Oshimhungu Shomapulo

◼ Fimbo omuudifi ina ninginifwa ina dimininwa okuninginifwa, okwa pumbwa okukala ha ongala nokulonga moukalele shi fike peni?

Eninginifo olo etokolo la fimanenena olo omunhu ta ka ninga. Onghee hano, fimbo umwe ina pulwa omapulo e na sha neninginifo, oku na okukala e udite ko oiteelelwa yaKalunga. Kakele kaasho, oku na okukala ha ulike kutya okwa tokola okukala metwokumwe noiteelelwa yaKalunga.

Ovakriste ova lombwelwa vaha efe po okwoongala pamwe, onghee hano, omuudifi oo ina ninginifwa oku na okukala ha kala pokwoongala nopehe na okufaula. (Heb. 10:24, 25) Oku na yo okukala ha kufa ombinga mokuyandja omilombo pokwoongala. Ota dulu okulishangifa mOfikola yOkudeula Ovaudifi, nonande osho kashi fi oshiteelelwa.

Molwaashi Ovakriste ova pewa oshinakuwanifwa shokuudifa onghundana iwa nokuninga ovanhu ovahongwa, omuudifi ina ninginifwa oku na okukala ha kufa ombinga pandjikilile mokuudifa ofimbo ina ninginifwa. (Mat. 24:14; 28:19, 20) Oku na okuudifa oule weemwedi di fike peni manga ina ninginifwa? Oku na okupewa efimbo la wana opo a dule okuulika kutya okwa tokola okukala omudiinini mokukufa ombinga nouladi moukalele omwedi keshe. (Eps. 78:37) Ndele nande ongaho, inapa pumbwa okupita efimbo lile unene okudja eshi a ninga omuudifi fiyo osheshi a wana okuninginifwa, otapa dulu ashike okupita eemwedi dinini. Okwa pumbwa okulonga eevili di fike peni moukalele? Kape na omhango tai dengele kutya odi na okukala di fike peni. Ovakulunhuongalo ove na okutala keenghalo domuudifi keshe de likalekelwa nokukala nondjele. — Luk. 21:1-4.

Ovakulunhuongalo (ile ovayakuliongalo momaongalo omo muhe na ovakulunhuongalo vahapu) ovo tava pula ovo va hala okuninginifwa omapulo ove na okudimbuluka kutya keshe omunhu oku li shaye nove na okulongifa eendunge dokuyoolola eshi tava tokola ngeenge omunhu okwa wana okuninginifwa ile hasho. Omunhu oku na okukala e na ehalo okuninga umwe womEendombwedi daJehova nokuulika kutya okwa pandula oufembanghenda wokukala mehangano laJehova nokukufa ombinga moukalele. Ovakulunhuongalo ove udite ko kutya omunhu a tya ngaho ina pyokoka pamhepo natango noke na owino oo u niwe kovaudifi vevangeli va pyokoka. Ngeenge ove wete kutya ina wana okuninginifwa, ove na oku mu lombwela monghedi iwa kutya omatomheno opamishangwa elipi tae mu ningifa a kale ina wana noku mu kwafela a mone ekwafo lopamhepo.