OSHILESHWA 01
Ongahelipi Ombiibeli tai dulu oku ku kwafela?
Atushe ohatu kala twa hala okushiiva shihapu kombinga yonghalamwenyo, okumona oixuna, efyo nosho yo onakwiiwa. Ohatu lipula yo noisho yakeshe efiku, ngaashi ouxupilo nosho yo onghalonawa yomaukwaneumbo etu. Ovanhu vahapu ova didilika kutya Ombiibeli ihai nyamukula ashike omapulo a fimanenena monghalamwenyo, ndele ohai yandje yo omayele e na sha neenghalo dakeshe efiku. Mbela ovanhu aveshe otava dulu ngoo okumona ouwa mOmbiibeli?
1. Omapulo amwe elipi a nyamukulwa mOmbiibeli?
Ombiibeli oya nyamukula omapulo a fimana ngaashi: Oinima i na omwenyo oye uya po ngahelipi? Elalakano longhalamwenyo olashike? Omolwashike ovanhu hava mono oixuna? Omunhu ohai peni, ngeenge okwa fi? Ngeenge keshe umwe ota lalakanene ombili, omolwashike mounyuni mu yadi oita? Oshike tashi ka ningilwa edu monakwiiwa? Ombiibeli otai tu ladipike tu konge omanyamukulo omapulo oo, novanhu omamiliyona ova mona omanyamukulo taa mbilipaleke.
2. Ongahelipi Ombiibeli tai dulu oku tu kwafela tu hafele onghalamwenyo?
Ombiibeli otai tu pe omayele mawa. Pashihopaenenwa, otai hongo omaukwaneumbo nghee taa dulu okukala a hafa. Otai tu lombwele nghee hatu dulu okuungaunga nomaudjuu nanghee hatu dulu okuhafela oilonga yetu. Ohatu ka tala osho Ombiibeli tai hongo kombinga yoikundafanwa oyo naikwao vali imwe, eshi hatu kundafana oshishangomwa eshi. Otashi dulika u ka didilike kutya ‘Omishangwa adishe otadi dulu okuhonga,’ ile tu tye, oinima aishe oyo i li mOmbiibeli otai dulu oku tu kwafela. — 2 Timoteus 3:16.
Oshishangomwa eshi inashi pingena po Ombiibeli. Ndele otashi ku tu omukumo u konakone Ombiibeli ove mwene. Onghee ohatu ku ladipike u leshe omishangwa odo tadi hangwa moileshwa ei nokuyelekanifa naasho to lihongo.
KONAKONA MOULE
Tala nghee Ombiibeli ya kwafela ovanhu, nghee to dulu okuhafela oku i lesha nosho yo kutya omolwashike wa pumbwa okukwafelwa opo u i ude ko.
3. Ombiibeli otai dulu oku tu wilika
Ombiibeli oya fa ouyelele wa twa. Otai dulu oku tu kwafela tu ninge omatokolo e li mondjila notu shiive osho tashi ka ningwa monakwiiwa.
Lesha Epsalme 119:105, ndele tamu kundafana omapulo taa shikula:
Omushangi wEpsalme okwa li a tala ko ngahelipi Ombiibeli?
Ove owe i tala ko ngahelipi?
4. Ombiibeli otai dulu okunyamukula omapulo etu
Omukainhu umwe okwa li a mona mOmbiibeli omanyamukulo omapulo oo a kala te lipula oule womido. Dana OKAVIDIO, ndele tamu kundafana omapulo taa shikula.
Omukainhu oo e li mokavidio okwa li te li pula omapulo elipi?
Ongahelipi okukonakona Ombiibeli she mu kwafela?
Ombiibeli otai tu ladipike tu kale hatu pula omapulo. Lesha Mateus 7:7, ndele tamu kundafana epulo tali shikula:
Omapulo elipi u na taa dulu okunyamukulwa kOmbiibeli?
5. Oto dulu okuhafela okulesha Ombiibeli
Vahapu ohava hafele okulesha Ombiibeli nohava mono mo ouwa. Dana OKAVIDIO, ndele tamu kundafana omapulo taa shikula.
Ngaashi twa mona mokavidio, ovanyasha ohava kala ve uditile ngahelipi okulesha?
Nonande kave hole naanaa okulesha, omolwashike hava hafele okulesha Ombiibeli?
Ombiibeli otai dulu oku tu pa ouyelele tau hekeleke nosho yo eteelelo. Lesha Ovaroma 15:4, ndele tamu kundafana epulo tali shikula:
Mbela owa hala okuuda kombinga yeteelelo olo li li mOmbiibeli?
6. Ohatu dulu okukwafelwa kuvamwe tu i ude ko
Vahapu ova didilika kutya ohashi va kwafele ngeenge tava konakona Ombiibeli navamwe, shi dulife eshi tave i konakona kuvo vene. Lesha Oilonga 8:26-31, ndele tamu kundafana epulo tali shikula:
Ongahelipi hatu dulu okuuda ko Ombiibeli? — Tala ovelishe 30, 31.
Omulumenhu wokuEtiopia okwa li a pumbwa ekwafo opo a ude ko Omishangwa. Vahapu ohava mono tashi kwafele okukundafana Ombiibeli navamwe
VAMWE OHAVA TI: “Okukonakona Ombiibeli emanepo lefimbo.”
Ove oto ti ngahelipi? Omolwashike to tile ngaho?
ENGONGO
Ombiibeli ohai yandje omayele mawa e na sha nonghalamwenyo, hai nyamukula omapulo a fimana, hai hekeleke noku tu pa eteelelo.
Eendululo
Omayele a tya ngahelipi hatu dulu okuhanga mOmbiibeli?
Ombiibeli otai nyamukula omapulo elipi?
Oshike wa hala okulihonga mOmbiibeli?
TALA OUYELELE WA WEDWA PO
Tala nghee omayele Ombiibeli taa longo kunena.
“Ombiibeli oi na ounongo u li pefimbo” (Oshungonangelo, No. 1 2018)
Tala nghee Ombiibeli ya kwafela omulumenhu umwe oo a li ha nyengwa okupangela omaliudo aye okudja kounona.
Konakona omayele Ombiibeli e na sha noukwaneumbo.
“Eenghedi 12 odo tadi dulu okukwafela oukwaneumbo u pondole” (Kala oupafi! No. 2 2018)
Lihonga nghee Ombiibeli ya nyaneka pomutenya omitotolombo di na sha naao ta pangele ounyuni.
Omolwashike u na okukonakona Ombibeli? — Okavidio ke lixwa po (3:14)