloyambo nosho yo kutya ove liyapulila filufilu Jehova. (Rom. 10:9, 10) Onghee hano, ovaninginifwa ova pumbwa okudilonga komapulo oo pamwe neilikano komesho yefimbo opo va dule oku ke a nyamukula, ve na oulela pauhandimwe.

Mbela owe liyapulila Jehova okupitila meilikano, to mu udanekele kutya oye aeke to ka longela nonokutya okulonga ehalo laye osho oshinima sha fimanenena monghalamwenyo yoye?

Ou na ngoo oushili lela kutya kape na sha osho tashi ku imbi uha ninginifwe poshoongalele tashi uya?

Omidjalo dilipi tadi wapalele okuninginifwa nado? (1 Tim. 2:9, 10; Joh. 15:19; Fil. 1:10)

Otu na okudjala monghedi tai wapalele “nokuliwapeka noshishohoni noukoshoki” opo tu hepaululile kutya fye “oonakutilakalunga.” Ovaninginifwa itava ka djala oikutu yokuyowifa hai limonikila, ya shangwa omatumbulo onhumba ile ya fanekwa omadidiliko eengeshefa. Ove na okudjala oikutu tai wapalele noya koshoka.

Ovaninginifwa ove na okulihumbata monghedi ya tya ngahelipi pefimbo lokuninginifwa kwavo? (Luk. 3:21, 22)

Jesus okwa tula po oshihopaenenwa shiwa shi na sha nanghee ovaninginifwa ve na okulihumbata kunena. Okwa li e shi shii kutya eninginifo olo onghatu ya kwata moiti, naasho okwa li e shi ulika melihumbato laye. Onghee hano, onhele yeninginifo kai fi onhele yokuningila oiyolifa ile yokuyowela ile yokuningila oinima yoludi keshe oyo itai fimanekifa oshiningwanima osho. Omuninginifwa mupe ke na okuninga oinima ihafele a fa omunhu a findana mefiyafanepo ile moudano wonhumba. Nonande eninginifo oli li omhito ihafifa, ehafo oli na okuulikwa monghedi yefimaneko.

Okwoongala pandjikilile nosho yo okweendafana neongalo otaku ke ku kwafela ngahelipi u kale metwokumwe neliyapulo loye kuJehova?

Omolwashike sha fimanenena okukala nelandulafano lokukonakona Ombiibeli paumwene nokukala ho i moukalele pandjikilile, nokuli nokonima eshi wa ninginifwa?

OMALOMBWELO KOVAKULUNHUONGALO

Shimha omuudifi ina ninginifwa a popi kutya okwa hala okuninginifwa, oku na okuladipikwa a ka leshe nawanawa “Omapulo oo e na okupulwa ovo va hala okuninginifwa,” oo e li pepandja 185-207. Omu na oku mu ladipika a leshe “Etumwalaka kovaudifi ovo inava ninginifwa,” olo la hovela pepandja eti-182, olo tali yelifa nghee ta dulu okulilongekidila omapulo eninginifo oo ta ka pulwa kovakulunhuongalo. Ngaashi sha yelifwa metumwalaka olo, omuudifi oo a hala okuninginifwa ota dulu okukala e na omadidilikoshango aye opaumwene mombapila imwe i lili nota dulu okutala membo eli pefimbo leenghundafana. Ashike, ina pumbwa okweendifwa po kuumwe ofimbo ina shakena novakulunhuongalo.

Omunhu oo a hala okuninginifwa na shiivifile omuunganeki wolutu lovakulunhuongalo. Konima eshi omuudifi a mana okulesha “Omapulo oo e na okupulwa ovo va hala okuninginifwa,” omuunganeki wolutu lovakulunhuongalo ote ke mu pula ngeenge okwe liyapulila Jehova okupitila meilikano noku longe ehalo laye. Ngeenge okwe liyapulila Jehova, omuunganeki wolutu lovakulunhuongalo ota ka ninga omalongekido opo ovakulunhuongalo vavali va ka kundafane naye oshitukulwa “Omapulo oo e na okupulwa ovo va hala okuninginifwa.” Oitukulwa oyo ivali oi na okukwatelwa komesho kovakulunhuongalo va yoolokafana. Inamu pumbwa okuteelela manga ku shiivifwe oshoongalele opo mu ka hovele eenghundafana da tya ngaho.

Oitukulwa oyo ivali oi na okukundafanwa peemhito mbali da yoolokafana. Keshe shimwe oshi na okuningwa moule wovili ile shi dulife po ngeenge osha pumbiwa. Oshitukulwa keshe oshi na okuhovela nokuxulifwa neilikano. Kutya nee omuudifi ile ovakulunhuongalo, kave na okweenda momapulo oo omhulukuta. Ashike ovakulunhuongalo ovo va hoololwa va pule omuudifi omapulo ove na oku shi ninga diva ngaashi tashi dulika.

Oshiwa alushe okupula omunhu oo a hala okuninginifwa omapulo e li oye aeke, ndele haku va pula ve li ongudu. Ngeenge ovakulunhuongalo tava pula omuudifi omapulo e li oye aeke, otava dulu okumona kutya omuudifi oku udite ko shi fike peni notava ka kala ve na oushili kutya omuudifi oo okwa wana tuu okuninginifwa ile hasho. Kakele kaasho, omunhu oo ta pulwa omapulo eninginifo otashi dulika a kale a manguluka okupopya ngeenge e li oye aeke. Ovalihomboli otava dulu okupulwa omapulo ve li pamwe.

Ngeenge omunhu oo a hala oku ka ninginifwa omumwameme, omukulunhuongalo oku na okukundafanena naye ponhele opo tava dulu okumonika noupu kuvamwe ashike kave uditike eshi tava popi. Ngeenge okwa pumbwa okuya nomunhu umwe, na kale omukulunhuongalo mukwao ile omuyakuliongalo, she likolelela koshikundafanwa osho tashi kundafanwa, ngaashi tashi popiwa mokatendo taka landula.

Momaongalo omo mu na ovakulunhuongalo vanini, ovayakuliongalo va pyokoka nove na eendunge dokuyoolola otava dulu okukundafana naao ta ka ninginifwa omapulo mOshitukulwa 1, “Osho Ovakriste va itavela.” Ovakulunhuongalo ovo ashike ve na okukundafana “Oshitukulwa 2, “Onghalamwenyo yOvakriste.” Ngeenge meongalo kamu na ovamwatate ovo tava dulu okukundafana naao a hala okuninginifwa oitukulwa oyo, eongalo otali dulu okukwatafana nomupashukilishikandjo, ye a tale ngeenge eongalo lopoushiinda otali dulu okukwafela.

Ngeenge oo ta ninginifwa okaana, ovadali vaye ovo ve li Eendombwedi opo ve na okukala. Ngeenge itava dulu okukala po, ovakulunhuongalo vavali (ile omukulunhuongalo nosho yo omuyakuliongalo, she likolelela koshitukulwa osho tashi kundafanwa) ove na okukala va kwatelwa mo meenghundafana.

Ovakulunhuongalo ove na okushilipaleka ngeenge omunhu oo a hala okuninginifwa oku udite ko tuu nawa omahovelohongo Ombiibeli. Natango, otava ka kala va hala okumona ngeenge omunhu a tya ngaho okwa lenga tuu oshili yEendjovo daKalunga nongeenge okwa fimaneka tuu ehangano laJehova. Ngeenge omunhu a tya ngaho ke udite ko omahovelohongo Ombiibeli, ovakulunhuongalo ove na okuninga omalongekido onhumba opo omunhu a tya ngaho a kwafelwe paumwene a dule okukala a wana oku ka ninginifwa monakwiiwa. Vamwe otashi dulika va kale va pumbwa natango okuulika kutya ova lenga oukalele ile okuulika kutya ohava dulika komilandu dehangano. Onghee hano, ovakulunhuongalo ove na okulongifa eendunge davo dokuyoolola eshi tava pula omapulo va tale ngeenge omuudifi wonhumba ile wongadi okwa wana tuu shili, molwaashi okuninginifwa oku li onghatu ya kwata moiti. Kashi na nee mbudi kutya pamwe omapulo amwe okwa kwata oule wefimbo ile okafimbo kanini, ovakulunhuongalo ove na okupula omapulo aeshe.

Konima yokupula omapulo omoshitukulwa oshitivali, ovakulunhuongalo ovo va li va pewa oshinakuwanifwa shoku ka kundafana nomunhu oo a hala okuninginifwa, ove na nokushakena nokutokola ngeenge omunhu oo okwa wana okuninginifwa ile hasho. Ovakulunhuongalo ove na okukaleka momadiladilo onakudiwa nokudula kwaavo va hala oku ka ninginifwa, noinima ikwao i lili. Elalakano la fimana lovakulunhuongalo olo okutala ngeenge omunhu okwe liyandjela Jehova tashi di komutima nokutala ngeenge oku udite ko shili omahovelohongo Ombiibeli. Kekwafo leni lopahole, ovanhu ovo opo va ninginifwa otava ka kala ve lilongekida okuwanifa po oshilonga shavo sha fimanenena, oukalele wetu wopaKriste.

Lwanima, umwe womovakulunhuongalo ovo ile vavali vomuvo otava dulu okuya va ka lombwele omuudifi kutya okwa wana okuninginifwa ile hasho. Ngeenge omuudifi oo okwa wana oku ka ninginifwa, ovakulunhuongalo ove na oku ka kundafana naye oshitukulwa osho tashi hangwa pepandja 206-207, shi na oshipalanyole: “Eenghundafana odo hadi ningwa hauxuuninwa naavo va wana oku ka ninginifwa.” Ngeenge oo a hala okuningifwa ina mana ko natango embo Nghee to dulu okuhafela onghalamwenyo fiyo alushe!, ovakulunhuongalo ove na oku mu ladipika a mane ko omambo oo nonande okwa ninginifwa. Lombwela omuudifi kutya efiku leninginifo laye otali ka wedwa mokakalata haka ifanwa Okakalata komuudifi (Congregation’s Publisher Record) koshi yedina laye. Mu dimbulukifa a pe ovakulunhuongalo ouyelele waye opo ehangano li twikile okufila oshisho oilonga yEendombwedi daJehova mounyuni aushe nosho yo a dule okukufa ombinga moilonga nokupewa ekwafo lopamhepo. Natango, ovakulunhuongalo otava dulu okudimbulukifa omuudifi kutya ouyelele waye wopaumwene otau ka ungaungiwa nao metwokumwe no-Global Data Protection Policy yEendombwedi daJehova oyo i li ko jw.org. Eenghundafana odo daxuuninwa odi na ashike okukwata oule wominute omulongo ile dinini.

Omudo umwe konima yokuninginifwa, ovakulunhuongalo vavali ove na oku ka talela po omuudifi oo ve mu kwafele noku mu twa omukumo. Umwe womovakulunhuongalo ovo oku na okukala omupashukili wongudu yoilonga yomomapya oko ku na omuudifi oo. Ngeenge omuudifi oo mupe okaana, ovadali vaye opo ve na okukala po eshi ovakulunhuongalo tava kundafana naye ngeenge ove li moshili. Etalelepo olo oli na okukala la mwenyopala notali tungu. Ovakulunhuongalo otava ka kundafana kombinga yexumokomesho lomuudifi mupe noku mu pa omayele nghee ta dulu okutwikila okukala ha ningi ekonakono lopaumwene nokulesha Ombiibeli keshe efiku, elongelokalunga loukwaneumbo lokoshivike, okukala pokwoongala nokukufa ombinga muko nosho yo okukala ha i moilonga yokuudifa oshivike keshe. (Ef. 5:15, 16) Ngeenge ina mana ko natango embo Nghee to dulu okuhafela onghalamwenyo fiyo alushe!, ovakulunhuongalo ove na okuninga omalongekido opo umwe e mu kwafele e a mane ko. Ove na yo oku mu pandula pahole. Ngeenge tava yandje omayele, ove na ashike okupopya oshitwa shimwe ile ivali poshikando.