Isak ta dalwa

Abraham naSara ova kala va hombola oule womido dihapu. Ova li va fiya po eumbo lavo londilo muUr, nova ka kala hava di meetenda. Ashike Sara ka li a ngongota eshi va fi ya po eumbo lavo molwaashi okwa li e lineekela muJehova.

Molwaashi Sara okwa li a hala okaana neenghono, okwa lombwela Abraham a ti: ‘Ngeenge omupika wange Hagar okwa dala okaana, otaka ka kala ashike ka fa kange.’ Konima yefimbo, Hagar okwa li a dala okaana okamati, ndele taka lukwa Ismael.

Konima yomido dihapu, eshi Abraham a li e na omido 99 ofimbo Sara omido 89, ova li va talelwa po kovaenda vatatu. Abraham okwa li e va pula va kale omutumba nokufuda po momuti nokulya omusha pamwe naye. Mbela ou shii kutya ovaenda ovo ova li oolyelye? Ova li ovaengeli. Ova li va lombwela Abraham va ti: ‘Momudo tau uya, Sara omwalikadi woye ota ka kala e na okaana.’ Sara okwa li motenda ta pwilikine. Opo nee okwe liyola mwene ndele ta ti: ‘Ame ohandi ka dala tuu vali, nonande ame onda kulupa neenghono?’

Momudo wa landula ko, Sara okwa li a dala okaana okamati ngaashi naanaa omweengeli waJehova a li a udaneka. Abraham okwe ka luka Isak, olo tali ti: “Omuyolwa.”

Eshi Isak a li e na omido nhano lwaapo, Sara okwa li a mona Ismael ta sheke Isak. Molwaashi Sara okwa li a hala okwaamena omonamati waye, okwa ya kuAbraham ndele te mu lombwele a taatae mo Hagar naIsmael meumbo. Potete Abraham ka li a hala okuninga ngaho, ndele Jehova okwa li e mu lombwela a ti: ‘Pwilikina kuSara. Osheshi Ame ohandi ka fila oshisho Ismael, nohandi ka wanifa po omaudaneko ange okupitila muIsak.’